尖沙咀重慶大廈 7/8/2025 12:30

香料免治羊肉卷拼雞肉卷 Lamb Seekh Kebab & Chicken Seekh Kebab $128﹕老細好好，可以俾我地叫雙拼，試晒羊肉同雞肉兩款唔同口味。肉卷係以絞碎嘅肉，加入各種香料後燒烤而成。肉卷外層微微焦脆，中間肉質緊實。免治羊肉卷有濃郁嘅羊味，香料味豐富，帶丁點微辣，同羊肉嘅味道好夾。另一款雞肉卷雞味更香，口感較為鬆軟。配搭薄荷酸奶醬，有新鮮薄荷嘅香氣，仲有酸奶奶香味加上微微酸度，令肉卷更加清爽，亦減輕左油膩感。

牛油烤雞 Butter Chicken $125﹕一上菜已經聞陣陣香氣，好吸引。醬汁同平時食嘅咖喱好似，不過味道更加濃郁，主打味道當然就係印度牛油，仲有好香嘅薑黃等香料味，上面加少少鮮奶油，口感順滑柔和，味道甜甜的加一丁點辣度，非常適合我地嘅口味。醬汁內有好多雞件，雞肉柔嫩多汁，吸收晒醬汁味道，非常好食。餐牌都註明係多汁微辣，當然要配上烤餅一齊食。揀左兩款唔同嘅烤餅試試。

蒜蓉烤餅 Garlic Naan $35﹕老闆推介口味，烤餅然熱辣辣，滿滿嘅蒜香同牛油香。烤餅本身都幾鬆軟，口感煙煙韌韌，甜口加上蒜末牛油香，就咁食已經好好食。沾一啲牛油咖哩醬，索晒汁，超正

另一款係馬來鬆餅 Roti Chennai $45﹕感覺似手抓餅鬆鬆散散的，牛油味更加香，外皮仲燒到脆脆地，香口又好食。撕成小片更加索汁，個人更加鍾意呢款鬆餅!

椰青水 fresh coconut water $45﹕新鮮即開椰青水，清新解渴，味道微甜，正好解膩，舒緩咖哩香料嘅刺激感，成個喉嚨舒服晒，真係透心涼。

全單$465，味道非常正宗，有少少超乎想像的好食! 老闆同職員都非常親切友善，服務仲非常好，見烤餅凍左仲主動幫我地加熱，呢個真係大大加分。同場與香港小姐Grace有一面之緣，非常靚，非常Nice。