新蒲崗 23/7/2026 14:30

全日早餐 $108﹕全日早餐真係超豐富，賣相又靚。炒蛋炒得極之滑溜，口感半熟夠軟綿。薯餅脆卜卜，煙肉煎得香脆，加上肉汁豐富嘅腸仔同清新沙律菜同火龍果，成個組合夠平衡。最正係一件窩夫焗到金黃微脆，入面鬆軟，配埋朱古力糖漿食落甜而不膩。

法式香草燒羊架拼虎蝦 $118﹕兩大件羊架份量十足，表面金黃微焦，中間粉嫩肉質軟淋，熟成度剛剛好，啖啖濃郁肉香，沾少少紅酒燒汁更加提味。虎蝦新鮮爽口，鮮甜味十足，意粉有牛油蒜香味，非常滿足。水準之作！

開心果麻糬提拉米蘇 $48﹕餐後追加自家製甜品，賣相勁靚，非常打卡able。面頭鋪滿咗香濃嘅開心果碎，每一啖都散發住濃郁嘅果仁香氣。傳統嘅手指餅吸滿咖啡，開心果忌廉層質感幼滑綿密。最驚喜係中間竟然藏住煙韌軟糯嘅麻糬，為原本軟滑嘅口感增添咗獨特嘅嚼勁。整體甜度拿捏得啱啱好，濃郁得嚟又唔會覺得膩，係完美嘅句點！

不得不讚呢度嘅榛子鮮奶咖啡 $16，正中心水。咖啡香氣濃郁，同香滑嘅鮮奶融合，口感綿密滑順。榛子糖漿陣陣果仁甜香，甜度啱啱好，冇蓋過咖啡本身嘅醇厚風味。慢嘆下午茶就最岩。