荃灣 20/7/2026 12:00

開始暑假狂食之旅，第一站荃灣。鍾意呢間Cafe環境闊落，非常舒服，可以慢嘆一個中午。

日本芥辣蛋沙律配薯片及西班牙辣肉腸 $98﹕蛋沙律綿滑細膩，入口即化，沙律醬加左芥辣，一陣微微嗆勁，辛香惹味好特別，加上薯條脆卜卜，辣肉腸咸香微辣，呢個前菜好開胃。

扒日本豚肉 $178﹕日本豚肉表面金黃微焦，切開豚肉中間嫩滑多汁，肉質厚實彈牙，沾少少燒汁已經好好食。配菜仲有粒粒焦糖蘋果，酸甜果香同豚肉好夾，南瓜綿密清甜，滿足。

黑松露野菌菠菜意粉$128﹕陣陣黑松露、香蒜嘅味道，意粉彈牙有嚼勁，條條掛滿香濃醬汁。野菌爽滑多汁，菠菜清新解膩，整體適味鹹香濃郁，越食越惹味。

Garden Party Croffle $108﹕牛角包窩夫脆卜卜，層層鬆化，陣陣牛油香。忌廉清爽微甜，食得出水蜜桃烏龍茶香，甜而不膩，加上士多啤梨清甜多汁，賣相靚又好味。

Latte $48﹕拉花細緻，一黎到已聞到陣陣咖啡嘅醇厚香氣。今日係Fruity咖啡豆，咖啡入口醇厚，苦中回甘，微微果香酸甜感，奶泡幼滑順喉，甜而不膩。

主菜不錯，仲有靚甜品同靚咖啡完美收尾。