沙田 14/12/2025 18:00

鐵板法式牛粒配白飯 $113﹕成個鐵板盛上，滋滋作響，夠晒熱辣辣。牛粒份量好足，每一粒都煎到表面帶少少焦香，內裡依然保持住粉嫩狀態，肉汁豐富，口感嫩滑又有嚼勁，唔會太韌。個醬汁調得啱啱好，夠香濃甜香，帶微辣，配上洋蔥同青椒等，索晒啲汁，撈埋白飯一齊食超正。

火車頭粉絲煲 $156﹕今次揀左雞湯底，配料超級豐富，包括牛丸、生牛肉、牛筋同烤牛肉。成個煲一上枱熱辣辣，生牛肉切得夠薄，放入熱湯輕輕灼一灼，入口極之嫩滑，牛味好濃。烤牛肉帶有微微嘅焦香，肉質比起生牛肉有嚼勁少少，食落去好惹味。牛丸爽口彈牙，一咬爆汁出。牛筋炆得非常軟腍入味，充滿膠質。

海南雞配黃薑飯 $79﹕賣相吸引，雞肉切得好靚，有光澤。雞皮爽口彈牙，唔肥膩，雞肉嫩滑到不得了。呢度嘅油飯粒粒分明，充滿雞油香、香茅味同椰香，但食落去又唔會覺得好油，加上辣椒醬酸辣開胃，正!

椰汁拉茶紅豆冰﹕底層係滿滿嘅紅豆，中間係椰汁味奶茶，茶香之餘，仲有好濃郁嘅椰香，茶底夠厚，無俾椰汁蓋過。紅豆煮得好腍身，起晒沙，每一啖都充滿豆香，甜度啱啱好。