沙田 3/10/2026 13:00
又來Koka 小野人嘅豐富一餐。
小野人雞肉蘑菇野炊飯套餐即叫即煮，米飯吸滿濃郁嘅雞汁精華，帶有微微嘅飯焦香氣，配搭鮮嫩多汁嘅雞肉同蘑菇；升級嘅每日新鮮沙律菜清爽脆嫩，完美平衡咗飯食嘅油潤感。
各款炭火串燒同樣水準極高，滿滿燒烤香味，加上微辣調味，非常惹味。大漠燒羊肉串外皮微焦香脆且毫無羶味；小野人燒牛肉串肉質軟嫩多汁；燒北海道豚五花肉油脂甘香不膩；燒嫩雞腿肉串外脆內滑；燒椒麻雞腎爽脆彈牙帶微麻。台灣香腸外脆內爆汁，帶有獨特嘅微甜風味。燒牛舌芯串外脆內裏爽彈多；烤滷香肥腸串先滷後烤，外韌內糯且滷香四溢；北海道蒜蓉粉絲大扇貝肉質鮮甜彈牙，索盡蒜蓉同醬汁精華嘅粉絲極之惹味。
最後配上一杯走甜少冰嘅元氣森林水果茶，清新解渴，為呢餐充滿炭火香氣嘅美食畫上完美句號。全單連加一$500有找。
灣仔外賣 14/8/2026 18:00
初戀叉燒半斤 $80: 半肥瘦賣相非常靚，肥瘦相間嘅肉質比例完美，油脂分明。叉燒表面燒到帶有微燶嘅焦香，咬落去肉質極之軟稔肉汁豐富，叉燒頭蜜味十足。超正。
松茸燒鵝叉燒雙拼撈粗麵 $72: 松茸燒鵝皮脆卜卜，肉質嫩滑，咬落去油脂四溢，勁多汁。配埋招牌叉燒，啖啖肉極之滿足。撈粗麵質地煙韌彈牙，索晒惹味嘅醬油同鵝油精華。
燒鵝五寶飯 $80: 五寶飯足料到令人驚嘆，一次過滿足晒所有願望。入面有齊皮脆肉嫩嘅燒鵝、肉汁豐富嘅叉燒、外皮極度香脆咸香嘅燒腩仔、經典嘅紅腸同埋咸香惹味嘅鹹蛋，真係大滿足。
可樂 $6
全單$240，份量多，食物質素勁高質，下次一定再試！
尖沙咀 14/8/2026 12:00
今日午餐嚟到 Ruên 泰越餐廳享用豐盛嘅異國料理。餐廳環境裝修雅致，充滿濃厚嘅東南亞風情，座位寬敞舒適。午餐選擇多，仲可以加配小食、甜品，非常豐富。
紅咖喱配香米飯牛肉 $146﹕烤牛肉鮮嫰粉紅色，賣相唔錯，牛味幾香。紅咖喱汁質地香濃幼滑，椰奶香氣突出，微辣非常惹味，撈飯一流，食唔停口。
泰式濕炒河粉海鮮 $136﹕濕炒河粉海鮮鑊氣十足，河粉質地煙韌滑溜，索晒鮮甜嘅茨汁。配料有新鮮海鮮，包括爽口大蝦、魷魚同青口等，肉質幾甜。茨汁濃稠適中，口感濕潤滑順。
越式炸春卷 $22﹕春卷外皮炸到金黃酥脆，口感極度鬆化。入面包裹住豐富嘅爽脆蔬菜絲，保留咗蔬菜嘅清甜同水份。沾上酸甜開胃嘅甜辣醬，香口惹味。
蟹肉豬肉燒賣 $26﹕燒賣外皮軟滑，肉餡扎實，有豬肉同蟹肉，味道鮮甜。
雞肉串燒 $38﹕串燒燒到外皮微焦，雞肉醃得好入味，肉質鮮嫩多汁，沾上惹味嘅自家製沙爹醬，花生同香料嘅香氣濃郁，甜中帶微辣，惹味程度十足。
班蘭煎餅配椰子雪糕 $38﹕班蘭煎餅味道清香，配搭一球香滑冰凍嘅椰子雪糕，冰感十足，椰味十足。冰火交融，甜而不膩。
芒果糯米飯 $58﹕呢碟經典芒果糯米飯賣相吸引。糯米飯煙韌軟糯，三層係白、藍、紫。淋上香濃嘅椰漿，鹹甜交織嘅風味極佳。配搭新鮮切片嘅芒果，肉質鮮甜多汁、果香四溢，兩者結合出極致嘅熱帶風情滋味。
泡沫咖啡 $28、鮮奶咖啡$28﹕咖啡入口香濃醇厚，口感滑順，奶香為主，咖啡味道唔太濃。
炭燒豬頸肉 $108﹕豬頸肉經過炭火燒烤後，外皮帶有微脆嘅焦香，肉質爽口彈牙且油脂分明。切開見到肉汁豐富，沾少少酸辣嘅泰式醬汁，更能突顯肉質嘅鮮甜。勁正!
全單 $691，高檔午餐，味道不錯。
深圳保利文化廣場 5/7/2026 11:30
想食呢間自助燒烤好耐，成人 82元，小童39.9元，真係抵到爛。自助區好多唔同款式肉類，香腸等。仲有少量扇貝海鮮，調味適中。除咗各款肉類之外，自助區仲提供多款人氣韓式熟食與小吃，仲有芝士部隊鍋、冷麵、拌麵等熱食。餐後仲可以食水果、甜品、蛋糕。全餐質素普普，純以價錢取勝。
深圳筍崗寶能環球會匯 21/6/2026 12:00
今次北上試咗人氣高企嘅「明洞朴代表」韓式自助烤肉。新開業成人只需要59.8元，兒童38元。任點任食100分鐘，準時提醒交枱。
餐廳環境充滿濃厚嘅首爾街頭風，自助區擺滿晒各式各樣嘅肉類，包括招牌厚切豬五花、醃製牛肋骨、雞翼同埋多款海鮮。肉類雪得乾淨企理，refill速度亦都好快。肉類喺鐵板上燒到外皮金黃香脆，油脂四溢，調味唔算太濃，可以自行加調味醬料。除咗燒肉，自助吧仲有大量韓式熟食、炸雞、飲品、雪糕等。
自助落單都有唔少選擇，韓式水冷麵解膩又消暑，麵條口感煙韌彈牙，非常有咬口，湯底酸甜清爽，透心涼。韓式炸雞外皮微脆，肉質都算鮮嫩多汁，外層均勻包裹住惹味嘅醬汁，有辣有唔辣。韓式吞拿魚拌飯份量唔少，面頭鋪滿咗吞拿魚、大量沙律醬同香脆嘅紫菜碎，將所有材料同熱辣辣嘅白飯撈勻，口感豐富 。最後仲有椰奶冰做甜品，賣相不錯，椰味夠香。
價錢真係勁平，以呢個價位黎講，食物質素同選擇算不錯，味道還好。
深圳市民中心 14/6/2026 11:30
用霸氣積分500元美食券換，高級北京菜，味道、環境、服務都一流，絕對值得!
京炙酥不膩文房烤鴨﹕堂前料理，氣場十足，鴨皮片得薄薄一塊塊，烤到金黃油亮，皮脆酥而不膩，完全冇半點肥膩感，滿滿嘅鴨香，鬆脆入口即化；鴨肉部分就嫩滑多汁，肉味濃郁。鴨餅超薄，米香味濃，加上八寶蘸料非常特別，除左基本嘅青瓜、蔥白同甜鴨醬，仲有超甜哈蜜瓜配熱情果醬，果香味更香甜，創新又好味。擺盆靚，仲做到保溫，入口暖笠笠，可算係食過最好食嘅片皮鴨。
黑松露黃油吐司配魚子醬烤鴨﹕賣相豪華到不得了，吐司香脆，香濃黃油香，再撒上黑松露，中間夾左片皮鴨，鴨香十足，頂層舖上魚子醬，啖啖鹹鮮海洋風味，一啖入口整體配合得非常好，鹹鮮、酥脆、鴨香、黃油香全部融為一體，非常驚喜。
銅壺慢熬梨湯﹕小吊梨湯湯色清澈淡淡琥珀色，梨嘅天然清甜慢慢喺口腔散開，香甜清爽，膠質感重非常幼滑溫潤，養生又好味。
乾隆白菜﹕白菜本身爽脆爽多汁，最正係嗰個芝麻醬，香濃幼滑，勁惹味。
老北京爆肚﹕用水燙煮，牛肚爽脆，但較為煙韌，蘸上濃郁惹味嘅麻醬蘸料、麻油等，調味是不錯的。
老北京炙子烤肉﹕羊肉係燒得火紅嘅鐵板上面燒到滋滋響，肉片肥瘦相間，煎到邊位微微焦香，肥肉部分油脂慢慢逼出嚟，肉質都保持嫩滑多汁，香料調味重，好惹味。用芝麻包包住食，多一份芝麻香，夠飽肚!
一口炸醬麵﹕麵條係手工製，煙韌爽彈，滑溜順喉，炸醬濃稠，黃豆醬香濃醇厚，鹹中帶甜，小巧份量食得舒服。
獅舞龍騰手工冰激凌﹕龍頭玉璽加上故宮太和門前銅獅造型，仲有乾冰，威武又華麗，影相一流。芝麻味堅果焦香超濃，啖啖香口又回甘，入口冰感軟重，非常清涼。烏龍茶茶味香醇，更加清新，甜度剛好，非常解膩。
