旺角 8/2/2025 17:00

我真係好鍾意呢間麵包舖！就係旺角火車站，勁人氣嘅麵包店，等咗咁耐終於有得試新產品！

麻糬QQ球 $48/6粒

當然必點招牌產品QQ球，每次經過都被色彩繽紛嘅麻糬吸引。今期仲新出咗好多唔同口味，包括近排大熱嘅開心果同埋杜拜朱古力。賣相靚，每粒都夠晒大個。麻糬本身煙煙韌韌，加上唔同嘅味道真係好吸引。今次試試開心果味，麻糬舖滿濃濃嘅開心果醬，再加左脆卜卜嘅開心果碎，配合得好好。

人氣杜拜朱古力味，麻糬本身係朱古力味，仲有朱古力粒粒，頂層一片脆卜卜朱古力，再點勁搶眼嘅綠色杜拜朱古力，朱古力味滿滿。

最後薄荷朱古力味都比我買埋，脆卜卜嘅薄荷朱古力，一陣薄荷涼浸浸，真係高度還原薄荷朱古力味，估唔到做成麻糬波波都咁好味。

麻糬加上鹹口嘅肉鬆紫菜都別有一番風味，肉鬆味道幾香濃，但係個人都係覺得甜味好啲。

糯米糍 $38/4粒

糯米糍色彩繽紛都好吸引，試咗幾款。糯米糍皮本身黏黏糯糯，米香味甜甜的。輕輕咬開，餡料爆曬出嚟。最好食一定係開心果，滿滿嘅開心果碎，勁滿足。薄荷朱古力絕對有驚喜，因為個皮本身就係清涼嘅薄荷味，中間有滿滿朱古力餡。另外，家人試左芋泥、草莓、阿華田糯米糍都話好好味。

杜拜開心果脆脆朱古力包 $20

朱古力麵包本身好鬆軟，加咗層朱古力醬，再灑上開心果脆脆。又係我最愛嘅朱古力同埋開心果嘅混合體。

芋泥麻糬Tiramisu盒子蛋糕 $38

一盒大大盒嘅盒子蛋糕，材料一層一層鋪滿，紫色同黃色相間，賣相好靚。每層分別係紫色慕絲、蛋糕、芋泥，食得出粒粒芋頭蓉，最驚喜嘅仲有煙煙韌韌嘅麻糬，味道不太甜，芋頭味香。

芝麻麻薯波波 $28

呢款袋裝嘅麻糬波波比較鬆軟濕潤，估唔到中間仲有濃郁嘅芝麻醬餡料。

抹茶紅豆麻糬波波 $28

麵包滿滿綠茶香，中間包住微甜紅豆，仲有煙煙韌韌嘅麻糬。

雙重特濃朱古力裝脆脆卷 $28

拎上手相當有份量，特濃朱古力卷蛋上邊舖滿朱古力脆脆，中間有朱古力奶油同埋朱古力脆脆，味道夠濃郁，絕對滿足朱古力魔嘅要求。