2018東京家庭樂 [4.4 台場周遊]

15:45 離開Divercity就轉場去富士電視台,途中紫凝BB已經訓左了。免費入場都係周圍參選下。地下有好多劇目嘅展示版,都可以上五樓平台,仲有One Piece船頭同專門店。


 

16:15 簡單行過電視台就沿天橋行去台場站,還好無乜落雨可以慢慢行。經過自由女神像,影埋彩虹橋。
 

黎到Aqua City都係好多品牌連鎖店。好快就轉場去Desks。呢邊比較多野岩睇。六樓就有Legoland、蠟像館。四樓台場一丁目商店街、昭和時代嘅舊店舖一條街,賣得式精品。章魚燒博物館其實係一個美食廣場全部都賣章魚燒。

繼續有西松屋、Daiso,掃貨掃左好多家品零食,共洗¥1728。
慢慢行都行到六點幾,又係時候轉場了。

2018東京家庭樂 [4.2 青海Toyota]

台場其實好大,海鷗線沿線每個車站都有景點。就知道今日會落雨,所以特登呢日先黎台場,可以商場接商場,都唔會太辛苦。就因為落雨,所以決定取消參觀船科學館,十一點黎到青海站,一出門站就見到Venus fort,旁邊就係Mega Web入口。
Mega Web有好多車睇,有劃時代嘅科技車、有跑車、普通房車。男士就好識欣賞,免費入場一睇無妨。

 

十二點半行番出商場時,唔覺意發現BB百貨天堂西松屋,即刻入去掃貨。買左零食飲品,必買游泳用品泳衣水泡全部入手,總共消費¥4940。
臨走時搵到Toyota History Garage,感受「汽車歷史」的展區。展示左豐田在世界上首輛汽車、修車工房,成個展區都係懷舊街,影相不錯。  
 

行到一點半左右轉場,之後就搭台場彩虹巴士,免費行勻成個台場,非常正。

2018東京家庭樂 [4.1 冬甩先生早餐]

黎到第四日行程,今日hea遊台場,所以可以去遠少少食早餐試下其他野。台場一日遊主要交通工具係百合海鷗線,由酒店行上百合百合海鷗線真係零距離,出左大門口上電梯就見到入口。

首先入手百合海鷗線一日券¥820,一日搭到三程已經回本。既然已入口車票,第一站就去新橋食早餐。今日嘅早餐可算好即興,就係新橋車站附近搵食,一出早站就見到好多立食烏冬店。行遠少少黎到Ginza 9有一間Mister Donut。
 

九點半黎到店舖剛開門,小店細細間總算大把位任坐。有冬甩、有熱狗早餐,各叫幾樣黎試下。

任選一個圈型冬甩ポン・デ・リング,加一青森縣產100%富士蘋果汁(¥308),冬甩入口煙煙韌韌幾得意,面層有少少糖醬脆脆地。另外加左士多啤梨味ポン・デ・ストロベリー (¥129),カスタードクリーム (¥129)。蘋果汁真係好蘋果,不錯。
熱狗連果汁¥588。叫左兩隻芝士熱狗,真係新鮮即整熱辣辣,麵包係酥酥地,腸仔超長,外皮脆內面多汁,芝士亦勁多,非常好味。反而熱狗比冬甩更加突出。另外叫左一隻肉醬芝士熱狗,有多啲番茄醬帶少少辣,更加惹味。臨走老豆想試埋ココナツチョコレート(¥129),就係無乜特別好普通。
 

食飽飽就去番車站,向台場出發。經過汐留仲見到宮崎駿大鐘。

2018東京家庭樂 [3.8 東京迪士尼樂園夜間場]

20:15 巡遊完左返去夢幻樂園,橫掂未夠鐘可以玩下白雪公主冒險旅程。呢個係人稱唔抵玩嘅設施,見排隊5分鐘可以參觀一下。都係坐車仔睇故事,如其他人所講,係恐怖白雪公主,佢遇上咩恐怖女巫,音效環境一啲都唔童話,仲恐怖過幽靈公館,時間又短,真係唔值得特登排隊。
20:25 黎到公主城堡前,點知聽到令人失望嘅廣播,真係今日煙花暫停。點解呀,明明今日咁好天,真係百思不得其解。可算係本日最失望之處。
20:30 最後一站去埋仙履奇緣童話大廳參觀。搭Lift上去,室內佈置係仙履奇緣皇宮,有立體圖、場景模型等,中間仲有玻璃鞋同皇座,行一個圈好快睇完。

 

完成一日迪士尼之旅,玩得非常盡興,排隊絕對係可接受時間,睇足三場巡遊,只係無得睇煙花比較失望,如果唔係真係十年唔洗再黎。

  

22:30 返到汐留,喺附近嘅7-11掃貨,買宵夜,中華冷麵都唔錯,仲買左啲綠茶慕絲同雪條。
 

2018東京家庭樂 [3.7 夢之光]

19:15 食飽飽最後衝刺係夜間巡遊前玩埋小熊維尼獵蜜記,拎到FP,又可以跳過長長人龍,慳番40分鐘排隊時間。今次可以五人一車,坐住蜜糖罐睇故事,仲不停轉圈,最深刻印象就係中央有個大大舞池,場景好大好靚,十架車一齊轉,實在好熱鬧,記得呢部份香港係無嘅,所以明顯東京呢個好玩好多。

19:30 開始東京迪士尼樂園電子大遊行~夢之光。因為玩完遊行已經開始,所以沿路行睇下邊度有位可以停低,咁岩喺夢幻樂園搵到一個十字路口可以係旁邊睇得相當清楚。

出場序﹕

仙女&士兵→米奇米妮火車→愛麗絲夢遊仙境與貓咪
→花仙子→飛龍→小飛俠海盜船→反斗奇兵
→燈神→阿拉丁→長髮公主→白雪公主馬車→公主舞台
→美女與野獸→冰雪奇緣→三隻小豬→小木偶→小貓布魯托
 

 

  
 
 

夜間巡遊不及日間咁色彩繽紛,但電子閃燈係另一番睇法,花車造型都相非豪華。

2018東京家庭樂 [3.6 紅心女王宴會大廳]

18:30 係時候晚餐,夜晚可以食豪少少,就去紅心女王宴會大廳。門口已經好吸晴,餐廳內裝修更加靚。

修裝都好靚,處處影相位。
 

先去排隊買野食,再自行搵位。呢度賣點係食物賣相一流,而且味道好,的確,睇到菜單實在吸引。

 

メカジキのグリル、トマトケイパーソース 烤箭魚配番茄醬 ¥1110

魚肉有少許實,但番茄醬非常惹味。

シーフードフライ、タルタルソース ¥1210、白飯¥210
有炸蝦、白身魚、帆立貝忌廉薯餅,每樣都好新鮮,香脆但一啲都唔油膩。

 

フランクステーキ、和風ソース 燒牛扒配和風醬汁 ¥1450
燒牛扒即切,粉粉紅紅熟成度不錯,食落都好腍,幾有牛味。配上日式燒汁味道都唔錯。

 

チーズハンバーグ、デミグラス&ラズベリーソース 芝士漢堡配紅桑子醬 ¥1380
漢堡非常軟腍有肉汁,味道不錯,本身有洋蔥番茄醬酸酸甜甜已經不錯,再加紅桑子醬果味更加突出。

 

お子様セット ¥920
賣相得意,有番茄炒飯、迷你漢堡、白汁粟米,薯蓉,仲跟埋果汁同啫喱。味道好,小朋友非常開心。

埋單總共¥6280,環境一流,賣相一流,味道好味,係份量少左啲,但主題樂園有咁嘅性價比已經係超班。