花城匯艾薯
艾薯 Mr. & Mrs. Aysh@廣州花城匯
16/3/2016
炳勝品味
炳勝品味@廣州
19/7/2015 19:30
廣州最後一站食埋晚飯先返歸。成日上廣州遊嘅朋友推介黎呢間，上網再搵搵資料又好似唔錯，又話咩咩得獎名店。六點零黎到太古匯，過馬路對面就係石牌酒店。黎到就知驚，門口已經好多人。
好彩最後等左半個鐘就安排入座。後尾先知可能俾佢呃左。入到裡面，裝修好似幾高檔，中式嶺南風。收銀對面牆仲釘左好多獎項證書出黎，係好多，亦好浮誇。因為唔係太肚餓，少試幾樣推介食品。
菠蘿包 (RMB 38)
第一味上菜就有驚喜，上碟先知原來咁大個，一客六個，每個都大大個，放上個碗都裝唔晒。菠蘿包皮好酥脆，麵包本身好鬆軟，中間有菠蘿蓉，不錯。但係份量實在太多，最後食唔晒要打包第二朝做早餐。
原始水晶三味豆腐 (RMB 39)
呢度有幾款豆腐製品，揀左呢款三色豆腐，上面仲加左啲蝦、醬菜等。豆腐真係勁滑，入口即溶，豆味亦夠濃。黃色係蛋豆腐有蛋味，白色清豆腐，灰黑嘅應該係芝麻豆腐，有少許芝麻味但唔濃。加上其他配料少少辣，提味幾好。
豉油皇鵝腸 (RMB 48)
鵝腸好爽脆，豉油皇醬汁落得重手，炒得好有鑊氣，全場最愛。
脆皮叉燒 (RMB 48)
係網上推介菜式，睇落幾特別，點知入口就驚，因為實在太油。外皮脆脆地焦糖味係OK嘅，但皮下就好似一舊炸肥肉咁，一咬入唧晒肥油出黎，最後決定要用紙巾將油壓出就敢食，唧晒啲油出黎後，味道係幾甜嘅。
亦柯打左一渣冰爽蜂蜜柑桔汁 (RMB 48) ，分到五杯左右，味道都夠濃。
食味款式幾特別，味道係唔錯嘅，惟一係叉燒實在油得太驚嚇。價錢方面唔平，以上3個人食，埋單約RMB 260。話俾佢呃左係因為佢安排左去VIP廳房坐，淨係茶錢服務費每位已經要RMB10，如果坐大廳服務費真唔洗咁貴。不過坐房環境係幾好嘅，清靜好多，亦真係有位服務員專門負責，就當豪一次啦。
Ideal Chef
Ideal Chef@廣州
19/7/2015 13:30
就係花城匯開左好多新餐廳，今次就黎試呢間。裝修好有英倫風格，好輕鬆悠閒，真係可以hea半日。
周打忌廉海鮮湯 (RMB 29)
好多人都推介呢味。係用農夫包做碗，裝上忌廉湯，上面仲有一隻大蝦同青口。忌廉湯都好香好濃，沾一啲麵包都唔錯。
至尊雞肉披薩 (RMB 59)
新鮮即焗，餅底焗得脆，餡料亦好多，醬汁同芝士俾得夠多。雞肉夠入味，配芝士好味。
主菜加RMB 19配汽水同炸薯角，原來薯角先係重點，真係好好味。新鮮熱辣唔在講，仲要炸得脆，薯肉夠軟身，調味亦足夠，好惹味。
黑松露珍菌意大利飯 (RMB 59)
味道都夠濃，菇類都夠多。
芒果丹麥酥 (RMB 12)
賣相好靚，丹麥酥都幾香，中間有吉士醬同芒果肉。
車厘子朱古力批 (RMB 29)
朱古力唔夠濃味，一般啦。
廣州巧遇Kitty
Bon Bons Hello Kitty Cafe
3/8/2014
18/1/2015
廣州cafe第二回。喺花城匯誤打誤撞搵到呢間正野，呢間真係好大，裝修好靚。呢左黎度唔洗咁辛苦排大坑果間lu。
裝修真係好靚，座位上仲有Kitty陪你食野。驚喜嘅係，呢間Cafe相當乾淨企理，公仔都保養得好好。
採取自助服務，門口先揀野食再出票，去櫃台俾錢就等食。野食準備好後，有個Call機叫你去櫃面拎野食。
蛋糕櫃有好多款蛋糕，款款都好靚好吸引。
各款咖啡大約RMB 40，我飲Latte味道OK嘅，可惜因為星期日店方唔提供Hello Kitty拉花，只係隨便畫幾筆。
草莓綠茶蛋糕 (RMB 58) 都幾大件，底同面係綠茶蛋糕，中間有忌廉、吉士忌廉醬同士多啤梨。
雪吻慕思 (RMB 38) 朱古力慕思，賣相超靚，朱古力勁濃，質地都幾滑，唔算太甜又唔膩，正!
呢間野價錢唔平，但以主題餐廳黎講就OK嘅，影相非常唔錯，野食又靚，而且係算好味，有得影有得食，都坐得好舒服，個人黎講就覺得幾值得黎。