Italian Tomato@馬鞍山
17/8/2022 16:00
平時行過Italian Tomato，見到蛋糕都好吸引，不過價錢略貴，唔係太捨得食。剛見到近排做夏之感謝祭優惠，＄188可以揀五件＄45或以下嘅蛋糕， 又幾抵喎。
五件蛋糕一齊放，靚靚。
揀左兩件期間限定嘅茉香桃脆，蛋糕底係朱古力味仲有朱古力忌廉，帶少少焦糖脆脆，上面有白桃乳酪慕斯，仲有兩片白桃，非常之清甜。
藍莓芝士撻外型好吸引，撻底幾結實，加埋吉士忌廉、藍莓忌廉，仲有好多粒大大粒嘅蓋莓，粒粒都好甜。
皇牌士多啤梨糕外型好靚，忌廉打得好奶滑，蛋糕清甜，可惜士多啤梨略酸，一般啦。
最後係芒果慕絲蛋糕，慕絲中間仲加左芒果醬，酸酸甜甜不錯。
第一次試呢四款蛋糕，三十幾蚊一件係幾抵嘅，不過想食嘅款式都揀晒，試一次就算了。
Sweets House Cha Cha @尖沙咀
10/4/2022 12:30
今日嚟到尖沙咀喺美食廣場食完個午餐之後，就喺出邊買雪糕做甜品。見到今日有期間限定雪糕，實在太靚啦，係我哋最掛住嘅日本櫻花。
櫻花盛放 $52
揀左綠茶牛奶兩溝雪糕底，上面加左士多啤梨、花沾餅、類似果蓉忌廉，仲淋上士多啤梨汁。實物同相片100% match！！
雪糕幼滑，配上士多啤梨酸酸甜甜，仲食到有櫻花香味，呢個配搭好好味。不過，如果揀原味牛奶的話，相信士多啤梨同埋花香味會更加突出。可惜期間限定，可能下次唔見了。
茶木＠馬鞍山
20/2/2022 19:00
茶木堂食就食得多，今日見好似要等位等好耐，索性轉行買外賣返屋企慢慢嘆。外賣優惠＄140可以揀兩份主菜連飲品。兩份仲送一客小食。
第一選擇係黑醋味醂豬軟骨配白飯
豬軟骨炆得好腍，有部份軟骨仲可以食埋，味道酸咪咪，幾開胃。
另一客係紅燒牛頰肉麵
外賣份量都俾得足，牛肉大大舊，入晒味。湯同麵分開，值得一讚。
飲品唔洗加錢已經有黑糖珍珠奶茶。仲送一份鹽酥雞。小食雖然份量少少地，但係炸粉唔太厚，都食到啖啖雞肉。
＄140加幾蚊外賣費，兩份豐富台式食品，都覺得幾抵食。
韓台站＠馬鞍山
16/7/2022 13:00
15/5/2021 13:00
有時想食韓國野，就鍾意叫韓台站嘅外賣。
韓式拌粉絲
有好多粉絲同埋蔬菜，就無乜其他配料，勝在炒得幾香，麻油味十足。
叫左兩款紫菜飯卷，一款係午餐肉，一款係芝士。
紫菜都仲脆脆地，包住醃蘿蔔、魚片、午餐肉等材料，其實兩類相差唔太大。有芝士味道係特出一點。
牛肉什錦拌飯
牛肉都唔少，仲有一隻太陽蛋，最好就係拌上韓式辣椒醬，辣辣地幾好味。
蜜糖芥末炸雞塊
份量都唔少，大大舊，就普普通通嘅一件用炸粉包住嘅雞肉。個醬都ok嘅。
外賣份量都相當多。價錢平，係好抵食。馬鞍山少韓國野食，止痕之選。
－－－－－－－－－－－－－－－－－－－－－－
3/1/2021 13:00
韓式辣年糕，好夠辣。
海鮮煎餅，粉多，無乜特別。
12/5/2021 19:00
香草鮮野菌忌廉天使麵
香濃芝士白汁煙肉焗西蘭花
帆立貝海解菌皇龍蝦汁意大利飯
半溶芝士配一口炸雞
假日夜晚唔想出街食飯，外賣平台解決，幾鍾意叫呢間意樂，選擇多，價錢親民。
香草鮮野菌忌廉天使麵
忌廉汁夠濃厚，野菌都落得非常多，仲有唔少煙肉。
香濃芝士白汁煙肉焗西蘭花
西蘭花略為硬左少少，但白汁芝士味夠濃搭救。
帆立貝海鮮菌皇龍蝦汁意大利飯
飯底係龍蝦汁好香濃，海鮮都有青口、大蝦、蛻肉等等，撈飯食不錯。
半溶芝士配一口炸雞
炸雞略為硬乾少少，芝士醬就好芝味，非常杰身亦夠濃味。
外賣到黎仲熱辣辣，味道算ok，呢個價錢要求達標。
11/4/2021 19:00