長沙灣 18/7/2025 13:30

Boholic 裝修靚，以波希米亞風格裝潢為主題，營造出清新舒適嘅用餐環境，非常適合與朋友享受悠閒時光。

揀左兩份午餐，每份包括是日餐湯，自家製酸種包。番茄湯有濃郁嘅番茄基底，味道勁濃郁，酸酸甜甜，仲融合左洋蔥清香，非常開胃。酸種麵包外層烤至金黃酥脆，中間柔軟，食得出酸香嘅發酵味，將麵包輕輕浸入湯中，吸晒湯汁嘅酸甜。

香蒜欖菜鮮蝦意大利麵 $88: 食得出香蒜極之濃郁，仲有好香橄欖油香氣，伴上鮮香嘅欖菜同香料，香氣滿滿。仲加左芝士，多一點鹹香味。鮮蝦大大隻，表面微微焦香，中間鮮甜多汁，仲非常彈牙。麵條都略帶韌性，口感不錯，仲吸晒香蒜欖菜醬汁嘅精華，非常好味。

越式烤美國特級豬梅扒$128: 擺盆賣相非常靚，厚切豬梅扒份量十足，切開中間係岩岩好熟成嘅淡粉紅色，調味鹹香，炭火燒烤多一個份煙燻氣息。肉質超級柔嫩，油花分布均勻，肉汁豐富，肉味香甜濃郁，沾一點酸辣醬汁，更加惹味，東南亞風味十分。

開心果奶蓋梳乎厘班戟 $138: 呢度梳乎厘出名又靚又好食。兩大塊梳乎厘疊起，蓬鬆柔軟，上面淋上細膩滑順嘅開心果奶蓋，同開心果碎碎。梳乎厘超級輕盈，入口即化，空氣感十足。濃濃嘅蛋味淡淡甜香，開心果奶蓋味道濃郁，帶堅果香氣，口感細膩滑順。最後開心果碎碎帶出堅果咸香，完美收官。