旺角 8/6/2025 14:30

合桃糊椰皇燉蛋白配花生湯圓芋圓 $69: 用原隻椰皇作為盛器，賣相超級靚，椰皇比想像中大隻，份量十足。椰皇燉蛋白非常香滑，椰味香濃，味道微甜，陣陣天然椰水清香，真係透心涼。上邊有大大粒花生湯圓，圓子皮煙煙韌韌，花生爆醬。合桃糊係另外上，先試原味，合桃味香濃，口感細緻無顆粒感。將合桃糊倒入椰皇燉蛋白拌勻，多一陣蛋白奶香，非常滋味。

哈蜜瓜芋圓仙草 $44: 色彩搭配非常搶眼，橙黃色嘅哈蜜瓜都幾新鮮，果肉爽脆多汁，味道微甜。甜品嘅基底係仙草，自然清新，草本香氣，加上花奶。三色芋圓，有南瓜、芋頭、紫薯口味，軟糯香甜，Q彈煙韌。

士多啤梨芭菲杯 $59: 視覺效果非常吸引，紅、白相間，層次分明，每一層配料都相當豐富，有唔同口感。士多啤梨啫喱、奶油、果醬、再加左粟米脆米點綴。士多啤梨同藍莓相當新鮮，味道酸酸甜甜。仲有一個大大嘅曲奇雪糕球，加一點甜。朱古力薄脆脆卜卜，又靚又好食。

芒果雪糕窩夫 $59: 充滿熱帶風情的一味。窩夫作為甜品基底，外層帶有微焦金黃色澤，口感酥脆，中間柔軟綿密，啖啖牛油香。放上冰涼嘅朱古力雪糕，熱與冷交織，加上新鮮芒果，酸酸甜甜，充滿夏日清爽氣息。

開心果雪糕糯米糍 $25﹕臨走外賣開心果雪糕糯米糍，將香濃嘅開心果雪糕包裹喺糯米皮中。雪糕有濃郁嘅堅果香氣，有醇厚開心果油香，甜度適中，品質不錯。糯米皮有少許厚度，口感柔韌，完整包住雪糕，邊行邊食正!