好味炸雞拼波波球

好味炸雞拼波波球

雞吧@石門

16/8/2022 17:00

今日黎石門玩到黃昏時間,買啲野食加餸先。一期就見到呢間主打炸雞嘅外賣店。一於試下。炸雞都有好多口味,突然選擇困難症,將呢個重任交俾女女。

半半炸雞L size $138

最後直接買大盒雙併,滿足貪心之人。小朋友揀左蜜糖牛油同車打芝士,每款有八件雞。雞新鮮炸起,脆卜卜,炸漿唔算多,最好係唔油膩,咬開中間肉質好滑,仲保持到肉汁,有驚喜。蜜糖果款蜜味好夠,脆皮吸收晒蜜糖,好夠甜。另一款係配上一大盒車打芝士醬,非常杰身嘅芝士醬,芝味極濃。

意式香草肉丸 $36×2

另外叫左兩份肉丸俾小朋友。十幾粒肉丸好澎湃。豬肉丸本身都好彈牙又有肉汁,醬汁係燒汁,小朋友都鍾意食。

雙色芋泥圓併地瓜球 $36

一盒有六大粒,粒粒都圓轆轆。外皮香脆,中間煙煙韌韌,包住甜甜嘅芋泥。另一款係一咬爆漿嘅地瓜球,蛋黃流沙唧晒出黎,有驚喜!

細細間店仔,充滿住炸雞嘅香味。拎到番屋企仲係新鮮熱辣,炸雞同兩款小丸子都風味十足。今次石門一行有意外收穫。

靚靚日西料理

靚靚日西料理

Sensu@太古
7/8/2022 12:00

為慶祝生日,book左呢間好美味嘅餐廳。早排食過沙田店相當不錯,今次黎到太古呢間新店。野外露營做主題,門口就有打卡位。十二點開門原來已排緊隊,人氣甚高,好彩一早book左位,否則實有排等。

黑松露薯條 $48

新鮮熱辣辣,沾上黑松露沙律醬,帶少少酸味,不錯。

焗章魚燒風味薄餅麵包 $98
賣相吸,麵包好鬆化牛油味香濃,加上海鮮配料,估唔到配上日式風味係咁夾。

朱古力咖啡 $48

拉花非常靚,咖啡味濃郁,帶朱古力味,味道平衡。滿意!

靛Indigo $68

期間限定嘅清爽飲品,大愛紫紅色,相當夢幻。有檸檬啫喱,藍色啫喱,西瓜,酸酸甜甜,爽爽口感豐富。

黑松露野菌扁意粉 $108

意粉上面大大單黑松露,香氣十足。意粉軟硬適中,配上黑松露忌廉汁,仲有好多雜菌。

脆脆吉列豬扒芝士歐姆蛋包飯 $148

豐富嘅飯,豬扒大大塊,外皮脆脆的,肉質鬆軟仲好Juicy。滑蛋脹卜卜,切開中間仍保留蛋汁,好嫩滑。據聞採用日本蛋,所以蛋味濃郁,包住中間嘅有味飯,非常適合小朋友。

抹茶提拉米蘇 $88

甜品方面特別出色,呢個提拉米蘇真係非常好味。蛋糕上面有三粒麻糬波波,淋上芝士奶蓋同灑上抹茶粉。切開後見到明顯三層,抹茶、忌廉芝士。入口即溶,充滿奶香及抹茶味。大愛!

食物賣相吸引,都值得相機食先,味道亦相當唔錯,上菜快,服務亦好,值得一試。

Simply Simplylife

Simply Simplylife

Simplylife @ 沙田 31/7/2022 12:00

收到Eatizen有張八五折優惠券,特登出黎沙田食個Sunday Brunch。

$143一set,有餐湯,主菜,仲有冰茶。

麵包專門店嘅麵包都不錯,加上奶香味嘅牛油。餐湯南瓜湯夠濃味,仲有粉粉粒粒好杰身嘅感覺,小朋友勁鍾意。

車打芝士牛肉漢堡配煙肉。牛肉漢堡牛味濃,都保持到肉汁,不錯。薯條新鮮即炸,熱氣十足。

芝士奄列大大件,滑溜溜,中間仲有好多蛋汁。配上薯角,非常飽足。

焦糖香蕉法式多士。多士本身係鬆軟,仲充滿蛋香。香蕉又夠甜。加配煙肉,非常豐富。

質素高,價錢略貴,但今次有八五折,值得!

輕食午餐

輕食午餐

Diamond Blue@沙田

24/7/2022 12:00

今日出石門食個簡單午餐。見呢間有梳化位幾舒服,又有BB椅。

芝士汁焗薯條 ($38)

新鮮熱辣,芝士味都幾香。如果多啲汁仲好。

夏威夷Pizza ($49)

配料主要係菠蘿火腿,芝士都落得重手,Pizza本身都幾鬆化。

墨西哥薄餅卷 ($68)

一件大大件,可以選牛、雞、鴨,選左牛都幾夠腍,加多唔同醬料,味道不錯。

雞扒黑松露燴飯 ($49)

黑松露味道夠,同飯完美撈勻。雞扒就略嫌一般。

餐牌選擇多,小份量,價錢唔貴,可以揀多幾樣。

Flames

Flames

Flames@黃埔

10/7/2022 12:00

今日想去黃埔玩,經Openrice搵到呢間餐廳勁多好評,訂位仲有七五折優惠。點知黎到仲有一個更優惠嘅優惠,原來假日叫一份Holiday Brunch就送一份兒童餐。最後買二送二勁抵。

黑松露卡邦尼扁意粉 $108
可以話係食過最好食嘅Carbonara,無懸念。意粉硬度剛好,忌廉味勁重,好香黑松露味,煙肉、雜菌、洋蔥嘅配搭,整體真係好好味。

葡式燒雞扒漢堡配薯條 $128

非常澎湃嘅一份漢堡,雞扒大到突番出黎,好吸引。漢堡仲有番茄、生菜等配料。將佢解體,雞扒有辣味,有肉汁,可惜麵包略為乾身。薯條都係非常多,新鮮炸起,脆到不得了。

迷你炸魚薯條配他他醬

迷你?真係迷你?一大碟你話係正常Size我都信。兩大件魚柳炸得香脆,粉漿唔厚,配上偏酸嘅他他醬,好味。

番茄肉醬扁意粉

呢份就合理Size嘅迷你意粉,但味道相當不錯。番茄味濃,肉醬亦相當多。

兒童餐一份原價$68,一個迷你主菜加一個雪糕。細細碗兩個小雲呢拿雪糕球,口感較為黏身,唔似一般平價雪糕,有驚喜。

食物賣相,味道都係非常好,單叫一份Brunch一百零蚊,跟飲品已算非常合理。而家仲送多兩份兒童餐,就真係抵到離晒譜。一定會Encore!

靚靚打卡專用西餐甜品

靚靚打卡專用西餐甜品

The Pantry & Chips Republic@旺角

12/6/2022 12:00

小朋友最鍾意食士多啤梨甜品,揀左呢個好多好評嘅餐廳,順便食埋個午餐,再以甜品作結。

The Pantry & Chips Republic的相片 - 旺角

三重芝士薯條$52 薯條好脆,滿滿芝士,又可以拉絲,正。

The Pantry & Chips Republic的相片 - 旺角

芥末忌廉墨汁意粉番茄莎莎 $138 好靚嘅黑白配加少少紅色。份量就唔算多,但餸料都落得大方。魷魚都好多件,忌廉汁為主,加少少番茄酸甜味。

The Pantry & Chips Republic的相片 - 旺角

慢煮手撕豬肉千層麵 $135
即焗千層麵熱辣辣,上面舖滿芝士忌廉汁。切開中間千層麵之間係啖啖手撕豬肉,仲加多唔少酸椰菜,醬汁係香草番茄汁,輕微酸甜,正好解膩,呢個配搭好特別。

The Pantry & Chips Republic的相片 - 旺角

飲品揀左士多啤梨奶昔$52,靚。奶味濃,帶士多啤梨香,夠甜夠凍。

The Pantry & Chips Republic的相片 - 旺角

士多啤梨班戟 $120 一送上已經聞到蛋香味,賣相係靚到不得了,厚厚鬆軟嘅班戟,淋上粉紅乙士多啤梨忌廉,再士多啤梨圍滿邊,靚。班戟空氣感十足,濃濃嘅蛋香,入口即溶。士多啤梨都算甜, 忌廉微甜,好味。
食物靚靚,最好打卡影相,入口都好好食,好食又好睇。咁靚嘅餐廳竟然都係Baby Friendly,有摺疊式但係相當安全嘅BB椅,仲有兒童餐具,讚。