土瓜灣 13/12/2025 14:00

今日去黎土瓜灣發現呢間幾有特色嘅餐廳，環境闊落，坐得非常舒服，點咗幾樣主菜，樣樣都有驚喜。

紅酒慢煮羊膝 $188﹕賣相勁吸引，一上枱已經聞到好香嘅紅酒味，羊膝炆得非常軟腍，用叉輕輕一篤就做到骨肉分離，完全唔韌，羊味好香。醬汁濃郁，有紅酒嘅果香同番茄香，微微酸甜好開胃，味道同羊肉嘅鮮味好夾。配上意大利飯，索晒啲汁，真係好滿足。

自家青醬天貝意大利飯 $88﹕第一次試天貝，非常特別，原來係來自印尼嘅發酵大豆餅，主要由黃豆製成，富含豐富植物性蛋白質嘅健康食品，豆味非常香濃。青醬味道好清新，羅勒味好出，意大利飯煮到啱啱好，口感外軟內韌，估唔到素食都可以咁好味。

法式海龍皇香煎龍躉柳 $228：龍躉柳煎得外皮金黃香脆，魚肉雪白嫩滑，魚油香氣十足，最好味係法式海龍皇湯底，濃稠度剛剛好，海鮮味非常突出，加上仲有大大隻八爪魚、帶子同蜆，非常豐富。

法式慢烤蘋果 $58﹕吃完主菜，當然要試試甜品。這款甜品賣相非常精緻，蘋果經過慢烤之後，口感變得軟糯綿密，果汁豐富，蘋果嘅天然酸甜味同玉桂香氣完美融合，再仲脆卜卜嘅果仁，味道非常有層次，將蘋果昇華到呢個層次，認真高級。

花果香草茶 $88﹕茶具非常靚，味道又好飲，酸酸甜甜嘅熱情果味好突出，除咗果味，仲有一陣淡淡嘅花香，優雅清新。食完啲重口味嘅主菜之後飲呢杯，真係即刻解渴又開胃，感覺好舒服。

燕麥鮮奶咖啡 $42﹕用咗燕麥鮮奶嚟沖，奶泡打得好綿密，入口好滑順。咖啡豆嘅味道幾香濃，有少少果仁味，同燕麥奶嗰種獨特嘅麥香味好夾，飲完個口仲會留有少少甘香，非常不錯。

總的來說，幾道菜式都做得好有心思，一個好適合悠閒周六嘅好去處。