旺角 26/7/2025 13:30

旺角難得搵到價格非常貼地嘅泰國菜餐廳，環境舒適，午市套餐仲包括飲品，份量充足，非常抵食。

今日仲送上冬陰功湯，蕃茄味勁香濃，搭配泰式醬料，香茅、青檸葉等，帶輕微辣味，真係超開胃。湯內面仲有車厘茄同秀珍菇，真材實料。

牛肉香葉炒公仔麵 $58﹕香氣滿滿，味道非常濃郁，牛肉、蔬菜等配料都非常多，牛肉煎炒到恰到好處，夠晒腍。粟米仔爽脆香甜，調味方面加左唔少香葉，亦加左魚露，咸香味突出。公仔麵炒得夠鑊氣，仍保持彈性口感，非常不錯。

海南雞拼豬手飯 $70﹕賣相靚仔，集海南雞同泰式豬手於一碟，一次過試晒兩款。雞皮油亮，肉質滑嫩，肥瘦適中，就算係雞胸部位都唔會感覺乾柴，肉味鮮甜。泰式豬手經過長時間燉煮，豬皮都煮到軟腍，入口即化，肉質都幾腍滑，醬汁味道帶甜，送飯一流。

加$10升級三色椰汁冰﹕大熱天時飲番杯冰凍特飲。白色嘅椰汁冰底清爽微甜，椰香十足，中間加左三款配料，有白色、綠色、粉紅色，口感滑滑類似啫喱的物體，咬開中間又脆脆地好似馬蹄咁，非常好味。

加$10升級珍多冰﹕東南亞嘅經典甜品，呢款椰香味更加濃郁，亦帶奶香味，珍多條口感Q彈爽滑，甜度適中，清涼解暑。

---

旺角 6/4/2025 12:30

餐廳環境充滿住濃厚嘅泰式風情，一踏入門口已經感覺東南亞色。長梳化座椅舒適，仲有一片大玻璃睇到窗外風景，好舒服。

午市套餐非常抵食，送埋飲品都係$4-50。

火車頭炒飯 $48
每一粒飯都炒得乾身分明，炒得好夠鑊氣，唔油膩。炒飯入面滿滿嘅雞肉、雞蛋同青菜。

泰式金邊粉 $55
金邊炒本身爽滑彈牙，滿滿辣甜番茄醬口味，材料豐富，有大大件雞肉、炒蛋、豆乾等，仲有芽菜爽口多汁。

豬頸肉炒貴刁 $58
貴刁粉大大片，晶瑩剔透，非常滑口。豬頸肉份量又多，金黃油亮，仲有大大塊炒蛋，加上大量紅蘿蔔、椰菜等。

值得一提，加$10可以轉飲泰式奶茶。