旺角 31/8/2026 16:00

下晝四點幾行到旺角豉油街食返個下午茶，新開店環境坐得幾舒服，甜品款式仲非常多。

牛角窩夫 $48: 賣相好吸睛，一上枱就聞到好濃嘅牛油香氣，牛角窩夫壓出好深嘅格仔紋，金黃微焦，窩夫咬落去外層酥脆，加上濃郁嘅朱古力醬，香甜美味。

奶香芝士韓式炸雞 $19: 加配埋幾件即叫即整嘅炸雞，外皮脆卜卜，入面肉質嫩滑仲帶點肉汁，面頭舖滿芝士醬，芝士甜甜鹹鹹好惹味。

海鹽芝士奶蓋茶 升級飲品 $6: 面頭厚厚一層雪白奶蓋，綿密細緻，微鹹嘅海鹽味同濃濃奶香突出。茶味清新，鹹甜交融得好好，飲完喉嚨好舒服，用嚟解膩一流。

芝士撈麵配燒賣 $36: 熱騰騰嘅撈麵面頭淋滿金黃濃稠嘅芝士醬，每一條麵條都掛滿醬汁，麵條煮得啱啱好，咬落爽口帶點煙韌彈牙，芝士醬口感好滑溜順喉，鹹香同奶味平衡得好好，燒賣爽口，一齊食不錯。

焦糖燉椰皇 $58: 原個椰皇熱辣辣端上枱，一打開蓋，椰香撲鼻而來。面層係一層薄薄焦脆嘅金黃焦糖，底下就係滑溜如絲嘅燉蛋白，綿密細滑，甜度岩岩好，蛋白完全吸飽咗清甜嘅天然椰子汁，入口清香順喉，食完由喉嚨暖到入心，超正！

意大利朱古力咖啡 升級特飲$12: 咖啡入口質感順滑厚實，咖啡嘅醇香同黑朱古力嘅可可風味完美結合。面頭忌廉清爽，加一分奶香甜蜜。

全單$179，非常好的下午茶，值得再來。