尖沙咀 16/5/2026 14:00

炒豬肉石鍋芝士拌飯，一上枱已經聽到石鍋滋滋聲，熱力十足，賣相亦特別吸引。石鍋令飯底慢慢形成微脆飯焦，炒豬肉調味惹味，最加分嘅當然係芝士，拌勻之後令整體口感更加濃厚順滑，更有奶香味，最後加入韓式醬料加點甜辣，非常惹味。

醬炒牛肉拌飯牛肉炒得入味，帶有醬香同淡淡甜味，牛味本身亦幾突出，肉質嫩滑。拌飯仲加有好多唔同配菜，好似芽菜、菠菜、蛋絲等，令整體口感更加豐富，麻油紫菜脆卜卜，絕對加分，韓式家常風味。

煎醬牛小排餃子餃子底部煎到金黃微脆，賣相好吸引。咬開之後，外皮帶少少煙韌，底部就有香脆口感，入面嘅牛小排餡明顯比一般餃子更有肉香，油脂感較豐富，加上醬汁調味後，鹹香之中帶點甜味，更加開胃。

蒸餃子王一籠一粒，大大隻，餃子皮柔軟滑身，入口唔會太厚，內餡飽滿多汁勁足料，每一啖都食到肉汁慢慢滲出，口感特別鮮嫩清爽。