by admin | 10 月 19, 2023 | Blog, 外賣, 西餐, 韓國菜
釜山炸雞批薩
馬鞍山 14/10/2023 18:00
今日買外賣晚餐，小店就喺馬鞍山後街一個唔起眼嘅角落，一入門口就相當韓國感覺，原來老闆同廚師都係韓國人。效率非常高，外賣只需等15分鐘，兩大袋，分量十足嘅外賣新鮮整好。外賣包裝非常之好，仲有手套附上。打開包裝，實在太豐富，太澎湃啦！
五味炸雞 $239
主打韓國炸雞當然要試吓，呢一個五味炸雞，就啱晒選擇困難症嘅人，一次過試齊五種唔同口味。先食原味，外皮脆卜卜，中間仲有肉汁，唔油膩。炸雞仲有加左洋蔥蛋黃醬，洋蔥味濃帶微酸。蜜糖芥末醬更加重口味。甜辣醬好杰身，帶微辣好開胃。個人最鍾意雙重芝味，芝士粉舖滿外皮，好香好甜，芝味十足。
韓式烤肉PIZZA $169
首次試韓式Pizza，賣相好靚仲好大個，餅底有厚度，芝士超多做到拉絲效果，材料豐富，主要係肉粒、火腿粒等，醬汁係甜甜嘅韓式燒烤醬，味道不錯。
炸醬麵 $68
炸醬麵醬汁味道帶甜，配料有薯仔肉碎等，麵條粗粗地有啲似烏冬，口感煙韌，每條麵條都沾上醬汁。
芝士蛋卷 $108
超大份嘅蛋卷，煎得好靚好工整，略為實淨厚身嘅蛋卷，中層夾左芝士，加少少番茄醬美味十足。
估唔到係馬鞍山收埋左一間咁正宗嘅韓國餐廳。味道好，份量勁多。實在係外賣Party Food好選擇。
by admin | 10 月 15, 2023 | 小食, 深圳, 甜品, 西餐, 飲品
深圳筍崗寶能環球匯15/10/2023 16:00
點評夏日嗨吃單人餐 29.9 肉桂提子貝果、蜜核烏龍茶。貝果煙韌韌，肉桂味好多，提子帶點酸提味，不錯。
點評超值雙人餐 49.9 巧克力華夫、蛋香牛肉芝士可頌、膠原爆珠草莓椰、拿鐵。華夫朱古力味相當濃，可以自行加上芝士醬，味道更有層次。最欣賞可頌熱辣辣，本身牛油味香，芝士半溶加牛肉相當不錯。草莓椰奶香味濃，爆珠微酸，口感得意。拿鐵咖啡味濃，奶亦充足。
點評多巴胺司康球禮盒 12元4粒 巧克力、莓莓、雙椰、桃杏。細細粒類似小蛋糕，鬆鬆地，味道不錯，各個味道都食得出。
by admin | 10 月 1, 2023 | 深圳, 甜品, 西餐, 飲品
上梅林卓悅匯 1/10/2023 17:00
已經係口袋名單之列一段時間，終於有空間一試下午茶。
位置都相當多，人亦好多，好多搵到一張圓枱可以慢慢歎。
下午茶特惠1+1，59元
巧克力生乳蛋糕，朱古力味十分濃，微甘。
黑松露巴斯克蛋糕，芝士味濃，餅底脆脆地有D果仁，味道不錯。
飲品草莓烏龍、拿鐵亦係正常發揮。
其實一份下午茶就要近60，拍得住香港價錢，質素OK，但性價比一般。
by admin | 8 月 27, 2023 | 深圳, 甜品, 西餐, 麵包
深圳上梅林 27/8/2023 16:00
過嚟上梅林行街，行遠少少去到商業區，食個好味下午茶。咖啡廳坐得舒服，好適合消磨時間。
小店主打熱香餅班戟RMB58
擺盤賣相非常靚。你去食嘢先得喎，非常適合打卡。熱香餅蛋味濃，熱辣辣相當鬆軟，配上角色水果同埋蜜糖，非常好味。
可可冰淇淋熱香餅RMB 58
大大個雲呢拿雪糕，配上熱辣辣嘅鬆餅，冰火交融，仲有Oreo碎，好食！
賣相相當吸引，非常澎湃。
焦糖瑪奇朵 RMB38
咖啡味濃郁，奶香味重。
by admin | 8 月 20, 2023 | 小食, 深圳, 甜品, 西餐, 麵包
深圳卓悅中心 20/8/2023 16:00
輕奢雙人下午茶 RMB 89
下午茶搵一間坐得舒服嘅餐廳，環境相當舒適有格調。點評買到二人餐優惠，上枱就見到非常之豪華嘅二人下午茶餐。圓形架上邊放上十幾款鹹甜小食及水果，仲配兩杯水果茶，賣相十分靚，實在好呃like。鹹點有吞拿魚多士、三文魚多士等；甜點有幾款小蛋糕及焦糖燉蛋，各樣味道都不錯。啱晒打卡呃Like!
by admin | 8 月 20, 2023 | 小食, 深圳, 西餐
深圳彩田萬佳店 20/8/2023 12:30
今日黎崗廈北一日遊，玩完波波就係附近食Pizza。附近係住宅區，無大型商場，所以都係一般小店，揀左呢個連鎖Pizza店評語不錯，即管試試。主打外賣，但店面都有幾張卡位可以堂食，尚算舒適。係大眾點評搶到超多優惠券仲非常抵食。
奧爾良烤雞比薩 19.9元﹕新鮮出爐熱辣辣，舖面芝士同配料，餅皮鬆化，意想不到好食。
2人必買爆款小吃2份 9.9元、單人專享下午茶 (包一份小食及汽水一罐) 7.9元、加入成為會員再送小食一份
點左唔同款或既小食，薯條、黑胡椒炸雞塊、深海鱈魚條等，都係新鮮熱辣。最好食係炸雞塊，香味十足，外脆內軟仲好Juicy。
最後再扣幾張點評優惠券，全餐只需要大約40元，一家四口食得飽飽。
