新蒲崗 16/11/2025 17:30

好耐冇食潮州菜，我經過新蒲崗發現呢一間老字號嘅滷水飯盒，非常吸引，買個外賣先。

滷水鵝肉飯 $58: 賣相靚仔，份量唔少。鵝肉肉質鮮嫩，肥瘦適中，仲有啖啖滷水咸香，帶有淡淡嘅香料味，配埋白飯一齊食，一流！配菜仲有好多芽菜，爽甜香脆。

滷水雜拼飯 $58: 呢個雜拼飯集合咗多款滷水精華，包括滷豬腸、豬腩肉、豬耳、墨魚等，每一樣都滷得入味。滷豬腸處理得非常乾淨，口感爽滑無腥味，墨魚煙靭爽脆，入晒味。

價錢唔貴，加$10仲有大大碟靚油菜，新鮮爽甜，仲加咗啲滷水汁，非常好味，送埋可樂就係一個非常豐富嘅晚餐。