西貢 4/5/2025 12:00

上次食過太好食，今次再嚟encore。

Pesto Prawn Pizza $195﹕呢款Pizza色彩繽紛，非常吸睛。餅底舖滿綠色嘅意大利香草醬同埋芝士，餅底熱新新脆卜卜，煙煙韌韌。醬汁本身係濃郁嘅香草香氣帶蒜味，加上大量mozzarella芝士絕對做到拉絲效果，絲滑又咸香。材料有大大隻蝦，蝦肉非常鮮甜，燒過嘅燈籠椒甜甜地，非常清新嘅海鮮風味Pizza。

Pulled Pork Lasagna $165﹕賣相勁吸引，芝士焗到微焦，散發住濃濃嘅奶香。切開後可以見到一層層分明嘅餡料，非常豐富。千層麵夾住酸甜濃郁嘅番茄醬同芝士忌廉做基底。主角係慢煮嘅手撕豬肉，肉質嫩滑，味道甜甜的。配搭上微酸嘅酸椰菜，不論味道同口感都大大加分，層次更加豐富。

Triple Cheese Chips $52﹕炸薯條金黃香脆新鮮熱辣，外面脆卜卜，中間鬆軟綿密。三重芝士濃烈咸香cheddar cheese sauce，加上奶香味濃又夠拉絲嘅mozzarella，仲有仲咸香味parmesan，三重芝士醬各有特色，濃郁而不膩嘅芝士風味，大愛。

Banoffee Creme Brulee Pancake $139 厚班戟、香蕉、拖肥醬、、脆焦糖

呢款班戟真係鬆軟空氣感十足，鬆軟綿密，帶淡淡奶蛋香，淋上大量雲尼拿吉士醬，味道更加香甜，蛋味更加濃郁。頂層係燒得焦脆嘅焦糖，水果配搭有香蕉同士多啤梨，新鮮味美，同拖肥醬更係絕配。味道同口感都將梳呼厘班戟同焦糖布甸完美結合，有驚喜。

---

西貢 12/1/2025 13:00

今日來到西貢，海邊有好多舒適嘅餐廳，揀咗呢間Square，空間感十足非常適合親子。菜單選擇非常多，揀咗一款pizza，一份漢堡，再加一啲小食甜品。

BBQ Chicken Pizza $188

Pizza超級大個，好喜歡佢薄薄嘅餅底，口感煙靭，批邊脆脆的。材料非常豐富，有好多雞柳、燈籠椒，最重要嘅係一層厚厚嘅芝士。醬料係酸酸甜甜嘅燒烤醬，非常滋味。

Maple Bacon Cheese Burger $160

非常澎湃，賣相好靚嘅楓糖煙肉芝士漢堡。安格斯牛肉漢堡扒濃郁多汁，用楓糖漿烤至金黃酥脆嘅煙肉先最驚喜，脆到好似薯片咁，味道香甜。芝士都毫不吝嗇，完全覆蓋漢堡。麵包經過烤焗，但牛油香，外皮脆卜卜。

Cajun Prawn Aioli Chips $62

奇尊粉蝦 香蒜蛋黃醬薯條

金黃香脆嘅薯條，外脆內軟。上面加咗香蒜蛋黃醬，蒜蓉味香濃，帶少少辣味。上面仲有幾隻墨西哥風情奇尊粉蝦，爽甜彈牙，好新鮮。撈埋薯條一起食都好夾。

Hazelnut French Toast Box $138

睇相片已經非常吸引，實物來到簡直100% match，超級靚！大大件全個法式多士磚，原來中間加咗大量嘅榛子脆米醬，超級濃甜，脆卜卜。多士上邊有大量香蕉、朱古力片。值得一提雲呢拿雪糕好滑，而且士多啤梨係超級甜。為濃郁嘅甜品加一份清爽。

全單$600，主菜到甜品都大大件，份量十足，而且味道相當不錯。最喜歡佢環境舒適，座位闊落，小朋友需要嘅BB椅，兒童餐具都齊全，好適合一家大細，難怪人氣十足。