31/12/2025 16:30
預約左下午四點半包車去高雄機場，單程NT$1,000。
去到機場見到長長嘅Check In人龍，件件行李要即場過X-Ray檢查，最後足足排左個半鐘，5點半先入閘。還好過關流程非常快，入到禁區仲有少少時間行下免稅店，買左好多Hello Kitty伴手禮，開心。候機機一邊仲有一個兒童遊樂區，小朋友可以畫板印畫，畫左好多海洋生物，可以消磨唔少時間。
回程坐CX459 19:25 – 21:10。兒子餐係香腸配炒飯，仲有餅乾。正常餐係台式雞飯，味道還好。返到香港，約定福得的士返歸，結束今次高雄墾丁之旅。
手信一大堆
打狗餅就好似鳳梨酥，非常好食。
31/12/2025 16:00
是次高雄入住福容倈旅，絕對五星好評。
三晚入住閱旅二中床房，每晚房價約$800。另加兒童同床附加費每晚NT$550，幼兒同床免費。
福容大品牌，倈旅年輕線，酒店非常新淨。酒店大堂細細，裝修時尚，整體簡潔又企理。一入到房直頭嘩一聲。一個大玄關，旁邊仲有茶水位置，大大個鋅盤枱面。進入卧室範圍更不得了。兩張二人床，除左書枱閱讀區，仲有一張大梳化加小餐枱，空間感十足。房內叉電位都非常充足，WIFI不錯，仲可以睇NETFLIX。廁所空間大，設備新，個人用品齊全。入房。
酒店每天仲送贈汽水、咖啡、茶包、零食、綠豆酥。幼兒入住可要求加裝床欄，讚!
下午至晚上時段，住客仲可以免費到餐廳享用零食、果汁、咖啡等。我地最鍾意買外賣上黎食，坐得舒適，又可以飲下野。
位置就係前金捷運站一分鐘腳程，方便到不得了。
是次入住是非常讚，性價比高，值得再試下呢個品牌其他酒店!
31/12/2025 14:00
去機場前係酒店附近閒遊，去左舊振南餅店、金格長崎蛋糕。
TOM’S WORLD 玩左一陣機動車，非常抵玩。
娃娃兵親子樂園出貨率不高，志在參與。
行到四點多就返酒店準備出發。
31/12/2025 13:30
回程時用UBEREAT叫定外賣送去酒店。臨走一餐食前金名店鴨肉珍，必試三款招牌台式美味。
鴨肉飯 NT$95﹕啲鴨肉片鋪滿喺白飯上面，淋上一勺金黃油亮嘅鴨油醬汁，鴨肉本身嫩滑多汁、肉味濃郁，鋪得薄薄一片片，咬落軟腍入味唔韌，仲有香甜肥美膠質豐富嘅肉燥，白飯撈勻吸滿晒鴨油醬汁，鹹香惹味。
鴨肉冬粉（湯）NT$85﹕湯色清澈，金黃鮮甜，味道香甜。冬粉晶瑩通透，爽滑彈牙，每條都吸滿晒鴨湯精華。
鴨肉冬粉（乾）NT$90﹕冬粉撈到條條分明、油潤亮澤，掛滿晒香濃醬汁，冬粉爽滑彈牙、滑溜順喉，每條都裹住一層惹味醬汁。
31/12/2025 10:00
酒店步行幾分鐘去前金站搭60號巴士，直達科工館，全程約20分鐘，NT$12。
呢度係台灣最具規模嘅應用科學博物館，又好玩又有意義，非常適合親子遊。門票成人 NT$120。第一站係最岩小朋友嘅「Fun城市展示廳」(體驗設施NT$30)，絕對係細路嘅最愛，呢個展區就係一個迷你版嘅真實道路世界，小朋友可以揸電動車仔行喺真實比例嘅模擬街道度，沿途仲有紅綠燈、斑馬線同交通標誌，時間短短，但都非常好玩。博物館各層唔同主題，空間感十足，設施都幾新，互動感強。玩到差不多一點離開。
![2025 高雄墾丁之旅 [6.1 小籠包早餐]](https://www.letseatoutdiary.com/wp-content/uploads/2026/04/img_5365-1080x675.jpg)
31/12/2025 09:00
UBER外賣早餐
石一籠湯包 中都店
高麗菜煎餃 NT$120﹕底部煎得金黃酥脆嘅煎餃整齊排列，底部脆，皮嘅上半部分就保持住軟韌嘅口感，配埋入面餡料嘅肉汁，一口咬落去肉汁即刻流晒出嚟，餡料鮮甜多汁。
蝦餃 NT$125﹕蒸蝦蝦，皮薄多汁。
蔥油餅 NT$75﹕餅皮煎得層次分明，外層香脆，內層就帶有韌性，每咬一口都感受到千層嘅鬆軟餅香，最正係滲透喺每層餅皮入面嘅蔥油香氣。
牛肉捲餅 NT$175﹕薄脆嘅餅皮包住大量嫩滑嘅牛肉片，牛肉明顯醃製得好到位，帶著香料嘅惹味同肉質本身嘅鮮甜，配埋爽脆嘅蔬菜同秘製醬汁，醬汁嘅鹹甜平衡得啱啱好。
小籠湯包 NT$110﹕薄薄嘅湯包皮透出裡面滿滿嘅湯汁，肉餡鮮嫩緊實，完全無腥味，配埋薑絲同鎮江醋味道不錯。
早安美芝城 三民漢口概念店
混蛋蘿蔔糕 NT$75﹕蘿蔔糕煎得兩面金黃，外層酥脆得嚟帶著迷人嘅鍋氣香，一口咬落去外脆內軟，蘿蔔嘅清甜同米香即刻喺口腔散開，加埋打散嘅蛋液一齊煎，蛋香完美包裹住蘿蔔糕。
培根蛋餅 NT$59﹕薄脆嘅餅皮煎得剛剛好，包住煙韌嘅蛋同幾片香氣四溢嘅培根，食落鹹香帶脆，配埋嫩滑嘅蛋，口感超級豐富。
