遇上本港第一沾麵

麵鮮醬油房 周月
21/10/2019 13:00
4/1/2015 14:00
一直都知周月沾麵非常出名,但由於實在太遠太唔方便,開左咁耐都未黎。趁今日要去堅尼地城,就去朝拜一下,果真遇上我最喜愛的沾麵。

周月拉麵 ($85)
醬酒湯勁濃,有好強烈蝦、魚干味,濃得有點似蝦子麵。其實味道真係唔錯,就一如網友所指,油多得可怕,望落真怕怕,但入口又唔覺得點。加上細蔥,湯底非常香。呢個可算係試過最強嘅醬油湯,試過就知個人都係獨愛豬骨湯。直身拉麵幼滑,煙韌度可以,只略嫌唔可以要求加硬版。厚切叉燒,原來係鹿兒島黑豚肉,經過炭烤,燒烤味相當吸引,六四肥瘦不錯,肉味非常香甜。溏心蛋味道夠濃,中正喜歡嘅口味。

沾麵 300g ($85)
就飲一口沾汁,真係濃到打冷震。湯底味道勁濃,有好香魚干醬油味,濃得黎加上少許醋酸味,絕對唔覺得油膩,蔥花亦為湯底強烈加分。但都係見到厚厚一層油會覺得怕怕。湯底內有叉燒粒,浸透左長時間嘅叉燒,除左炭燒味外,已經充分滲入醬油味,非常唔錯。自家製粗麵又係相當唔錯,十級煙韌,真如網友所講,達日本頂級拉麵八成水準,如果蛋、麵味加強就更加好。拉麵夠乾身,飛水功夫的確做得唔錯,但要求嘅凍麵,未到想像中咁凍。最後加入清雞湯,雞味相當濃,沖淡左沾汁嘅濃烈,加上雞肉鮮味,仍然係一碗好好味嘅湯。

是此朝聖等位用左十五分鐘,算非常快。但一入場就被一杯暖麥茶嚇親,好彩要求之下,店員都提供勁多勁凍嘅冰,一杯超凍冰水先係配拉麵嘅王道。的確,呢度嘅沾麵值得一再回味。好有大阪阪急下食到嘅沾麵嘅感覺。

麵屋武藏二天

麵屋武藏二天

麵屋武藏二天@馬鞍山

20/10/2019 12:00

閒時食個新午餐,都會黎二手食個拉麵,平日午餐仲跟埋飲品,價錢都合理。

二天炸雞豬扒拉麵 $75
有齊炸雞同炸豬扒,試晒兩樣,炸物脆脆地,炸皮唔算厚,不過浸左湯淋晒了。浸底係豚骨湯,清清地,唔太濃。拉麵唔算硬。個人就鍾意重口味同硬麵多啲。反而溏心蛋有驚喜,半熟都入味。ok!

二天沾麵 $78
都係相當嘅配搭,炸物無沾過湯明顯香脆左,好味左。沾汁味道更濃,揀左魚介湯都食得出魚介味。麵條係粗身,都幾掛湯。沾麵明顯好食啲。

番茄叉燒拉麵

當然比唔上出面嘅拉麵名店,味道算正正常常,貪佢近近地,平平地。

拉麵Jo

拉麵Jo

拉麵Jo@銅鑼灣

14/10/2019 13:00

今日黎到銅鑼灣做野,做完野經過拉麵Jo,可能係時間較晏,唔洗排隊,就決定食個Late Lunch。

揀左特製沾麵

賣相吸引,份量都算好多。一碗熱熱嘅沾湯,豚骨湯好濃郁,帶魚介香味,湯較為杰身黏口,係我喜愛嘅味道同口感。揀左要冷麵,麵底口感好煙韌,個人偏愛硬麵正好合適,麵條亦相當掛湯,整體配合得不曾。大大塊五花肉,肥瘦分別,入口都算相當腍,浸一浸湯會更加好。另外配上一隻半熟溏心蛋,蛋白有少少裂左,外型有扣分,但入口好嫩滑,亦充滿住醬油味。最後將紫菜浸落湯,包住拉麵一食齊。最後再加湯飲晒成碗湯,非常飽足。

拉麵Jo@尖沙咀

9/7/2017 12:00

特製沾麵 $104
湯夠熱,魚介豬骨湯味濃
麵正常煙韌、稍冷
叉燒係正花腩脂肪入口即溶
整體唔錯
一龍拉麵

一龍拉麵

一龍拉麵@馬鞍山
8/9/2019 19:00

近來幾鍾意黎呢個新場,有好多兒童遊樂空間,放完電一輪再食埋晚飯先返歸,今晚選擇呢間幾有日本風味的拉麵店。店面細細,全counter座,可以睇到成個煮麵的過程。無估到店仔細細都準備左小朋友餐具,非常細心。

灸燒叉燒拉麵 $66
價錢唔貴,份量都唔少。最欣賞湯底非常幼滑,忌廉咪,豬骨味算濃,但唔油膩,幾岩口味。叉燒本身口感亦係不錯,即場用火槍灸燒,多再一陣微微焦香。溏心蛋熟成度適中,可惜麵底略為腍少少,個人較鍾情日本的硬度。

香煎鰻魚拉麵 $88
非常創新的砲搭,特製龍蝦湯配鰻魚,材料真係超大方,相信係整整一大條鰻魚,非常滿足。湯底非常濃厚,配上拉麵條非常掛湯,啖啖都食到蝦香。

餃子 $22
新鮮熱辣,外皮脆脆的,不錯。

玉子燒 $25
四大件玉子燒,大大件,入口有蛋香,味道幾香甜,略嫌實淨左少少,不過呢個價錢的確好抵食。

一間由青年人打理的小店,細心製作,價錢抵之餘,質素係相當ok,當然仍有進步空間,總算值得一來。

豚道樂

豚道樂@黃埔
9/6/2019 12:00

今日決定黎黃埔行下,入到黎九號水產搵食。點知好多都未開門,定係已結束營業。就係門口近近地搵間拉麵食,點知有驚喜。最開心係拉麵店有BB櫈,岩晒我地呢啲一家大細出門。

特上原味豚骨拉麵 $85
先呷一口湯,勁濃,勁甜,好香豬骨味,質地仲好滑好忌廉咪。麵底揀左幼直麵,需要硬度略為未做到。特上有好多片叉燒,真係非常多,叉燒經過燒烤,表面微焦,多一份炭香味。半隻溏心蛋醬油味幾入味,蛋黃半熟,剛剛好。仲有紫菜等配料,非常豐富,味道也不錯。

特上海老湯拉麵 $98

另一款海老湯拉麵係假日限定,湯底係豬骨嘅基礎下,再加入海老,味道更加濃郁鮮味。特上配料同前一款相同,因為海老題,再加上一大把櫻花蝦,多一個香脆口感,非常不錯。呢碗要求加上辣醬,更可以帶少少辣味提香,加得正確。

難得帶埋小B都可以嘆拉麵,可能係久違了的拉麵的味道,呢餐覺得份外好味。
Bookmark一下先。