旺角 6/9/2025 13:30

時興椰子雞，近來新推出果園脆皮雞就未食過。旺角鳳園係廣州雞煲大品牌，上次去廣州食唔成，估唔到旺角就有一間。環境創適闊落，服務仲好好，真係有國內五星級服務。

五指毛桃脆皮雞煲 $228﹕鍾意五指毛桃有椰香獨特味道，呢個湯底一煮滾就有濃郁嘅五指毛桃香，除左五指毛桃，仲加左好多紅棗、杞子等材料，唔怪得味道咁香甜濃厚，真係暖胃又滋補。雞分成七小碟，第一碟就係翼、腳、骨頭部份﹔最底就係雞內藏﹔中間五小碟一次煮一碟，只需30秒就熟透。估唔到真係咁脆皮! 雞肉依然鮮嫩多汁，雞皮真係脆卜卜，口感爽滑彈牙。雞肉吸收晒五指毛桃湯汁嘅精華，除左本身嘅鮮甜，仲有五指毛桃嘅獨特椰香甜味。

特級肥牛 $158﹕賣相勁靚仔，紅白相間油花分佈均勻。放入滾湯中涮幾秒就可食得，肉色粉嫩，牛肉味濃，油脂豐富，可見品質非常不錯。

肉丸拼盆 $58﹕咸蛋黃蝦丸、潮汕牛筋丸、墨魚丸三款一次過試晒! 咸蛋黃蝦丸本身蝦味相當鮮甜，口感彈牙，仲食到啖啖蝦肉，咬開中間金黃色咸蛋黃餡料爆漿流出，一陣咸香勁有驚喜! 潮汕牛筋丸結實Q彈，勁爆牛肉汁，肉味濃郁，正! 墨魚丸就鮮甜滋味，粒粒墨魚肉，真材實料。

天然桃膠椰子凍 $28﹕賣相靚，面層係琥珀色、晶瑩剔透嘅桃膠。下面係雪白嘅椰子凍，有濃郁嘅椰子清香，質感滑溜，甜度控制得恰到好處，突出椰子本身嘅天然甜味，清爽，超正!

鳳園大滿貫 $18﹕匯聚多種糖水配料，配料滿滿，極為豐盛，只需要十幾蚊。糖水係香濃嘅椰汁為基底，甜度適中，加入煮至軟爛嘅蓮子、清香綿密嘅紅豆，芋圓煙煙韌韌，桃膠軟糯，膠質豐富，滋潤養顏。

醬料費每位$16，另加紙巾 $5，全單五百幾。食物高質素，服務高享受，不錯，會再來!