大圍 16/7/2026 14:00

暑假開始約朋友出黎飯聚，最鍾意呢間綠茶餐廳環境舒服，可以慢慢嘆。來試限定新菜式。

醬滷牛腩配荷葉餅 $168﹕賣相亦都靚到不得了，份量超多。一件件牛腩滷到色澤深沉油亮，陣陣醬滷嘅濃郁香氣，牛腩軟腍入味、筋膜爽口。荷葉餅薄韌柔軟，夾埋牛腩一齊食，索晒醬汁。

薄皮鮮肉小籠包 $38﹕細細粒一啖一粒，皮薄多汁，肉汁鮮甜濃郁，沾少少醋提香。

福祿滿園點心小拼 $38: 一籠四件，色彩繽紛，造型已經贏晒。綠色係綠茶龍井米糕，清雅茶香、米香加上紅豆，甜味恰到好處。蘋果造型包包口感鬆軟。紅棗包內餡係非常香甜嘅紅棗蓉最後細細粒紅色喜字米膏，味道微甜，軟糯彈牙。

懷舊米漿 $18﹕米漿質感幼滑綿密，食得出陣陣香濃米香，香濃醇厚，味道微甜，唔會膩。

蕭山蘿蔔幹炒飯 $58﹕炒飯粒粒粒分明，鑊氣十足，蘿蔔幹碎鹹香惹味。