趁墟拜見麵包天后

惠籮餅店@天后
2/7/2012 15:00

 
食完甜姨姨,行番落銅鑼灣,經過呢間餅店,驚現人龍。趁墟八一八,原來麵包新鮮出爐,個個都大袋大袋咁掃貨,睇見芝士波波都非常多粉絲,貪得意又買兩個黎試下。

芝士QQ波 ($2)
麻糬波波係達到燙手加燙口嘅熱辣程度,外皮係脆脆硬硬的,中間係軟腍略帶煙韌。味道少甜,有微微芝士香,都幾好。再加埋新鮮即食,滿足感更強勁。恨不得再買多十個,邊行邊食。

事後網上一尋,原來呢間餅店係區內街坊人氣名店,真係失覺晒。佢嘅菠蘿包,蛋撻都相當出名,不過可能未遇岩出爐時間,緣慳一面。 事實證明,喺香港搵食,只要瞄準人龍所到之處,得閒無野做就四圍八下,凡事趁墟,唔洗睇食評,未做功課,都可以搵到好野食。

豆腐天后

甜姨姨私房甜品@天后
2/7/2012 14:30

食完個細細碗清湯腩,男士唔覺飽,於是喺附近掃街搵輕食。行過一間甜姨姨,覺得門面好眼熟,原來有唔少電視節目都借呢間小店拍攝。印象最深刻,就係360醫生用豆腐花練開腦手術,所以呢間小店,最出名就係豆腐花。

芝麻豆腐西米露 ($22)
甜品名稱平平無奇,諗住都係芝麻糊加豆腐花,再加西米露,點解會成為開飯網食家推介食品,有乜咁巴閉,試過就知點解。
一碗芝麻色嘅甜品,原來係豆腐加芝麻打成沙冰,再加入西米撈勻,上面放一個大大嘅芝麻雪糕。雪榚芝麻味夠濃,非常冰凍,冰感十足,而下面嘅沙冰物體更加好味。沙冰有芝麻粒粒口感,豆腐同芝麻完全融合為一體。既有芝麻香,亦有豆奶香,加埋晶瑩剔透嘅西米,多一份煙韌嘅口感。呢碗甜品比一般西米露杰身十倍,「露」呢個字有修改空間,其實可以改一個更有詩意、更唔拉家嘅名都OK喎。

By the way,有機會都會再黎一次,試下天與地阿佘有食過嘅即撞木桶豆腐花,聽聞個個食完都讚不絕口。

天后腩

華姐清湯腩@天后
2/7/2012 13:30

過黎港島,一定要試下天后嘅人氣名店。呢間華姐係開飯網排頭位嘅名店,食飯時間人龍自然出現。一點多黎到,人唔算多,亦唔需要排隊,好事來的。

清湯牛腩麵 ($30)
三十蚊一碗牛腩麵其實唔算貴,度度都係咁上下。呢碗麵有六大件牛腩,都算係咁。牛腩睇落偏瘦,纖維係一梳梳的,比較乾柴硬實,比普通更普通。心諗,中伏鳥。不過,原來瘦腩之外,仲有幾件半肥瘦腩,呢幾來半肥瘦明顯更好味。肉質軟軟,鬆化得黎牛味亦非常濃郁,肉之間帶有少少脂肪,入口更香滑。所以,黎呢度食,必須要求想食嘅部份,唔怕講多一句,得來嘅質素確實差好遠。
不得不提,呢碗清湯真係幾好飲,非常鮮甜味美,除左牛骨香味之外,亦帶蘿蔔清甜,加少許青蔥,入口一啲都唔油膩,好清爽嘅湯底。至於麵,都係一般煙煙韌韌嘅全蛋麵。

咖哩牛腩撈麵 ($42)
另一款咖哩牛腩嘅牛腩似乎更好,大部份都係半肥瘦狀態,夠晒腍。而咖哩係一般港式少辣咖哩,都OK啦。

呢間牛腩天后係港島區數一數二嘅名店,好多食客都會同附近地區嘅清湯腩做比較,各有支持者。其他幾間就未試過,但比較新界區果幾間,個人喜歡大埔群記多啲。群記除左一般嘅爽腩、坑腩基本選擇外,仲有面珠等其他特別部位,而餐牌寫到明唔同部位有唔同價錢,你想食乜就叫乜,自主性大好多。天后呢間就無明確顯示有唔同牛腩部位,所以新仔唔知頭唔知路唔識叫,只好任由大廚先生分配,如果唔好彩分到勁瘦位就真係麻麻地。不過做番功課,好多熟客仔話,只要柯打時講多句,店方都會盡量滿足客人要求。所以黎呢度食,記得要講明想食邊個部位,唔怕多口水。