消暑刨冰

消暑刨冰

老虎堂甜品專売@大角咀

15/5/2022 15:00

係商場食完飯行下,見到老虎堂諗住買杯野飲,邊行邊飲。原來隔離有間舖有位可以坐低食甜品。飲品就試得多,甜品真係未見過。店仔細細,幾套枱椅,因為無客,初時仲以為未開門。睇左Menu,原來有唔少選擇。因為太熱啦,所以揀左一份黑糖刨冰$45。

刨冰送上有驚喜,份量都唔少喎,材料都好多。冰底加左糖水,甜甜地,上面有一大堆芋圓、地瓜圓,煙煙韌韌,不錯。波霸珍珠正正常常,有黑糖味。本身跟蜜花豆無貨,自選揀左小湯圓,原來係粉紅加白色小湯丸,較為軟糯,都ok。

大大份刨冰非常解暑。

可愛蛋蛋料理

可愛蛋蛋料理

たまご園@奧海城

15/5/2022 12:00

小朋友最鍾意食蛋,無意中發現呢間以蛋為主題嘅餐廳。裝修裡裡外外都係蛋嘅橙黃色,幾有趣。

士多啤梨奶昔 $48

靚靚嘅粉紅色配白色,小朋友最愛。奶味好夠,帶淡淡嘅士多啤梨味,夠晒凍。

特製5款玉子串燒 $78

一次過滿足五個願望,試到五款口味。玉子係非常軟滑,甜味十足。上面分別放左番茄仔、海藻醬、親子三文魚、明太子沙律同蟹肉。

芝心雞漢堡兒童餐 $88

兒童餐份量都好多,材料好豐富!一大塊雞肉漢堡好鬆軟,咬開中間芝士唧晒出黎,味道不錯。配菜仲有可愛嘅八爪魚白腸、脆卜卜嘅薯條、蔬菜。最後有兩粒忌廉泡芺。

燉牛肉蛋包飯 $118

賣相仲靚過Menu,旋風蛋整得好靚。大大粒燉牛肉排滿,牛肉非常腍,連BB都食得到。燒汁濃厚,撈埋飯一齊食不錯。

士多啤梨梳乎里班戟 $78

兩大件梳乎里班戟蛋香味重,非常鬆軟,入口即溶。沾一沾士多啤梨果醬非常好味。

環境都靚,有特色,早啲到可以坐到蛋形圓梳化位,小朋友都好鍾意。可惜係,咁適合小朋友嘅餐廳居然無BB椅,家長要自行安排啦。

Berliner German Bar and Restaurant

Berliner German Bar and Restaurant@大角咀
8/6/2014 19:00


Free Wine Taster

Schwarzwalder Flammkuchen $138

Prok Knuckle $198

Sausage Platter $218
 

Bread Vasket $48
Erdinger Weisebier (1.5 Lit) $198

Vanilla Pancakes $65
Total $953

成熟含蓄的賣非佛

貴族甜品@大角咀
19/8/2012 18:00
今日需要甜份。
去大角咀用埋啲團購券,一睇就知呢間貴族甜品同九龍城果間皇室有九成相似。今次完全唔考慮想定唔定,只係隨意選擇左兩款人氣甜品,來一個破天荒,呢個新嘗試就換來一個新的賣非佛。
龍珠二世 ($30,團購價$15)
爽脆水晶珠、煙韌黑珍珠,加芒果沙冰做基底。上面加上又酸又甜嘅芒果、朱古力味雪糕同龍眼肉。淺嘗兩啖覺得還可以。
宇治金時 ($30,團購價$15)
估唔到朱古力魔今日嘅重點會落喺宇治金時上。三十蚊一份,未計團購折扣一半,會唔會大碗得太慷慨? 真心欣賞小店做團購唔偷工減料。
抹茶刨冰做基底,加上一大堆蜜紅豆、白玉同一個綠茶雪糕,係宇治金時嘅基本配搭。綠色嘅茶配上一紅一白,好日本。小店話冰底係用來自日本嘅特級宇治綠茶製作,冰底有微甘嘅綠茶香。唔知係唔係小店特製,定係自然形成,最底層嘅冰綠茶味更濃郁。蜜紅豆的確又大粒又蜜,煮得夠腍。白玉係糯米丸子,煙煙韌韌,可惜無黎味道。不過只要每一啖都夾埋綠茶冰、紅豆同白玉,就會發覺佢地能夠起互補作用,味道既甜亦帶微甘,入口即溶又帶煙韌。最後一個奶味極重嘅綠茶雪糕更係亮點,可以舒緩甘苦味,讓你感受綠茶的香甜。
突然覺得甜品舖嘅朱古力甜品好細路,因為好多用朱古力做主調嘅甜品,都會改埋一啲極具童話氣氛嘅名稱,咩魔鬼森林、黑王子定朱古力天地咁。感覺上好合襯,但不失一點低能。惟獨宇治金時,一味唔常見,但見親都唔會改名嘅甜品。從名稱、賣相、配色、味道都極成熟嘅樣子。
從來,青綠色都係佔據小妹最討厭顏色排行榜第一位。宇治金時,一個日本極度出名嘅冰品,咁耐以黎都係睇到當睇唔到嘅選擇。但有時食得多甜到漏嘅朱古力,成熟地、含蓄地甜嘅綠茶甜品,可能係另一種選擇。可能從今以後,或會成為小妹一個新賣非佛。

大角咀暗黑船長

金船長餐廳@大角咀
25/7/2012 14:30

星期三放大假又去睇個早場,蝙蝠俠早場都要六十大蚊,真係幾貴。睇完戲都夠鐘食下午茶,最後冒住貓狗大雨行去大角咀慢慢嘆。N年前曾經去過呢間金船長試過唔錯,下午茶款式選擇都幾多,一於再試。

香草忌廉汁雜菌天使麵 ($29)
首先,陣忌廉香味已經好誘人,賣相亦相當吸引。雜菌非常多,有冬菇、蘑菇同其他唔知乜菇,材料好充足。忌廉汁味道好濃郁,奶香味濃帶淡淡香草味,雜菌嘅味道亦溶化喺醬汁之中。質地亦超級忌廉咪,好幼滑,黏稠得黎相當掛麵,每條天使麵都被忌廉汁包裹住。可惜就係,天使麵都係一般嘅偏腍口感,好彩味道搭夠,都值得一試。

德國肉腸炒飯 ($29)
鮮橙色嘅炒飯加左唔少蕃茄醬,感覺同西炒飯差唔多,不過材料用上德國肉腸粒、青紅椒等,更加矜貴。不過飯炒得唔及中式炒飯咁乾身,質地略濕,近似意大利飯。

6吋金船長至尊比薩 ($30)
招牌比薩都係此店人氣之選,下午茶三十蚊就有交易,真係抵。比薩新鮮即焗,香到不得了。批底好似餅乾般鬆脆,中間相當鬆化。批面材料十足,蕃茄醬、芝士落得超級重手。有齊辣肉腸、火腿、菠蘿、青紅椒、洋蔥、蘑菇等嘅大雜錦,值得一試。

呢間大角咀人氣名店嘅下午茶相當抵食,仲免收加一服務費。每個套餐跟埋冷熱飲品,兩個人叫左三個套餐,做午餐都夠食。食品味道都相當好,唔怪得晚市可以咁墟陷,唔少人仲會黎呢度過節、慶祝紀念日,因為貪佢燈光柔和,夠幽暗,氣氛唔錯。