2017關西親子遊 第四日 [4.3 夜遊天王寺]

係時候搵晚飯食,Market Place就無乜特別野好食,見時間尚早,橫掂有周遊卡任搭地鐵,決定增遊天王寺行一陣食晚飯。七點黎到天王寺,一出車站就見到新建築あべのハルカス,就係近鉄百貨12F就有好多間餐廳,揀左呢仙台牛舌利久。

柯打左兩個套餐,各¥1650。有湯、飯、沙津、四至六塊燒牛舌。燒牛舌非常腍,入口肉質似牛腩,已經加上鹽、胡椒調味,味道不錯,伴碟仲有少少酸泡菜,配埋一齊食都幾特別。牛肉湯配上大量清蔥幾清甜。番茄燉牛舌幾入味。埋單¥3564,味道正常,但試過就算,唔算太特別。
 
 

八點半食飽就去隔離嘅Q Mall行下Akachan補給。臨走前仲買埋聖誕節特別版Krispy Kreme。揀左兩款共¥550,一款係士多啤梨果醬聖誕老人,另一款係焦糖小鹿,做宵夜不錯。

 

2017關西親子遊 第四日 [4.2 海遊]

下一站大阪港,十二點半黎到先醫肚。搵到一間家庭式烏冬專門店築港麵工房,午飯時間唔算多人,只有幾檯上班一族。小店專門手打烏冬,先去買餐券,再自取食物。搵左一個Mega烏冬(¥1380)、另一個係人氣之選雞肉天婦羅手打烏冬(¥880)。Mega真係大得有點離譜,有齊齊店內炸物嘅所有配料,仲跟一碗大白飯,真係超勁。烏冬幾清甜口感煙韌,唔錯。炸物款式好多,味道正常。另一款係咖哩湯底,非常濃厚微辣,雞肉天婦羅係最好味。

 

之後行去此遊重點海遊館。憑大阪周遊卡可享門票優惠折實¥2100。推BB車入場時可搭升降機,到場後租左個儲物架放野,而館方建議唔好推BB車,所以連架車都寄存係服務台。 

海遊館都好多層,由最高層慢慢向下移動。每層都有唔同主題,動物都好多,最好就係每個魚缸都係落地玻璃,小朋友都睇得好清楚。最吸精係海豚遊水遊得超快,同中間最大嘅太平洋海岸有大鯨鯊,仲岩岩遇上餵食時間,真係好壯觀。
 

黎到必試鯨鯊軟雪糕,原來係波子汽水味。最後一個場館係觸摸區,可以伸手落水池摸下啲鯊魚BB。

 
都行左近兩個鐘,之後轉戰就去Market Place。其中一大吸引力就係新開嘅Legoland Discovery Center,門票要¥2300,但持周遊卡係可以免費入場。其實就唔係好大,主要係放好多Lego俾小朋友玩,仲有Lego場景,玩左一架坐車仔射擊遊戲。另外仲有一架類似飛天魔法車就無玩。最得意就係小小世界,用Lego砌左大阪嘅特式景點。講真如果要俾錢入場其實性價比幾低。
喺Market Place周圍行下,なにわ食いしんぼ横丁昭和街影下相,臨時時坐埋天保山大觀覽車睇夜景。

18:15玩完走人,見時間尚早,增遊天王寺搵食。

2017關西親子遊 第四日 [4.1 大阪今昔]

今日大阪周遊一日,可以晏啲啲九點先出發。第一站想落地下街食早餐,竟然撞中兩月一度嘅地下街定休日,咁惟有去其他地方搵食,諗起南海通附近就有老爺爺芝士蛋糕。由難波City出發,慢慢行去南海通,時間尚早,周圍遊下等佢開門,終於9:30買到新鮮出爐老爺爺芝士蛋糕(¥685)。新鮮出爐真係超級辣手,芝士更香濃,蛋糕鬆軟仲入口即溶。紫凝BB都好鍾意呢。
邊行邊食正式出發。早前喺機場買左大阪周遊卡一日券(¥2500),搭地鐵由難波去 天神橋筋六丁目,大約10點零就到達第一站大阪今昔館。上次黎大阪遇著臨時休館,今次帶埋紫凝BB黎到,仲準備左和服俾佢。原來入館係地下層已經排緊隊,好在人唔算太多,入場前要寄存所有行李 。場館唔算大,只有兩層,高層只係觀景台,仲遇上電視台拍攝。樓下就精彩得多,全部係古時日本生活場景,紫凝BB著住和服,好多人話佢可愛。場內都可租成人和服,實在太熱門了。館內佈置幾寫實,仲有好多小玩意,閒時仲有天氣轉變,感受到日夜轉變,天晴雷暴。

之後仲有部份係模型展示幾有趣。今昔館唔算好大,但影相都花左唔少時間,都幾值得一去。

2017關西親子遊 第三日 [3.4 麵包超人在神戶海灣]

一路圍住神戶塔行,慢慢日落天黑,五點幾到達Mosaic,天橋行過去就到麵包超人博物館。
博物館有兩層,二樓係Playground幾多野玩,但設施都要大個啲先岩,所以無特登俾錢入場。地下係購物商場,有好多唔好類型商店,有飲餐小食、服裝、玩具等。剛好遇上表演時間,排排坐凡睇超包超人同朋友們唱歌跳舞,小朋友仲可以一齊上台玩,氣氛非常好。

商店街內仲有好得意嘅麵包店,真係可以食麵包超人。款式非常多,仲整得好似。買左一款聖誕節特別版¥310,落單時拎相片去俾錢,仲有台戲,職員叫Uncle整包再由麵包爐拎出黎。最欣賞係買一個包都用禮盒裝好,仲有個靚靚袋。麵包賣相就贏晒架啦,中間係朱古力餡,味道正常。咁好嘅包裝同服務,價錢貴少少都覺得值。

六點鐘返番去商場食晚飯,今餐試下神戶名物神戸元町ドリア。柯打兩客,一個海老のイセエビ風味クリームドリア(¥1180),另一個デミグラスハンバーグドリア(¥1180),再叫左一個薯角配明太子醬(¥290)。鍋飯非常熱辣辣,上檯時有點火熱住。飯醬汁比較多,芝士味亦濃,撈埋食都唔錯。漢堡扒味道唔錯,幾有肉汁。埋單¥2862,不過不失。
 
 
臨走前買埋神戶甜品No. 1嘅魔法壺布甸。今期仲出左Hello Kitty特別版,比多少少錢就有靚靚粉紅Hello Kitty壺仔。¥1593有四杯,呢兩晚宵夜有著落。賣相非常靚,面層有焦到盡但未到苦嘅焦糖,布甸奶味、雲尼拿味非常濃,非常幼滑入口即溶。

 

完成神戶一日遊,影埋夜景。行去高速神戶站搭阪神線。其實有地下街但搵極唔見,迫住行露天地方,都幾風。大約八點三終於到站,搭車返大阪。

 

2017關西親子遊 第三日 [3.3 閒遊神戶]

離開三宮區,向海邊方向進發。移動方式可以City Loop或者步行,還好下午時間雨已停,所以選擇邊走邊看。沿路行到ヒステリックジャム,呢間小店位置唔方便,細細間唔起眼,原來係非常出名嘅,仲上過唔少雜誌。買一個焦糖布甸Crepe クレームブリュレ(¥580)。表面非常焦,用匙更敲好響,非常脆。食落甜帶微甘,中間係忌廉醬,奶香味濃,好幼滑,不錯。不過除此之外就無乜配合,略嫌單薄啲,價錢略貴。
 

再繼續向神戶港灣進發,四點鐘終於黎到神戶海洋博物館。入場有優惠,門票只需¥500。細細嘅博物館,介紹航海科技,有好多船嘅模型。川崎世界介紹唔同類型嘅交通,仲有幾架模擬列車可以入去坐下影相。
 

離開博物館,對面已經係神戶塔。五點左右未日落,影一影日景先。

2017關西親子遊 第三日 [3.2 極品神戶牛]

黎到神戶一定要試下神戶牛,今次當俾自己獎勵,就黎豪一次。睇左唔少介紹,好多網友推介呢間Mouriya。早前經網上預約今日兩點。離開車站後,行經商店街就黎到Ikuta Road,真係成條街都係食牛,淨係Mouriya都有幾間唔好檔次嘅分店,今次選擇到Mouriya三宮店。一出電梯就見到呢排獎,證明呢間野真係唔野少。

入到店內睇睇餐牌,職員好細心咁介紹食品,店方除左神戶牛,仲有嚴選但馬牛,質素不差但價錢更加抵食。再可選唔同部位,瘦肉有內腿肉、臀肉等,另外沙朗同菲力就脂肪豐厚啲。職員仲推介可以試下一瘦一肥,感受唔同部位嘅分別。午餐提供優惠套餐,比晚餐平少少。

神戶牛臀肉牛排A5 150g ¥6900
極品沙朗牛排A5 170g ¥7500
揀好牛後,大廚出場,仲循例影張靚相。紫凝BB訓得好林,無口福了。
前面係A5嚴選牛沙朗、後面係A5神戶牛臀肉。一睇啲油花就覺得高級。套餐包括餐湯忌廉湯,沙律,配飯或餐包。碟上已放上調味料,有炸蒜片、海鹽、黑椒、Wasabi。
  
仲有茄子、冬菇、番薯燒烤。要求熟成度Medium,睇住大廚細心煎煮,更加期待。  
 
先黎神戶牛臀肉,入口好腍,肉味濃,非常Juicy。沙朗較多脂肪,真係入口即融,完全唔洗咬,油脂香味更吸引。比較過後,臀肉就纖維比較粗身。其實係唔係神戶牛都唔係重點,反而脂肪較豐厚嘅沙朗,入口即融唔洗咬嘅感覺更加令人回味無窮。
最後用牛油清炒芽菜作結。
此餐連稅後,再用埋店方網頁提供嘅5%優惠券,折實¥14770,港幣過千蚊一餐,除左自助餐外,應該無乜機會,叫做豪一次試試,的確一試難忘。