百川鰻魚

百川鰻魚

文和百川·活鳗鱼炭火烤肉@ 深圳Halo 廣場 21/1/2024 12:00

今日黎到筍崗食文百川,終於一試等咗好耐嘅鰻魚燒烤。叫咗一個點評二至三人餐(172元)

自助醬料選擇非常多,有辣有唔辣。

炭烤活鰻魚小份有八大件,喺炭爐上面燒烤,油分慢慢出嚟,熊貓呀睇住佢慢慢烤熟好吸引,最後再龍上鰻魚汁,用紫菜包住再加上一啲芝麻,入口非常之鮮味,有分十足,肉質肥美,相當不錯,不過油份太多,小試幾舊已經好足夠。

有幾款唔同嘅肉,雪花隔膜、秘制鮮肥牛、招牌五花肉,每款燒熟之後味道差唔多,可以自行用唔同嘅醬料調味,再用生菜包住更加清爽。幾欣賞呢度嘅菜非常之新鮮清甜,可以無限任加。

烤風干小腸肉外皮脆卜卜,肉汁豐富,不錯。烤土豆燒熟之後都係腍身。

麵包冰淇淋係將幾塊方包烤熟微焦,另外再自行擺上雲呢拿雪糕,冰火交融,雪糕奶香味濃味道不錯。

點評打卡送你一個芝士烤南瓜,芝士好厚,南瓜蓉好甜,相當唔錯。

難得有一間燒烤餐廳環境舒服,座位舒適,非常適合小朋友。全程服務員幫手燒烤,服務一流。

千藏日式燒肉專門店

千藏日式燒肉專門店

深圳卓悅匯 27/8/2023 11:30

今日黎到上梅林卓悅匯,中午食日式燒肉。大聚點評買尊享超值2人餐185元。

二人餐非常豐富,前菜有生菜、泡菜、地瓜泥等,都可以再添加。地瓜泥好滑好香甜,不錯。燒烤有幾款肉類,美國安格斯牛五花薄薄地,非常腍有牛味。牛肋條牛味相當濃郁,微焦香味十足。雞腿肉都相當腍滑。只係豬五花略為少少乾柴。用生菜包好肉類,再按個人喜好添加調味料,味道不錯。值得一提調味料選擇好多,不同款式既胡椒、鹽、醬油、蒜蓉等。今餐非常豐富又好味。而家全程有服務員哥哥幫忙燒烤,服務相當不錯。

滿滿初牛。燒肉。丼飯

滿滿初牛。燒肉。丼飯

深圳笋崗寶能環球匯 9/8/2023 17:30

選擇呢間店純粹見套餐有特別優惠,地點方便。5點半入場,被安排坐入一大廳一間房,自成一角,非常體貼帶孩童出遊的一家。

是次點餐為雙人餐 點評VIP價 168

前菜有花生、沙拉、材料豐富好味的羅宋湯、清甜火龍果,以上無限任添滿滿誠意。

炸物有紫蘇蝦球香脆可口,牛肉丼飯亦送上大大片軟腍牛肉。

三款醬料隨意添加,有酸酸的,有辣椒粉和燒汁醬油。燒肉先來包松阪豬、雪花肥牛,入口軟滑調味不錯。雞肉配上即場燒溶的芝士,味道更有層次。主角係狠長的安格斯牛肋條,出場已氣派十足,燒烤後外皮帶點焦脆,肉質相當軟滑,牛味十足。

最後甜品有可頌輕輕燒過,加上雪糕,冰火口感,味道不錯。即場打卡送奶凍當然唔放過,味道香甜,這個卡是值得打的。

食物質素高、服務殷勤、有專屬服務員為你燒烤、環境寬敞空間感一流、而且baby friendly,呢個價錢絕對物超所值。若以一般優惠價268仍相當值得一試。

鐵板兒童餐

鐵板兒童餐

Pepper Lunch@馬鞍山

26/6/2022 12:00

早前疫情期間,試過Pepper Lunch外賣,雖然食品係一樣,但係堂食仲有鐵板可以Keep住熱辣辣,風味絕對唔同,始終都係堂食好。
美國薄切牛扒  $88
幾片牛扒跟薯蓉、菜,仲有大大碗白飯。牛扒都真係相當薄,煎得稍為過左火,所以韌韌地。
珍寶黑椒牛肉飯 $69

平常最愛都係呢個珍寶飯,今次仲加埋芝士。呢個牛肉太薄啲,再另外加上蒜蓉汁撈飯更加好味,感覺上仲好食過薄牛扒。當然要加錢跟套餐,有汽水同Haagen Dazs雪糕,雖然得兩款口味,但已非常豐富。

兒童餐 $49

原來Pepper Lunch都出左兒童餐。揀左煎蛋牛肉飯,一隻靚蒜蛋,一大堆粟米,幾片牛肉,白飯同成人版白飯都無乜分別,一樣咁大碗。兒童餐跟埋飲品可以揀利賓納,仲送小廚神貼紙。小朋友已相當滿足。

最鍾意呢度,有齊BB High Chair,仲有兒童餐。不過小朋友真係要小心鐵板,我地就另外用碗仔裝起俾小朋友,安全好多啦。

一級服務。上級料理。舒適太子日燒

尚品日式燒肉店@太子
8/1/2011 18:00

22/7/2012 20:00

8/1/2011 18:00

$99食日式燒烤,我第一個支持。記得早年去左同一地址食放題,呢間舖頭已經結業,改頭換面,變成左一間日式燒烤店,新開張無耐,用$99一人前半任食套餐吸客,咁抵,值得一試。一人前套餐其實都唔少野,有一客貴族拼盤,包括五款指定菜式,外加五個任食項目,實食得飽。

貴族拼盤 (美國安格斯牛肋骨、鹿兒島黑豚肉、鹽燒手羽先、薄切牛舌、澳洲藍尾蝦)

美國安格斯牛肋骨
日式燒烤最好食就係牛,輕輕用火慢烤,熟成程度隨意控制,想點食都得。佢話係安格斯牛肋骨,但其實無骨,係完完整整一塊肉。賣相幾靚,鮮紅嘅牛肉肥瘦相間,放上火爐每邊慢烤十幾秒,剛好達到七成熟,中間保持迷人嘅粉紅色。入口未至於入口即溶,但非常軟腍,肉汁豐富,調味似乎選用左清甜嘅果汁味,醬汁甜甜地,亦不掩牛肉嘅鮮味,幾粒仔芝麻亦起到提味作用,根本唔需要多沾其他醬汁,很不錯。

鹿兒島黑豚肉
係唔係鹿兒島黎嘅,我一律唔多理,但好似未正式試過叫做黑豚肉的物體,所以特別留意呢幾片野。黑豚肉睇落比較肥,加熱後,白白嘅脂肪慢慢溶化,光亮嘅油份湧出黎。豬肉類燒烤時間比較長,仲驚死佢唔熟,所以有幾片燒得過左火位,但出奇地感覺仍然唔錯。黑豚肉燒到外層脆脆地,入口唔韌,保持到爽口嘅質感。肉味好濃,好甜,只用鹽同胡椒調味已經好足夠。雖然睇落脂肪幾多,但經過燒烤後,油份流失左唔少,所以食落完全唔覺油膩,黑豚肉的確有吸引力。

鹽燒手羽先
一隻雞翼對切,每份有四個細件。燒熟左嘅雞翼,外皮脆脆地,雞肉幾嫰滑,肉汁都幾豐富,但味道略嫌過淡,應該只有鹽同胡椒,但味道唔夠。

薄切牛舌
牛舌微咸,有少許胡椒味,少許牛膻味。口感有牛舌應有嘅爽口,但因為只得薄薄一片,口感明顯比唔上厚切,燒烤都係食厚切版好啲。

澳洲藍尾蝦
蝦真係比較難燒,兩隻蝦都燒到個殼燶晒。蝦的確夠大隻,但蝦味麻麻,味道一般,亦唔算十分之彈牙爽口,好普通。

任食項目 (柚子胡椒豬頸肉、辛口豬頸肉、橘子雞腿肉、魷魚鬚、白飯)

柚子胡椒豬頸肉
豬頸肉從未試過柚子味道,估唔到竟然喺日式燒烤食到。豬頸肉非常爽口,柚子味好突出,有微酸嘅味道,亦有柚子輕微嘅澀味,反而胡椒就唔多覺,好新奇嘅味道。

辛口豬頸肉
相信肉質同上款一樣,都好爽口香甜,呢款轉用辛辣調味,味道麻麻辣辣,好刺激,比上一款更惹味。

橘子雞腿肉
雞肉配橙味,感覺唔太夾,橙味澀澀地,幸好雞肉質地唔錯,幾嫩滑,只不過雞皮幾厚,怕肥的話就自行去皮。

魷魚鬚
燒魷魚鬚真係樂趣無窮,睇住魷魚鬚嘅粒粒氣孔慢慢收縮,冒出水份,魷魚鬚變得乾爽,好有生命力。呢款相信係椒鹽調味,非常惹味,食落超級爽口,煙韌彈牙,好有質感,亦食得出海鮮嘅鮮味,唔錯。

滿足嘅日式燒烤,叫左唔知幾多份任食項目,食到飽飽先走,一個半鐘時間係岩岩好。
餐廳提供三款沾醬汁,有甜甜燒汁醬油,仲有檸檬汁同蒜汁,但三款味道都偏淡,真係可有可無。
團購價只需多俾十蚊雞加一服務費就可以閃人,實價總數每位多謝$109,呢個價錢絕對抵食。只係任食項目得四款,追加多幾碟就覺得較寡。但口寡之前已經食飽,所以唔係大問題。

餐廳嘅服務真係十個抵讚,任食竟然無任何意圖或企圖限速。每次追加,侍應都好客氣回應,新鮮嘅食材會喺不出五分鐘之內送到。而且每碟材料嘅份量都好平均,足料夠大份。唔會話因為時間流逝,而食物份量都按比例縮水。
更應讚一讚餐廳上下各員工嘅服務態度,任何時候,任何職位都以禮待客。由點餐、上菜、換網,甚至小事於添茶斟水,所有服務人員都殷勤有禮,絕對感覺唔到有一點唔情願。所有服務都係自動波,貴客無需舉手或開口,服務員自然主動上前提供協助,呢種殷勤體貼,令我倆食得好舒服。
餐廳地方唔算大,但即使用團購優惠,兩人仍被大方安排坐四人梳化卡座,相當舒適,可能都係優質服務嘅一種表現。
整體黎講,食物有中上級數,服務係超水準,百零蚊半任食的話,真係超級抵。正價的話,都係正路價錢,大約一百蚊一份午市套餐。餐廳附近仲不時有人派優惠券傳單,不妨去試試。

22/7/2012 20:00

又做團購,$88一個套餐,包幾款任點任食,加一多$35,埋單每位$123。

定食一份:蒲燒海鰻、日本太子貝、鹽燒牛舌、鹽燒鯖花魚、法式芥末子雞脾肉、秘製燒鴨胸
無特別可言,連條海鰻都唔吸引,死得。

無限追加項目:燒汁美國牛肉、鹽燒鹿兒島黑豚肉、鹽燒魷魚鬚、橘子雞、鹽燒手羽先、Super Hot豬頸肉
追加項目正常,只有燒汁美國牛肉最好味,不過越食越膩。

點解第二次又係差咁遠,相信以後都唔洗再反轉頭,有團購都係咁話。

由頭限速到尾的抵食抵玩日燒@盛八

盛八日式燒肉店@旺角
27/11/2011 17:30
日式燒烤不嬲都矜貴,風評不錯嘅盛八,晚市普普通通都要三百幾蚊一位。唔知係生意麻麻,定係想做多轉博宣傳,堂堂盛八都要做團購。早前食過一次,印象深刻,今次佢做團購,當然唔客氣。只需$118,就可以喺黃昏五點半時份入場,享用兩個鐘嘅半任食。最後消費左五張,一家人去食餐豪嘅。
$118一人前大滿足半任食套餐,包括幾款前菜定食,同埋一客果味牛肋骨肉。另外仲有九個豚肉、手羽先等任食項目。
盛八沙律、日式茶碗蒸
沾醬包括﹕ 甜味醬油、檸檬汁、蒜蓉鹽味汁
胡麻豆腐﹕ 冷豆腐好滑,加上超級芝麻,少許醋酸味嘅芝麻醬,非常清爽開胃嘅前菜。
果味牛肋骨肉﹕ 話厚唔厚,話薄亦唔薄嘅牛肋骨肉,只需要每邊稍燒二十秒至微微變色,達到六、七成熟嘅程度就剛好。牛肋骨肉雪花好靚,燒熟左後,入口軟腍,油脂肉汁豐富,醃得夠入味,有甜甜蜜蜜嘅果味,調味剛好,唔沾任何醬汁已經夠好味。可惜只係定食,無得任叫,每人大約分到五、六片。
黑七味魷魚鬚﹕ 魷魚鬚夠爽口彈牙,調味好香胡椒、七味粉,但覺得太辣,太刺激。
山葵手羽先﹕ 可能我無食過,或者食左,但山葵味道唔多覺,以為無食過。真係唔太清楚。
鹽味手羽先﹕ 普通嘅雞翼,只需普通地加鹽,只要燒到皮脆肉嫰,已經好好。
香草雞腿肉﹕ 青BB嘅雞腿肉,其實唔覺有什麼香草味,普普通通,勝在雞肉都算滑,肉汁豐富。
橘子雞腿肉﹕ 比香草味更特別,係酸酸甜甜嘅香橙味,幾得意。
柚子豚Toro﹕ 其實即係豬頸肉,以佢本身嘅質地,爽口軟腍嘅口感,無可能會難食。呢件豚肉用左柚子醬醃製,的確入味,食到甜甜帶微酸嘅柚子味。
味噌豚Toro﹕ 呢件豚肉,肉質良好唔再講,一入口已經食到濃郁嘅味噌,醃得非常入味,惹味非常,值得再三encore。
鹽燒赤豚肉、生薑赤豚肉﹕ 肉質偏鞋,味道唔多覺,極度普通。
五個人,一個爐,不停怒燒怒食。完餐仲跟一個紅豆雪糕,牛奶味濃,有粒粒紅豆,凍冰冰,正好作為燒烤嘅總站。
盛八嘅調味醃肉係有一手,即使燒熟左撈埋一堆,根本唔記得燒過啲乜。但入到口自自然然可以憑調味配對出所屬名稱,證明肉醃得入味。
今次團購計埋加一,一人都係大約$130,雖然選擇唔算多,亦無人氣美食如鹽燒牛舌,盛八腸、羊架等,已經算好抵食。惟一唔鍾意就係追加速度奇慢,而且常漏單,兩個鐘頭裡面,有幾轉都係燒空氣,係有心定無意限速,真係不得而知啦。
其實幾享受日式燒烤嘅過程,就好似玩Flash Game咁,睇住啲肉慢慢由紅色變啡,油脂不斷滲出,反面嘅時候,唔覺意燒成一格格嘅網紋,再等佢慢慢熟成。最後將完成品送入口中,呢個過程時間係長,但果種期待,就好似食物嘅另一種調味料。