Flames

Flames

Flames@黃埔

10/7/2022 12:00

今日想去黃埔玩,經Openrice搵到呢間餐廳勁多好評,訂位仲有七五折優惠。點知黎到仲有一個更優惠嘅優惠,原來假日叫一份Holiday Brunch就送一份兒童餐。最後買二送二勁抵。

黑松露卡邦尼扁意粉 $108
可以話係食過最好食嘅Carbonara,無懸念。意粉硬度剛好,忌廉味勁重,好香黑松露味,煙肉、雜菌、洋蔥嘅配搭,整體真係好好味。

葡式燒雞扒漢堡配薯條 $128

非常澎湃嘅一份漢堡,雞扒大到突番出黎,好吸引。漢堡仲有番茄、生菜等配料。將佢解體,雞扒有辣味,有肉汁,可惜麵包略為乾身。薯條都係非常多,新鮮炸起,脆到不得了。

迷你炸魚薯條配他他醬

迷你?真係迷你?一大碟你話係正常Size我都信。兩大件魚柳炸得香脆,粉漿唔厚,配上偏酸嘅他他醬,好味。

番茄肉醬扁意粉

呢份就合理Size嘅迷你意粉,但味道相當不錯。番茄味濃,肉醬亦相當多。

兒童餐一份原價$68,一個迷你主菜加一個雪糕。細細碗兩個小雲呢拿雪糕球,口感較為黏身,唔似一般平價雪糕,有驚喜。

食物賣相,味道都係非常好,單叫一份Brunch一百零蚊,跟飲品已算非常合理。而家仲送多兩份兒童餐,就真係抵到離晒譜。一定會Encore!

亞玉豆腐花

亞玉豆腐花@黃埔
9/6/2019 14:00

喺黃埔九號水產食完拉麵午餐後,行商場行左一陣,臨離開黃埔食埋個甜品先走。咁岩見到豆腐花都幾多人食,試下先。

熱豆腐花 $9
最開心係黃糖自由任加,想幾要多都得。豆腐花熱辣辣,豆味幾濃,算幾滑身。糖水唔算太甜,加黃糖就岩岩好。紫凝狂食,食左半碗。

凍芝麻糊 $15
另外一款叫左芝麻糊,滿滿一碗,滿到差啲倒瀉。芝麻糊非常夠凍,岩晒夏天熱辣辣食。入口幾杰身,芝麻味道幾濃,有粒粒芝麻,似係自家製即磨,味道唔錯,不過都係豆腐花好味啲。

砵仔糕 $3
客家糍粑 $15/3粒
另外,再買少少手信拎番屋企慢慢食。砵仔糕仔仔個,小朋友份量,豆幾多嘅,唔算太甜。
糍粑脹卜卜,裡面超多餡,係花王加芝麻,味道幾好,個皮煙煙韌韌,薄薄地唔錯。

呢個下午茶唔錯。

豚道樂

豚道樂@黃埔
9/6/2019 12:00

今日決定黎黃埔行下,入到黎九號水產搵食。點知好多都未開門,定係已結束營業。就係門口近近地搵間拉麵食,點知有驚喜。最開心係拉麵店有BB櫈,岩晒我地呢啲一家大細出門。

特上原味豚骨拉麵 $85
先呷一口湯,勁濃,勁甜,好香豬骨味,質地仲好滑好忌廉咪。麵底揀左幼直麵,需要硬度略為未做到。特上有好多片叉燒,真係非常多,叉燒經過燒烤,表面微焦,多一份炭香味。半隻溏心蛋醬油味幾入味,蛋黃半熟,剛剛好。仲有紫菜等配料,非常豐富,味道也不錯。

特上海老湯拉麵 $98

另一款海老湯拉麵係假日限定,湯底係豬骨嘅基礎下,再加入海老,味道更加濃郁鮮味。特上配料同前一款相同,因為海老題,再加上一大把櫻花蝦,多一個香脆口感,非常不錯。呢碗要求加上辣醬,更可以帶少少辣味提香,加得正確。

難得帶埋小B都可以嘆拉麵,可能係久違了的拉麵的味道,呢餐覺得份外好味。
Bookmark一下先。

Beerliner German Bar & Restaurant

Beerliner German Bar & Restaurant
25/7/2017 12:00

黃埔店做Promo,午市套餐買一送一,仲有Haagen Dazs雪糕任食。

德式香腸拼盤配酸椰菜及燒薯

澳洲肉眼扒配鮮菜、黑松露薯蓉及紅酒汁

香辣雞肉沙爹

煙三文魚凱撒沙律

跟飲品及雪糕任食,每份$168,買一送一補加一,即每人$100

4/6/2017 12:30

路經此德國餐廳,好耐無食,見午餐價錢都幾抵。

Lunch Set 前菜、主菜、飲品、甜品

烤茄子卷配古斯米及田園沙律

BBQ手撕豬肉脆薄餅配燴洋蔥及鮮菌 $68
材料夠多,食落幾香,又平,唔錯。

德式香腸拼盤配酸椰菜及香草燒薯 $108

好惹味,脆皮又多汁

 

粟米班腩飯以外嘅選擇,殺你呀

Saizeriya Italian Restaurant
28/3/2016 13:30
26/12/2013 14:00
31/7/2011 13:00

28/3/2016 13:30 @紅磡

白汁野菌雞肉雲吞 $29
雲吞不錯,熟成度剛好,白汁加左洋蔥、芝士粉等,幾忌廉咪,野菌落得夠多。

野菌忌廉意粉 $27
醬汁同前者一樣,正常

水牛芝士比薩 $29

茄醬唔算多,比較淡口,但芝士就落得好重手。

肉醬多利亞 $27
肉醬好味,撈飯一流。

26/12/2013 14:00 @荃灣

31/7/2011 13:00 @荃灣
一個唔知點讀嘅名,係荃灣區出名平靚正嘅意大利餐廳。
星期日中午,一行五人,等位係指定動作,唔超過三十分鐘已經唔錯。

地中海海鮮比薩 ($32)
九吋比薩口感同味道有別於平時食嘅港式薄餅。比薩唔算厚底,但亦唔薄皮,稍為少少脆但較為煙韌,切起黎有點吃力。一般嘅比薩就好似扁左麵包咁鬆泡泡,蛋味較濃。意式比薩小麥味道好香,亦感覺到發酵過嘅風味。比薩面層舖滿煙三文魚、蝦、魷魚,仲有豐富嘅芝士。材料夠新鮮,芝士味濃郁,但稍為結實,做唔到拉絲效果。如果溫度更高,芝士融化得更徹底,相信會食得更開心。

吞拿魚比薩 ($28)
材料充足,每一啖都食到吞拿魚,配上蕃茄醬,酸酸甜甜好開胃。呢款芝士比較重手,味道濃郁,好滿足。

地中海海鮮焗飯 ($28)
出奇地以鐵板上菜,飯面舖滿青口、蜆仔、蝦同魷魚圈等,$28有如此新鮮、豐富嘅材料,真係超驚喜。用鐡板焗令飯有些少焦硬,要撈埋蕃茄汁一同進食。蕃茄汁正有開胃嘅酸味,食欲大增。

香辣雞翼 ($30)
雞翼係餐前小食最佳選擇,雞翼烤焗到金黃色,有刺激惹味嘅辣道,肉質嫰滑,肉汁豐富,小食黎講已經好唔錯。

卡邦拿意大利粉 ($24)
卡邦拿最必要嘅蛋味好充足,味道亦夾雜左雞湯同酒嘅香味。意粉韌度適中,煙肉略嫌煎得未夠香口。芝士味同忌廉口感應該要加倍,惟有自行加芝士粉,撈一撈,搞一搞,豐富一下。

餐廳大,職員不多,客人請自動波。自助型式,冇人幫你斟茶遞水,所以無須加一服務費。
每樣料理,包括九大吋比薩都係大約三十蚊。廿幾三十蚊一款,請唔好要求大大碟上菜。雖然味道講唔上極之好味,但至少合格有餘,性價比係超高。

澄清一點,今次冇用團購。冇任何優惠之下,人均消費只$29。勿論今餐係唔係正宗意菜,但只用一個粟米班腩飯嘅價錢,食到質素OK嘅料理,我都冇說話好講。

一個唔知點讀嘅名,因為試過味道,食過滿意,抵到爛,所以之後請記得佢,佢叫「薩莉亞」。