Simply Simplylife

Simply Simplylife

Simplylife @ 沙田 31/7/2022 12:00

收到Eatizen有張八五折優惠券,特登出黎沙田食個Sunday Brunch。

$143一set,有餐湯,主菜,仲有冰茶。

麵包專門店嘅麵包都不錯,加上奶香味嘅牛油。餐湯南瓜湯夠濃味,仲有粉粉粒粒好杰身嘅感覺,小朋友勁鍾意。

車打芝士牛肉漢堡配煙肉。牛肉漢堡牛味濃,都保持到肉汁,不錯。薯條新鮮即炸,熱氣十足。

芝士奄列大大件,滑溜溜,中間仲有好多蛋汁。配上薯角,非常飽足。

焦糖香蕉法式多士。多士本身係鬆軟,仲充滿蛋香。香蕉又夠甜。加配煙肉,非常豐富。

質素高,價錢略貴,但今次有八五折,值得!

Flames

Flames

Flames@黃埔

10/7/2022 12:00

今日想去黃埔玩,經Openrice搵到呢間餐廳勁多好評,訂位仲有七五折優惠。點知黎到仲有一個更優惠嘅優惠,原來假日叫一份Holiday Brunch就送一份兒童餐。最後買二送二勁抵。

黑松露卡邦尼扁意粉 $108
可以話係食過最好食嘅Carbonara,無懸念。意粉硬度剛好,忌廉味勁重,好香黑松露味,煙肉、雜菌、洋蔥嘅配搭,整體真係好好味。

葡式燒雞扒漢堡配薯條 $128

非常澎湃嘅一份漢堡,雞扒大到突番出黎,好吸引。漢堡仲有番茄、生菜等配料。將佢解體,雞扒有辣味,有肉汁,可惜麵包略為乾身。薯條都係非常多,新鮮炸起,脆到不得了。

迷你炸魚薯條配他他醬

迷你?真係迷你?一大碟你話係正常Size我都信。兩大件魚柳炸得香脆,粉漿唔厚,配上偏酸嘅他他醬,好味。

番茄肉醬扁意粉

呢份就合理Size嘅迷你意粉,但味道相當不錯。番茄味濃,肉醬亦相當多。

兒童餐一份原價$68,一個迷你主菜加一個雪糕。細細碗兩個小雲呢拿雪糕球,口感較為黏身,唔似一般平價雪糕,有驚喜。

食物賣相,味道都係非常好,單叫一份Brunch一百零蚊,跟飲品已算非常合理。而家仲送多兩份兒童餐,就真係抵到離晒譜。一定會Encore!

唐記包點

唐記包點

唐記包點@馬鞍山

4/9/2020 13:00

16/6/2019 19:00

 
今日出街玩得太夜,但九龍實在太難搵食,決定趕搭車黎屋企先,再買外賣快快搞掂晚餐。好彩馬鐵站間唐記仲未關門,就咁決定。
排骨飯 $26
叫左一個排骨飯,都幾多餸,味道唔錯的。
豬軟骨飯 $29
本身想試其他飯款,可能太夜來,好多飯已經賣晒,阿姐建議可以試下豬軟骨飯。真係新奇,除左傳統蒸飯之外,原來仲賣埋客飯。飯同餸分開上,飯係超級大大碗,加大大舊豬軟骨,非常入味,軟骨煮到腍晒,醬汁甜甜地又夠多,撈飯一流。

燒賣 $18
另外,再買左一份燒賣多加餸。咁多款點心最鍾意燒賣,啖啖肉。

最後,仲買埋全店最後一個砵仔糕,非常多紅豆,味道少甜,煙煙韌韌,不錯喎。

菜肉包 $7.5
可能真係準備關門,熱包都賣得差不多,惟有買兩個凍菜肉包,返到屋企蒸10分鐘度就食得。都最鍾意呢檔嘅包,大大個,餡又多,抵食。

齊柏林熱狗

齊柏林熱狗

齊柏林熱狗@馬鞍山

30/8/2020 19:00

澳式風情熱狗

近期最愛人氣熱狗餐

澳式風情熱狗 $38

芝士勁澎湃,紐倫堡腸外皮好脆,充滿肉汁,配上菠蘿同千島醬酸酸甜甜,好開胃。

火炙芝士辣肉醬熱狗 $42

芝士、辣肉醬、黃芥末,熱辣新刺激之選,配粗荷蘭腸,都係肉汁滿滿。

芝味熱狗 $38

法蘭克福腸加上三重芝士,勁量,勁芝味。

加$15轉套餐可以加埋小食,薯條係新鮮熱辣辣,好脆口,最緊要係配上兩款醬汁,茄汁同千島醬。

洋蔥圈都係香脆味濃,配上燒烤汁好好味。

落左單之後,要稍等一陣,因為全部新鮮即製,值得等。

馬鞍山芝士撻

惠康M18@馬鞍山
15/11/2015 17:00




廿蚊兩個。蛋撻皮幾香幾鬆化,較為實淨香脆。芝士餡半熟,奶味重,個人較鍾意呢個。


麵包城@馬鞍山
8/11/2015 16:40

馬鞍山友推介馬鞍山芝士撻,十蚊一個一試無妨。蛋撻皮幾香幾鬆化,芝士餡半熟,芝士味算幾濃,抵食。

北海道牧場餐廳

北海道牧場餐廳@灣仔
9/2/2013 12:30

忌廉雞湯麵全餐 ($39)
火腿忌廉雞湯似係罐頭忌廉湯,不過味道算濃,配公仔麵都幾夾。蘑菇炒蛋係炒蛋配上蘑菇醬。炒蛋似日式奄列煎法,外皮煎得實在,切開中間就係半熟嘅嫰蛋,蛋汁豐富,好嫩滑,充滿蛋香同牛奶味。牛油多士夠厚,烤得香脆,入口鬆化不錯。咖啡香濃,奶味香,夠忌廉咪。

北海道套餐 ($42)
叉燒湯意粉、火腿炒蛋、牛油多士