好味炸雞拼波波球

好味炸雞拼波波球

雞吧@石門

16/8/2022 17:00

今日黎石門玩到黃昏時間,買啲野食加餸先。一期就見到呢間主打炸雞嘅外賣店。一於試下。炸雞都有好多口味,突然選擇困難症,將呢個重任交俾女女。

半半炸雞L size $138

最後直接買大盒雙併,滿足貪心之人。小朋友揀左蜜糖牛油同車打芝士,每款有八件雞。雞新鮮炸起,脆卜卜,炸漿唔算多,最好係唔油膩,咬開中間肉質好滑,仲保持到肉汁,有驚喜。蜜糖果款蜜味好夠,脆皮吸收晒蜜糖,好夠甜。另一款係配上一大盒車打芝士醬,非常杰身嘅芝士醬,芝味極濃。

意式香草肉丸 $36×2

另外叫左兩份肉丸俾小朋友。十幾粒肉丸好澎湃。豬肉丸本身都好彈牙又有肉汁,醬汁係燒汁,小朋友都鍾意食。

雙色芋泥圓併地瓜球 $36

一盒有六大粒,粒粒都圓轆轆。外皮香脆,中間煙煙韌韌,包住甜甜嘅芋泥。另一款係一咬爆漿嘅地瓜球,蛋黃流沙唧晒出黎,有驚喜!

細細間店仔,充滿住炸雞嘅香味。拎到番屋企仲係新鮮熱辣,炸雞同兩款小丸子都風味十足。今次石門一行有意外收穫。

德福Foodeli

德福Foodeli

Foodeli@九龍灣德福

School Food Blooming Mari & Chimac

5/6/2022 12:00

黎到德福食午餐,Foodeli雖然唔係間間有開,都總算各國料理都有得揀。主食揀左School Food。好耐無食啦,原來得番幾間細店。

韓式豬肉炒粉絲配午餐肉雞蛋紫菜包飯 $70

炒粉絲都幾夠乾身,有醬油味,麻油味都幾香,配料有啲豬肉絲、菇、蔬菜同蛋絲。紫菜包飯都好靚,件件都圓轆轆。紫菜包住大大舊牛餐肉、芝士同醃蘿蔔,入口仲係暖暖地,不錯。

韓式BBQ醬豬扒王飯配薯角 $68

一大碟飯份量好多,大大件豬扒,仲有好幾舊薯角,男士食都非常夠飽。豬扒有燒汁味,但肉質略嫌唔夠腍。反而薯角咸咸地幾好食。仲有清湯、蘿蔔、大豆牙菜。而泡菜甜中帶辣,個人幾鍾意。

Chimac

菠蘿莎莎醬炸雞 $58

除左正餐之外,仲係CHIMAC散叫一份炸雞做小食,揀左小朋友最鍾意嘅菠蘿。要細份炸雞腿肉,細份有八件,價錢都合理,小食多滋味。炸雞都炸得好脆,勝在唔太油膩,仲保留到啲肉汁。加埋菠蘿莎莎汁酸酸甜甜仲更加開胃。另外有兩大片新鮮菠蘿相當甜,好多汁,正好解膩。不錯。炸雞下面仲有一堆薯條,薯條都係新鮮熱辣,非常幼身的,落少少茄汁就係小朋友最愛。

呢個美食廣場都算大,環境乾淨企理,不錯!

南洋吐司廚房

土司工坊@佐敦
12/8/2012 12:30

9/12/2012 20:30

12/8/2012 12:30
真係唔明白,點解任何時間澳牛都咁多人。去唔成澳牛,選擇去對面街嘅吐司工坊。雖然退而求其次,但原來都算意外收獲。是日午餐叫左兩個套餐,另加一個小食。

星洲叻沙套餐 ($42)
呢度嘅份量真如網評所講偏少,不過一碗細細嘅叻沙卻令人回味。賣相得,味道亦唔錯。叻沙配料有魚片、大蝦、豆卜、芽菜等,都係咁上下。材料都幾新鮮,起碼爽口彈牙。小豆卜用盡佢超強嘅吸收力狂索湯汁,更加係美味之中嘅極品。呢個叻沙湯底算係咁耐以黎最可口嘅。湯底用上唔少材料、香料炮製。湯底主調係香甜的,係充滿住蝦味嘅濃郁海鮮味,鮮味過後,係淡淡嘅椰香,再加點柔和辣味。如此鮮味,亦具層次感嘅叻沙湯底,真係第一次試,實在驚喜十足。所以枱上嘅溫馨小貼士,亦介紹左叻沙應該用湯匙食,短短細細嘅粗米線,再拌一啖湯一齊送入口,至係最佳食法。

肉鬆吐司套餐 ($29)
另一款輕型午餐選擇左人氣小食肉鬆吐土司。套餐仲包括半熟蛋同飲品,廿多蚊確實唔貴。切成九宮格嘅厚吐司,鋪滿厚厚一層肉鬆,非常飽足。土司烘得乾脆,邊位微焦脆脆的,中間仍然鬆軟。肉鬆既香且甜,淋上少許煉奶,更加滋味。一開始仲怕肉鬆吐司又咸又甜咁奇怪,原來兩者配合起黎嘅化學作用真係超強。

半熟蛋
多士配上半熟蛋係新加坡餐嘅特色。跟據食用小貼士,打破左半凝固嘅蛋黃,蛋黃同純白幼滑嘅蛋白混和,加上醬油同胡椒粉撈勻,就係簡單美味嘅小食。

皮蛋肉鬆 ($19)
不想多講,我冇興趣。

南洋奶茶
不得不提下呢度嘅南洋奶茶。上次試過K字頭又濃又甜嘅奶茶已經上左癮,今次一於黎個比拼。呢度嘅茶味還可以,可惜甜奶落得輕手,整體黎講同一般茶走冇乜分別。個人黎講,的確比較喜歡K頭字又甜又濃嘅地道奶茶。

雖然唔知呢間食物正宗唔正宗,但味道確實係個人喜歡。特別係一味肉鬆吐司,令人有衝動立即試埋個傳統咖椰吐司。價錢方面比尖東果間K字頭相宜,而且款式更多樣化,星期一至五嘅下午茶更加抵食。好一間新加坡過江龍,又一道力加速小女子嘅新加坡之旅。

9/12/2012 20:30

 牛油咖椰多士
娘惹米線 ($43)

米線非常幼身,可以充分吸收湯汁。湯汁酸酸甜甜,幾開胃。配料有半隻蛋、蝦、魚仔乾及豆卜。

矜貴南洋傳統早餐

Killiney Kopitiam@尖沙咀
17/6/2012 14:00

4/11/2012 12:00

17/6/2012 14:00
近排開始適應番沒有團購的日子,留意多左報紙、雜誌嘅飲食介紹。呢間吉利尼餐廳就係頭條日報介紹嘅新加坡過江龍。坐落港晶中心背後,唔行過真係唔知有間快餐式嘅超低調小店。店仔細細,食品選擇其實唔多,主要係南洋特色早餐同少量粉麵飯,絕對係輕食之選。

米暹 Mee Siam ($62)
米暹即係新加坡撈米粉,米粉配上芽菜、豆卜、蝦、白烚蛋等,外加一片青檸俾你自行加酸。顧名思義,撈米粉只有少量湯頭,呢款湯並唔係喇沙湯底,味道更為濃郁,椰香味濃,再加一點酸酸辣辣,多一點青檸香,比喇沙湯更香甜醒胃。米粉吸收晒湯嘅味道,撈埋炸乾蔥、蒜等配料,好惹味。另一樣吸濕大王就係炸豆卜,再加上清爽嘅豆芽菜,非常合襯。蝦的確新鮮爽口,但蝦味略嫌給比下去,而白烚蛋都係平平無奇。

凍甜奶咖啡
套餐配上咖啡或茶,先㨂左個凍甜奶咖啡。聽講咖啡粉係由新加坡送黎,加上甜煉奶,就成為一杯新加坡地道飲品。咖啡香的確有,味道比一般甜,奶味更重,不過同一般茶餐廳咖啡差唔多,無乜驚喜。

咖椰多士 Kaya Toast ($42)

另一份叫左個咖椰多士套餐,包括一份咖椰多士、兩隻半熟蛋同一杯飲品。
咖椰多士隨後送上,似乎係新鮮出爐。外皮烘得乾脆微焦,啡白相間烘得好靚。多士非常鬆脆,咬落索索聲,好熱氣。因為多士唔算好厚,所以請唔好抱住外脆內軟嘅期望,只係清一式脆到不得了已經唔錯。兩片多士中間塗左厚厚一層咖椰醬,再夾起一小片牛油。中間淺青黃色嘅就係咖椰醬,單憑顏色黎睇,幾似香蕉泥,但味道卻充滿椰香。一般新加坡地道做法,係以斑蘭葉、椰奶、蛋、糖煮成,所以除左椰香之外,仲有斑蘭葉嘅清新香氣。多士嘅熱力令牛油呈半溶狀態,與多士、咖椰醬融為一體,甜中略帶一點鹹,甜而不膩,非常討好嘅味道。

半熟蛋
新加坡人早餐食咖椰多士,都會配上半熟蛋,一脆一軟,呢個配搭真係妙。兩隻半熟蛋滑溜係一定的,而蛋香亦非常夠,只需要略加點豉油同胡椒粉,就會發覺,普通嘅食物配上簡單嘅烹調方式,都可以好好味。

甜奶茶
完美嘅早餐,要跟番一杯濃郁嘅甜茶,新加坡嘅奶茶,係出晒名又濃又甜。落單時,職員有查詢過奶茶需唔需要少甜,不過一於少理,反正自問嗜甜,應該唔怕。甜奶茶送到,茶味好濃,奶味亦夠香。攪一攪杯底,就發現甜嘅來源﹕煉奶。奶茶嘅幼滑,略為黏口嘅濃稠度已經好喜歡。濃郁、零苦澀味嘅茶香,再撞上香甜嘅煉奶,實在好討喜。甜,的確略甜,但呢個甜度好令人接受,而且係可以引發開心指數嘅味道。好多網友話,呢款茶即係港式嘅茶走,不過平時飲完又唔見會咁開心,好明顯係甜爺爺嘅原故。

唔講唔知,原來呢間小店唔野小,係新加坡超出名嘅老牌咖啡小店,由一九一九年開業到而家,淨係新加坡已經有超過五十間分店。呢間係香港第一間分店,小店唔大,裝修非常企理清新。以快餐運作,客人先到櫃台點菜,食品隨後由職員送上。雖然半自助形式,但服務一啲都唔差。職員夠多,而且好親切友善。不過星期日中午,人流都唔少,無得慢慢嘆,要嘆就最好揀平日。

呢個中午食嘅早餐,合共一百元正,一個字貴。不過今次過後,相信我已經愛上左又甜又椰嘅咖椰多士,配甜爺爺奶茶。近日成日心思思想翻食新加坡餐,仲諗過不如去一轉新加坡食最地道吧啦。未成行之前,暫定下一個目標係Toast Box。

4/11/2012 12:00

法式燒蛋多士套餐 ($30)
似西多士,多一份蛋香味,加埋牛油同咖椰真係好配!

咖椰多士餐一樣咁好味。

第二次一樣好味,抵繼續支持輕食!