by admin | 12 月 13, 2025 | Blog, 土瓜灣, 樓上cafe, 法國菜, 甜品, 西餐, 飲品
土瓜灣 13/12/2025 14:00
今日去黎土瓜灣發現呢間幾有特色嘅餐廳，環境闊落，坐得非常舒服，點咗幾樣主菜，樣樣都有驚喜。
紅酒慢煮羊膝 $188﹕賣相勁吸引，一上枱已經聞到好香嘅紅酒味，羊膝炆得非常軟腍，用叉輕輕一篤就做到骨肉分離，完全唔韌，羊味好香。醬汁濃郁，有紅酒嘅果香同番茄香，微微酸甜好開胃，味道同羊肉嘅鮮味好夾。配上意大利飯，索晒啲汁，真係好滿足。
自家青醬天貝意大利飯 $88﹕第一次試天貝，非常特別，原來係來自印尼嘅發酵大豆餅，主要由黃豆製成，富含豐富植物性蛋白質嘅健康食品，豆味非常香濃。青醬味道好清新，羅勒味好出，意大利飯煮到啱啱好，口感外軟內韌，估唔到素食都可以咁好味。
法式海龍皇香煎龍躉柳 $228：龍躉柳煎得外皮金黃香脆，魚肉雪白嫩滑，魚油香氣十足，最好味係法式海龍皇湯底，濃稠度剛剛好，海鮮味非常突出，加上仲有大大隻八爪魚、帶子同蜆，非常豐富。
法式慢烤蘋果 $58﹕吃完主菜，當然要試試甜品。這款甜品賣相非常精緻，蘋果經過慢烤之後，口感變得軟糯綿密，果汁豐富，蘋果嘅天然酸甜味同玉桂香氣完美融合，再仲脆卜卜嘅果仁，味道非常有層次，將蘋果昇華到呢個層次，認真高級。
花果香草茶 $88﹕茶具非常靚，味道又好飲，酸酸甜甜嘅熱情果味好突出，除咗果味，仲有一陣淡淡嘅花香，優雅清新。食完啲重口味嘅主菜之後飲呢杯，真係即刻解渴又開胃，感覺好舒服。
燕麥鮮奶咖啡 $42﹕用咗燕麥鮮奶嚟沖，奶泡打得好綿密，入口好滑順。咖啡豆嘅味道幾香濃，有少少果仁味，同燕麥奶嗰種獨特嘅麥香味好夾，飲完個口仲會留有少少甘香，非常不錯。
總的來說，幾道菜式都做得好有心思，一個好適合悠閒周六嘅好去處。
by admin | 6 月 21, 2025 | Blog, 小食, 尖沙咀, 法國菜, 西餐
尖沙咀 21/6/2025 13:00
上次同最佳飯腳去過嚟沙田呢間時尚法國菜餐廳食早午餐套餐，食過翻尋味，今次encore尖沙咀分店！繼續來個Weekend Brunch，有齊頭盤、主菜、飲品，仲可以追加甜品。
炸辣蟹球：外層炸至金黃酥脆，切開中間係滿滿忌廉內餡，內餡以嫩蟹肉為主，搭配綿密嘅薯蓉，帶鮮甜蟹香，濃厚而不膩，帶丁點辣味提鮮，夠晒惹味。
煙三文魚拼盆 +$25: 煙三文魚啖啖海味，啖啖煙燻咸香味。手工製作嘅酸種麵包外層烤至金黃酥脆，天然麥香味道香甜。雅枝竹蘸醬味道濃郁，帶橄欖油香氣，配搭煙三文魚非常清爽。
澳洲牛胸腹扒 $175: 牛扒表面輕微烘烤至金黃微焦，已經預先切開，側面透出啖啖粉紅色，熟成度非常精準。牛肉肉質柔嫩，輕輕帶點咬勁，依然保持到豐富嘅肉汁。啖啖濃郁嘅牛肉香氣，肉味鮮甜加上微微油脂香。不經過度調味，係原汁原味。再簡單加幾粒海鹽提味，更加好味。燒薯粒味道香濃，醬汁香甜，火箭菜新鮮帶苦。
盲鰽魚海鮮鍋 $170:盲鰽魚外皮煎得焦香酥脆，肉質爽滑，魚肉香甜。黑青口同蜆保留著海鮮本身嘅鮮甜味，飽滿鮮甜。海鮮濃湯汁海味香濃，甜甜地，用魚肉沾汁襯托出魚肉嘅鮮嫩。
黑松露水牛芝士 $85﹕黑松露水牛芝士層次十分豐富。水牛乳有濃郁奶香，係自然嘅甜奶味，口感柔軟絲滑。黑松露濃烈嘅香氣，與芝士形成對比。下面放左新鮮番茄，清爽香甜，整體配合清新又輕盈，非常好味。
榛子朱古力醬煎香蕉可麗餅 $48﹕賣相好靚，呢款經典法式甜品，可麗薄煎得夠薄，仲暖笠笠，上面有一層厚厚嘅Nutella，味道勁香甜，仲有香蕉片，香蕉面層有脆卜卜嘅焦糖。蛋有驚喜。
Latte +$18：有靚靚嘅拉花，咖啡原本味道香濃，口感滑溜，鮮奶咖啡比例適中，唔使加糖已經好好味。另外仲有一塊Lotus焦糖餅乾，暖暖又甜蜜。
抹茶青蘋果特飲 $20﹕抹茶底加上青蘋果汁同檸檬嘅配搭，酸甜適中，非常清爽開胃。
全單$606，非常豐富，同閨蜜來一個周末午餐約會。對比上次餐牌轉左唔少，但感覺驚喜度無咁高。
by admin | 3 月 22, 2025 | Blog, 沙田, 法國菜, 甜品, 西餐
沙田新城市廣場 22/3/2025 14:00
星期六獎勵自己，同閨蜜過嚟沙田呢間時尚法國菜餐廳食早午餐套餐。有齊頭盤、主菜、飲品，仲可以追加甜品，實在太豐富。
炸黑松露蘑菇球：外層酥脆金黃脆卜卜，輕輕切開就聞到陣陣黑松露香氣，內裡係嫩滑綿密濃郁嘅菌菇餡料，黑松露味非常香濃。
法式三文魚醬配酸種麵包 +$25: 手工製作嘅酸種麵包外層烤至金黃酥脆，散發著天然麥香。三文魚醬勁豐富，啖啖魚肉，海味香濃，仲有好香嘅洋蔥味，係一道非常清爽嘅前菜。
烤龍蝦燴飯 $225 ：賣相太靚勁豪華，半隻龍蝦以芝士，忌廉汁烤焗，龍蝦非常鮮甜，啖啖肉。意大利燴飯味道香濃，每嚐一啖都充滿龍蝦香味同番茄味，飯粒保留住彈牙口感。
阿根廷安格斯肉眼牛扒 $205: 牛扒表面輕微烘烤至金黃微焦，紋理細膩。切開中間呈現粉紅色，最喜歡呢個熟成度。油花分佈均勻，肉質柔嫩，依然保持到豐富嘅肉汁。按個人喜好搭配特製忌廉肉汁或簡單加幾粒海鹽提味，已經好好味。薯條啖啖薯肉，沾一沾酸酸甜甜嘅蕃茄醬，非常滿足。
白蘭地大蜆鍋 $85：呢道菜最有驚喜，每一粒大蜆保留著海鮮本身嘅鮮甜味，中蜆又夠飽滿，味道甜甜。白蘭地忌廉醬汁味道相當清爽，襯托出蜆肉的鮮嫩。
巴黎式芝士蛋糕 $48：賣相好靚，呢款芝士蛋糕係暖笠笠，面層有脆卜卜嘅焦糖。蛋糕質地香滑軟綿綿，非常濕潤，除咗蛋香味同芝士味仲有好濃嘅水蜜桃味，相信中間加左唔少果肉，每啖都香甜又爽口。幾片無糖水蜜桃更加精彩，鮮甜再加丁點焦糖嘅甘苦味，完美。
Latte +$18：兩杯都有超靚嘅拉花非常值得打卡。滑溜嘅鮮奶同濃郁香醇嘅咖啡完美融合，每一啖都好順口。唔使加糖已經好好味。另外仲有一塊Lotus焦糖餅乾，暖暖又甜蜜。
全單$686，非常豐富，真係多謝好友萬歲。用餐環境舒適，好適合同閨蜜來一個周末午餐約會，慢慢嘆慢慢傾。
by admin | 8 月 7, 2024 | Blog, 大埔, 法國菜
太和中心 7/8/2024 12:00
第一次食法國菜慶祝生日。原來喺太和邨過條馬路就到。餐廳門口有座古典鋼琴，神秘嘅玻璃門打開，一入去就見到一個好靚嘅酒吧枱，裝修都幾有格調。相信係店主先生非常友善，有求必應，服務不錯。
午市4道菜套餐 $388
先來一份黑糖麵包，麵包暖笠笠，加上黑松露牛油，非常好味。食餐包都用上名貴嘅靚碟，實在太有格調。
前菜：乾式熟成澳洲和牛他他 （+$68）：又靚又高級嘅碟呈上，半生熟牛肉加生蛋，牛肉好甜好滑，應該加咗醋，大輕微酸味，非常開胃。加埋蒜蓉包住一齊食，更好味。
煙三文魚有機沙律：非常靚，好似玫瑰花咁，煙三文魚香甜鹹鮮味，加上蔬菜好清爽。
餐湯：法式澳洲活龍蝦湯（+$48）：用忌廉造成拉花，仲有有泡沫，賣相靚。龍蝦湯非常濃郁，好鮮甜，仲食到有啲唔知龍蝦定帶子肉，好新鮮。
澳洲M9和牛小排 （+$68）：七成熟牛扒大大塊，肥瘦適中，但略為熟咗少少，口感略為煙靭。
乾式熟成紐西蘭法式羊仔架 （+$68）：擺盤非常靚，羊架三大件，熟成度剛剛好，肉味香濃，肉汁非常豐富。值得一提配菜除咗有薯蓉之外，仲有一個紫薯蓉球，非常之香甜。
甜品：原隻海膽雪糕 （+$48）：非常之浮誇嘅上枱方式，煙霧彌漫之下見原隻海膽，雪糕味道非常甜，有好香嘅奶黃蛋香味，唔知呢個係咪就係海膽嘅味道。
Tiramisu賣相一流，口感幼滑濕潤，咖啡味香濃，相當不錯。
另外加配一個比利時朱古力心太軟 $118: 慶祝生日，餐廳特意寫上Happy Birthday，擺盤非常靚。心太軟外脆內軟，切開中間朱古力將爆曬出嚟，非常澎湃，朱古力味好濃郁。仲有唔少生果陪襯。
食物賣相非常精美，連餐具都好靚，味道相當好，非常享受整個用餐過程，第一次試正宗嘅法國菜。埋單約$1400。
