好味蛋糕大特價

好味蛋糕大特價

Italian Tomato@馬鞍山

17/8/2022 16:00

平時行過Italian Tomato,見到蛋糕都好吸引,不過價錢略貴,唔係太捨得食。剛見到近排做夏之感謝祭優惠,$188可以揀五件$45或以下嘅蛋糕, 又幾抵喎。

五件蛋糕一齊放,靚靚。

揀左兩件期間限定嘅茉香桃脆,蛋糕底係朱古力味仲有朱古力忌廉,帶少少焦糖脆脆,上面有白桃乳酪慕斯,仲有兩片白桃,非常之清甜。

藍莓芝士撻外型好吸引,撻底幾結實,加埋吉士忌廉、藍莓忌廉,仲有好多粒大大粒嘅蓋莓,粒粒都好甜。

皇牌士多啤梨糕外型好靚,忌廉打得好奶滑,蛋糕清甜,可惜士多啤梨略酸,一般啦。

最後係芒果慕絲蛋糕,慕絲中間仲加左芒果醬,酸酸甜甜不錯。

第一次試呢四款蛋糕,三十幾蚊一件係幾抵嘅,不過想食嘅款式都揀晒,試一次就算了。

四季良晨

四季良晨

17/8/2022 13:00

今日去烏溪沙搵朋友仔玩,玩完後食個好味午餐,朋友推介呢間台式餐廳。

揀左全日套餐有主食、小食加飲品,都抵食喎。

點左酥炸豬扒紅燒湯台灣麵配滷水牛肚,另外叫左杯奶蓋抹茶。

炸豬扒相當脆,炸皮好薄,啖啖肉,不錯。台灣麵湯底幾香濃,仲有少少辣味,不錯。

牛肚細細碟,味道都ok,幾夠入味。

奶蓋抹茶係跟餐加$25,淡淡抹茶味,奶蓋都係薄薄的,呢杯飲品就一般啦。

朋友食鹽酥雞,試食左一舊,都好脆,仲好Juicy,下次可以再試。

鮮芋鮮

鮮芋鮮

鮮芋鮮 @馬鞍山

2/7/2022 14:00

附近開左間鮮芋鮮,咁耐以黎都坐低食過。間中會外賣飲品,個人最鍾意小芋圓奶茶,仲係熱嘅,冬天時飲暖笠笠,茶底幾夠奶香,要求小甜都絕對做到,仲有細細粒BB芋圓,煙煙韌韌,不錯。

今日額外多一日打風假,見唔係太多人,可以坐低食個下午茶。

芋圓3號 $45

冰芋圓有刨冰底,3號配料有紅豆、花生、珍珠,仲有一堆芋圓。冰底實在夠凍,紅雨同花生相當腍,甜甜地,芋圓都係煙煙韌韌,不錯。

抹茶布丁配小芋圓雪糕 $38

呢個布丁拼盤可以自由配搭,抹茶布丁有淡淡茶味,配紅豆不錯。最鍾意小芋圓細細粒,凍食比熱食更加QQ,可以撈埋雪糕一齊食。甜甜的下午茶。

鐵板兒童餐

鐵板兒童餐

Pepper Lunch@馬鞍山

26/6/2022 12:00

早前疫情期間,試過Pepper Lunch外賣,雖然食品係一樣,但係堂食仲有鐵板可以Keep住熱辣辣,風味絕對唔同,始終都係堂食好。
美國薄切牛扒  $88
幾片牛扒跟薯蓉、菜,仲有大大碗白飯。牛扒都真係相當薄,煎得稍為過左火,所以韌韌地。
珍寶黑椒牛肉飯 $69

平常最愛都係呢個珍寶飯,今次仲加埋芝士。呢個牛肉太薄啲,再另外加上蒜蓉汁撈飯更加好味,感覺上仲好食過薄牛扒。當然要加錢跟套餐,有汽水同Haagen Dazs雪糕,雖然得兩款口味,但已非常豐富。

兒童餐 $49

原來Pepper Lunch都出左兒童餐。揀左煎蛋牛肉飯,一隻靚蒜蛋,一大堆粟米,幾片牛肉,白飯同成人版白飯都無乜分別,一樣咁大碗。兒童餐跟埋飲品可以揀利賓納,仲送小廚神貼紙。小朋友已相當滿足。

最鍾意呢度,有齊BB High Chair,仲有兒童餐。不過小朋友真係要小心鐵板,我地就另外用碗仔裝起俾小朋友,安全好多啦。

WM 美味飯堂

WM 美味飯堂

WM Café & Bar @馬鞍山

29/5/2022 12:00

WM Cafe可算係我嘅午飯飯堂。午市無論係星期一至五定係假日,都有午市套餐,價錢相當親民。套餐已包左餐湯、餐包同飲品,值得一提龍蝦湯係最好味,食得出好重龍蝦味。

明太子貝柱蟹柳蟹子意粉

賣相吸引,非常足料,最鍾意粉本身忌廉味濃。

美國西冷牛扒配紅酒燒汁飯

經常叫呢個套餐,五十幾蚊就有大大塊牛扒食真係開心。牛扒都好腍,配上燒汁送飯一流。

香草牛肝菌汁芝士焗美國雞扒意粉

呢款係每日限定,可以自選醬料,揀左呢個汁菌味好香濃,芝士味又好足,雞扒仲好Julcy,不錯。

廚師精選兒童餐 Set B $78

最近仲推出左兒童餐。粉紅色車車上面嘅食物都好豐富。杯仔裝住炸薯仔同炸雞,主菜有迷你漢堡、芝士通粉,兒童餐絕對無偷工減料,芝士通粉芝士味濃,好重忌廉,好味。最後仲有幾粒蜜瓜同迷你朱古力蛋糕仔,餐飲揀左蘋果汁。呢個兒童餐相當唔錯,份量十足,細細個真係食唔晒。

黎過咁多次食物都保持到水準,價錢唔貴,坐得舒服,值得一試。

屋子。慢活。

屋子。慢活。

屋子生活@馬鞍山

22/5/2022 12:00

馬鞍山係美食沙漠全世界都知,但沙漠都有一點點綠洲。就係最尾嘅烏溪沙站,商場內有間好舒服悠閒嘅餐廳,落地大玻璃果邊仲有榻榻米。食物都唔錯。

和風漢堡丼 $72  

一個套餐賣相就好靚,太陽蛋黃係脹卜卜。漢堡幾鬆化,調味唔錯。最好係白飯配上香鬆味道更上一層

鰻魚綜合茶泡丼 $72

賣相就幾靚,但鰻魚得少少兩片實在唔夠喉。茶湯味道幾清香,再加上少少芥末,感覺完全唔同晒。加$25就可以轉套餐,有味噌湯、沙律、飲品。

飲品要左抹綠奶茶,奶茶中帶點綠茶味,不錯。

小倉抹茶窩夫配抹茶雪糕 $50

靚靚甜品,味道都算唔錯。雪糕綠茶味道夠,窩夫蛋香味夠又鬆軟。

淋抹茶醬團圓丸子配抹茶雪糕 $50

自行加上抹茶醬幾特別。小丸子係煙煙韌韌。不過前後兩個甜品實在太似,就無乜驚喜。

環境舒服,好適合小朋友,食物賣相靚,味道都唔錯,值得一試。