兩個人的浪漫

McDonald’s@馬鞍山
9/6/2016 19:30
31/7/2011 21:00

9/6/2016 19:30

麥記又有新包,今期玩蛋黃哥飯Tastic。

親子蛋有一塊麥香雞扒、薯仔蛋餅,再加蛋黃醬。包就有少少醬油、菇香,整體配搭得唔錯。另一個肉醬蛋牛就麻麻地,肉醬唔見只見番茄汁,牛肉漢堡乾乾地。
31/7/2011 21:00

麥記其實同我好遙遠,通常只會喺佢有新餐單嘅時候,先會開始考慮或者有可能去試一試。相信一年食嘅次數,由零至兩次不等。今次推動我破例探訪嘅,係十八件麥樂雞餐! 考慮左好耐,最後喺佢生命結束之前嘅一星期去食。真係好難得,所以要寫低。勁呀,為麥記寫評呀!
今次推出十八件雞餐,有蒜蓉辣椒、蜜糖芥末、芝士、芝麻四種醬。($38)

其實麥樂雞都係粉包雞肉嘅現成貨,只要炸得好,控油技巧掌握得到,呢件雞絕對唔難食。夜晚九點時份,呢間分店嘅麥樂雞都係新鮮熱辣,好脆口,更欣賞佢唔油膩,唔會一咬成啖油唧出黎,唔錯呀。

可能早前食過幾家貴價薯條,覺得麥記嘅薯條實在無得比,幼弱嘅薯條唔洗希望食到有薯仔味,只求炸得乾身,夠香脆就交足功課。

蒜蓉辣椒﹕酸辣嘅泰式辣醬,有濃郁蒜味。酸酸辣辣始終都係襯泰式小食,沾下蝦餅、春卷咪幾好,學咩人襯雞?!
蜜糖芥末﹕甜甜酸酸,非常開胃,亦好襯麥樂雞,係眾人最愛口味。但總覺得唔夠芥末味,甜酸味過勁
芝士﹕食到有洋蔥、煙肉味,幾似忌廉芝士味,但好肥膩,食兩、三件已經好膩
芝麻﹕有醋酸味嘅芝麻醬,似shabu shabu食牛肉嘅芝麻醬,如果多幾粒白芝麻相信會更香

四隻味之中,個人最鍾意芝麻味,但點都唔夠最普通綠色嘅甜酸醬好食。同其他人嘅意見一樣,都係甜酸醬先最襯麥樂雞。

聽聞有唔少朋友試過一人食晒十八件雞,食唔過十件已經相當辛苦,十八件簡直係玩命。 高登仔仲出埋挑戰十八件雞嘅全攻略,如此認真。佢地話早前出過九件雞,今次出十八件雞,相信下次有機會見到三十六件雞,大家要努力備戰。
因為只想試味,所以選擇兩個人小試一個套餐當宵夜,幾浪漫。

KFC新餐

KFC@馬鞍山
27/3/2016 18:30
20/8/2015 20:30

27/3/2016 18:30

大阪燒脆雞雞皮本身係脆辣雞走辣版,上面加左大阪燒汁、清新沙律醬、木魚片。二人餐優惠$65。
20/8/2015 20:30

上回講到,食完餐好睇好食但唔飽嘅,要搵宵夜。見2185個0嘅出左新包…(包??) 就當宵夜食啦。一個雙層雞扒軍艦餐$36.9,有一個雙層雞扒軍艦、墨西哥脆脆配特濃芝士醬、同中汽水。

兩塊家鄉雞扒夾住煙肉同芝士,賣相一定唔及廣告咁靚,份量細細舊。兩塊雞扒都足料嘅,新鮮熱辣,好多汁,味道都係咁啦。芝士同煙肉,再加埋沙律醬,味道係正常,但入口好膩,真係唔洗多食。

Euro go go

Euro go go@沙田
25/3/2016 15:30

黎沙田食下午茶,試下Euro Gogo簡單快捷。

  

三式薯皮 $42
有煙肉芝士、蒜香雞、吞拿魚,焗得幾香,配料都幾多,加茄汁唔錯。加$9跟餐茄湯通粉,但比較淡口。

法式薯蓉焗田螺 $40薯蓉好軟綿

千島海鮮Pizza 半份 $45
醬料夠多,海鮮落得足料

Triple O’s by White Spot

Triple O’s by White Spot@沙田
21/4/2014 14:00


Triple O’s by White Spot@灣仔
16/12/2012 20:00

第二次食Triple O’s by White Spot,又有團購,$25買$50現金券。

煙肉芝士漩漢堡套餐 ($78,團購價$53)
牛肉漢堡、煙肉、芝士、生菜、蕃茄。

燒牛肉漢堡套餐 ($78,團購價$53)
薄切牛肉加蛋黃醬、辣根汁。

麵包新鮮鬆軟熱甜,漢堡肉味濃又多汁,醬汁亦落得重手,加埋一大塊酸瓜,正。

薯條連薯皮裝得滿滿,每條都粗度十足,外脆內軟,粉粉腍腍,有薯仔味。仲好就係樽裝茄汁任唧唔嬲。