芝加哥串燒酒場

by admin | 3 月 28, 2026 | Blog, 大埔, 燒烤, 西餐, 飲品

太和 28/3/2026 14:00

星期六收工約同事食下午茶，揀左呢間串燒酒場，日頭去酒吧另外一番風味。叫左好多唔同款式嘅串燒，串燒拼盤超級澎湃，賣相勁靚。

串燒即叫即燒，香氣十足。每款串串燒得外焦內嫩。最鍾意食牛舌，燒烤微焦，口感爽口。荔枝豚肉串有驚喜，豬肉薄薄地燒得微焦，中間原來包住一粒超甜荔枝，果汁爆發，清新得嚟又惹味。原隻紙鶴雞皮好似薯片咁脆。

除咗肉類，菇類同海鮮亦都唔錯。雞髀菇極之厚身多汁。黑松露牛油芝士焗菌雜菌份量超多，黑松露味道勁香。白鱔燒到外皮脆卜卜，中間勁Juicy。

每款串燒都好好味，保留到食材原汁原味。一啖串燒一啖蘋果酒，三五知己來過Happy hour，超級滿足！

極品生燒乳豬串 $38﹕乳豬皮燒到極之香脆，咬落去索索聲。肉質保持嫩滑多汁，肥而不膩極有水準。

黯然叉燒串 $23﹕蜜汁完美包裹住半肥瘦嘅叉燒，外層帶點微焦香氣。入口肉質軟腍惹味，真係超好味。

荔枝豚肉串$25﹕豚肉嘅油香同荔枝嘅清甜完美結合，一咬即刻爆汁。清爽嘅果香中和晒肉脂感，配搭極之有驚喜。

蒲燒雞髀菇串 $18﹕雞髀菇厚肉彈牙，吸滿晒濃郁惹味嘅蒲燒醬汁。

和牛胸爽串 $26﹕口感爽脆，牛脂香氣大爆發，越嚼越出味。

韓式牛肋肉串 $29﹕牛肋肉肉質緊實有咬口，韓式醃料極之入味。微甜帶香嘅醬汁帶出牛肉鮮味，惹味到極。

汁燒牛小腸 $32﹕外層燒到微脆，咬開入面甘香嘅油脂即刻湧出嚟。醬汁濃厚香醇，處理得極之乾淨完全無異味。

煙燻和牛舌串 $38﹕厚切牛舌爽彈無比，煙燻香氣極之迷人。肉汁豐富兼且牛味濃郁，夠晒咸香。

汁燒牛頸脊串 $39﹕牛頸脊肉質極之腍滑，油花分佈得非常均勻。

原塊紙鶴雞皮 $19﹕雞皮燒到好似薯片咁薄脆，完全逼走晒多餘油份。惹味香口又唔會覺得肥膩，絕對係極佳嘅下酒菜。

鹽燒雞軟骨串 $16﹕簡單嘅鹽燒最能帶出鮮味，咬落去咯咯聲極之爽脆。淡淡嘅炭香配埋微鹹嘅調味，令人停唔到口。

黑糖雞髀肉串 $19﹕嫩滑嘅雞髀肉加上微甜嘅黑糖，帶有焦香味，雞肉嫰滑Juicy，非常好食。

黑椒雞腎串 $19﹕雞腎爽口彈牙，完全唔會覺得韌。黑椒嘅辛香刺激完美帶出內臟鮮味，越食越開胃。

手工雞翅釀飯串 $28﹕雞全翼去骨後塞滿惹味炒飯，外皮燒到金黃香脆。飯粒吸滿晒雞油精華，口感豐富又飽肚，辣味好刺激。

加芝士焦糖玉子燒 $43﹕面頭嘅芝士燒到微焦，玉子軟滑，味道勁香甜，邪惡得嚟極之滿足。

雞皮墨魚滑串 $33﹕香脆嘅雞皮包住極之彈牙嘅墨魚滑，口感對比超級強烈。鮮甜嘅海鮮味同雞皮嘅脂香互相輝映，極具創意。

黑松露牛油芝士焗雜菌 $45﹕份量超多，黑松露撲鼻而來，雜菌完美吸收晒牛油同芝士嘅精華。

炭燒黑椒牛西冷 $58﹕牛西冷燒得外香內嫩，鎖住鮮甜肉汁，黑椒嘅微辣完美帶出牛肉本身嘅濃厚肉味。

明太子多士 $28﹕多士烘得酥脆無比，面頭鋪滿鹹香微辣嘅明太子醬，滿滿嘅海洋鮮味令人回味。

極品羊西冷串 $38﹕羊肉嫩滑無筋，羶香適中完全唔會覺得刺鼻，肉汁豐富。

紐西蘭羊架 $39﹕羊架肉質軟腍多汁，炭火高溫完美封住表面嘅肉汁。淡淡嘅羊脂香氣配上惹味香料，極好味。

牛油帆立貝串 $38﹕巨型帆立貝極之鮮甜肉厚，牛油香氣完全滲透入去，嫩滑無比，滿口都係海洋嘅鮮味。

無骨白鱔串 $58﹕白鱔皮燒到極之香脆，魚肉保持肥美嫩滑兼彈牙，魚脂香氣極度豐滿。

脆炸3.6牛乳 $28﹕外層炸得極之金黃酥脆，咬開入面係鮮甜牛乳，奶香濃郁得嚟唔會太甜。

芝士年糕串 $32﹕年糕外層微脆，一咬開入面嘅芝士即刻拉晒絲，煙韌軟糯嘅口感配埋鹹香芝士，邪惡又好食。

蒲燒鰻魚串 $29﹕鰻魚肉質綿密肥美，蒲燒醬汁極之濃郁甘甜。

Magners Original Apple Cider $58﹕蘋果酒極之冰涼透心，帶有天然清甜嘅蘋果果香。微酸解膩嘅味道配搭串燒，簡直係絕配。

泰屋

by admin | 2 月 15, 2026 | Blog, 小食, 旺角, 泰國菜, 燒烤

旺角 15/2/2026 12:30

幾鍾意呢間泰屋，因為午餐真係平靚正!

先飲返啖冬蔭公湯，未飲已經聞到濃烈嘅香茅同南薑味。一入口，酸辣味即刻湧上嚟，刺激得嚟又非常開胃。湯底夠濃厚，唔係只有辣味，而係充滿咗蝦頭嘅鮮甜同椰奶嘅香滑。草菇爽口多汁，索滿咗酸辣湯，好開胃。

海南雞飯 $70﹕相當正宗，賣相靚，雞皮油亮望落已經非常吸引。雞件份量十足，全部都係去骨雞髀肉，啖啖肉。雞皮爽滑彈牙，皮下脂肪唔多，但雞油香氣十足。雞肉極之嫩滑，完全唔會覺得嚡口，而且煮得啱啱好，仲保留到豐富嘅肉汁。即使係雞胸嘅部分，都一樣咁嫩滑。個飯底先係重點，用雞油同香料煮過嘅油飯，粒粒分明，索滿晒雞油同香茅嘅香味，就算唔配雞肉齋食都已經好好味。飯嘅軟硬度適中，油香十足但又唔會覺得油膩。當然唔少得靈魂醬汁，薑蓉同泰式辣醬，加少少酸辣超級好味。

泰式肥牛炒河 $60﹕一上枱就聞到好強勁嘅鑊氣，河粉炒得均勻，色澤油潤亮澤，每一條都沾滿咗甜醬油嘅焦香味，河粉入口煙韌彈牙，保持到乾身爽口。肥牛肉片份量超多，醃得入味，食落軟腍唔韌，仲有各色青菜，爽脆嘅口感中和咗河粉嘅油膩感。調味適中，咸咸甜甜相當不錯。

青咖哩越式豬扒飯 $58﹕香茅豬扒大大件，煎得出色。豬扒預先用香茅、魚露等香料醃過，非常入味。上枱時熱辣辣，外層煎到有少少焦香，但切開入面依然肉汁豐富，肉質鬆軟唔會乾柴。每一啖都食到香茅獨有嘅清新香氣，非常開胃。青咖哩醬汁較為稀身，但味道不減，咖哩味香濃，香料、椰奶味十足，順滑得嚟又唔會太甜，辣度溫和，撈飯超正。

加配幾款小食都好抵食，先講串燒雞 $25，一上枱已經聞到好香嘅燒烤味，雞肉燒得啱啱好，表面帶點金黃微焦，賣相好吸引。咬落去肉質依然保持嫩滑，完全唔會乾柴，保留咗豐富嘅肉汁。醃料嘅味道滲透入每一絲雞肉入面，帶有淡淡嘅黃薑同香茅味。呢度嘅沙嗲醬做得好出色，花生味極之濃郁，質感粗粒得嚟又順滑，帶有微甜同微辣，非常惹味。

另一款必試嘅係炸蝦餅拼春卷 $20。大大塊圓碌碌嘅蝦餅炸到金黃酥脆，入面係實實在在嘅蝦肉膠，咬落去非常彈牙，每一啖都食到鮮甜嘅蝦味。蝦餅炸得好透，唔會油淋淋，配埋專用嘅泰式酸梅醬，酸酸甜甜非常開胃，酸甜味更加提昇咗蝦肉嘅鮮甜。春卷外皮極之酥脆，鬆化到跌晒碎，內餡豐富，係大量粉絲同雜菜，仲有木耳絲、紅蘿蔔絲等配料，增加咗爽脆嘅口感層次，味道一點都唔寡，反而有一種清新嘅蔬菜甜香。

椰汁冰﹕呢度嘅椰汁甜度調校得啱啱好，唔會過份甜膩，而係突顯咗椰子本身嘅天然清香同奶滑感，郁順滑嘅椰奶香味即刻充滿成個口腔。口感非常幼滑，最重要就係解辣。當你食完一啖咖哩，即刻飲一啖冰凍嘅椰汁冰，舒緩辣味帶嚟嘅刺激感，超涼快。