鳳雛燉雞

鳳雛燉雞

3/3/2024 12:00

今日出旺角,朋友介紹去旺角726大廈搵食,原來交通都幾方便,全座大樓都好多食肆。

揀咗呢一間非常之正宗嘅韓國餐廳,餐廳細細,坐梳化位都幾舒服。

店員先送相前菜三款,泡菜輕微辣,非常新鮮。大豆芽菜麻油味香,非常爽脆。

無骨芝士燉雞 $278

實在太豐富,一大盤嘅份量,足夠3至4人分享。材料豐富,無骨雞肉大大件,都好多舊,肉質其實有啲實。好彩仲有好多煮到入晒味嘅薯仔、紅蘿蔔等。最好味當然係索晒醬汁嘅冬粉,非常之滑溜。醬汁甜甜的,小朋友都好鍾意。選擇加芝士版實在冇揀錯,芝士勁厚,份量超多,咸鮮味十足。

牛肉紫菜包飯 $78

賣相討好,每件材料都好豐富。紫菜脆卜卜,有麻油香,包住飯、黃瓜、甜蛋等,牛肉應該用醬汁煮過,非常之香甜。

藍檸梳打 $32

藍色嘅飲品,大大杯,非常吸睛。檸檬本身都好新鮮,梳打微甜,正好解膩。

全餐感覺非常正宗,值得一試。但價錢略貴,未必會返轉頭。

Dream Cafe

Dream Cafe

Dream Cafe@旺角
4/8/2019 19:00

早排食過一間不錯嘅Cafe後,開始有舖癮繼續試Cafe,就貪佢坐得夠舒服,成晚流流可以晚晚hea,就算帶埋BB都可以悠閒慢慢食。就睇Openrice發現呢間Cafe相當多好評,今次就揀呢間黎試試。位置方便就喺朗豪坊隔離。

Cafe全梳化位,最鍾意坐得舒舒服服。揀左個二人餐,有餐湯、飲品、兩個主菜,已經非常豐富。
餐湯係南瓜湯,中間仲有一粒粒南瓜蓉,好夠味,BB都好鍾意飲。飲品揀左兩款特飲,一杯薄荷朱古力沙冰,一杯曲奇朱古力沙冰,兩杯都非常夠凍,冰打得幻幼細,味道仲好濃。

其中一款主菜係蕃茄忌廉海蝦燴意大利飯,賣相非常得,上面有好多隻蝦,非常彈牙。最鍾意個汁好濃味,帶蕃茄微酸仲有忌廉白汁中和番,非常好味。上面仲加左唔少黑椒多一份香氣。

另一主菜係澳洲羊架配牛肝菌燒汁,估唔到Cafe都可以如此高質素嘅羊架,賣相靚之外,煎得七成熟剛剛好,羊肉中間仲非常Juicy,肉質本身好腍,帶輕微膻味,正係個人最鍾意嘅味道。燒汁的確帶菌類味道,好香。下面仲有好幾舊炸薯角,新鮮熱辣,脆脆的,非常唔錯。

呢餐實在好滿足,難得係樓上Cafe都食到好味嘅西餐菜式,坐得舒服都係一大賣點。以呢個質素,價錢算是可以接受,值得Bookmark。

悠閒慢歎晚餐

悠閒慢歎晚餐

Go Dutch Cafe@旺角

16/7/2019 19:00

太耐無出黎旺角,行左大半日就到食飯時間。難得同老友傾極都未完,決定搵個地方坐低食嘢兼繼續傾計。記得早幾年同朋友最好Hea就係登打士廣場,一於聽朋友介紹黎到10樓呢間Cafe。Cafe環境舒適,二個人坐一張大梳化,對腳即刻舒服晒。非常肚餓,揀左一個套餐非常豐富,有小食、主菜、飲品加甜品。
薄荷碎碎朱古力、好立克沙冰
咁大個人仍然鍾意小朋友飲品,大大杯賣相好吸引,好立克沙冰夠晒濃味,朋友嘅朱古力都非常濃郁,配上脆米片口感豐富,幾特別。

小食揀左薯仔炸蝦卷。賣相好精美,隻隻蝦卷脹卜卜,蝦膠食落都幾彈牙,味道不錯,中間仲好Juicy,唔洗沾醬已經好夠味。

主食揀左一個特濃龍蝦汁帶子蟹肉意粉。雖則蟹肉只係蟹柳,但帶子非常多夠補數,鮮甜的。龍蝦汁味濃,掛晒麵,非常鮮味。

另一個主菜揀左德國咸豬手配薯角,份量都好足,薯角新鮮熱辣,啖啖薯味。咸豬手皮係爽爽煙韌的,充滿住骨膠原,肉質都相當腍,咸咸地味道不錯,最好就加些少芥辣醬提味。

甜品時間揀左一件提拉米蘇、一件曲奇芝士餅。正正常常,勝在唔太甜。

呢度嘅食物份量都好充足,兩個人食真係夠有餘,所以去到甜品階段已經太飽只能淺嘗。食物味道係唔錯,新鮮熱辣。咁岩呢度提供旅遊書,正好一齊研究下我地嘅日本之旅。兩個人一邊食一邊傾計,悠悠閒閒過左一個夜晚。

Romanne Leisure

Romanne Leisure Food Concept@旺角
28/2/2019 19:00

適逢小妹舊公司最後一日,親愛嘅同事們一齊晚餐Farewell Dinner。一行九人,非常高興。由同事們拍版揀食咩。
板燒魷魚牛油果香橙沙律 $108
配搭非常新鮮。
番茄乾蒜蓉法包 $38
平平無奇嘅餐包,原來相當好味,烤得酥脆,舖滿芝士。

Romanne小食拼盤 $178
有焗釀大蘑菇,非常juicy,芝士味濃,炸雞翼非常香口,薯角新鮮,調味調得正好,非常惹味。

煙三文魚忌廉汁意大利麵 $98
醬汁濃厚,不錯。

香蒜辣椒美國鮮蜆意大利麵 $128
蜆仔新鮮,意粉微辣,開胃。

北海道帶子南瓜意大利飯 $138

飯煮得入味,但略為少硬,煮得未夠透。

慢烤檸檬瑪利法國燒春雞 $218
大大隻雞,無乜特別,勝在唔算鞋口。

英式啤酒炸比目魚配香料薯條 $198
魚柳好嫰滑,炸皮唔算太厚,不錯。

沖繩活性水飼豬鞍扒蜜糖芥末醬 $238
肉質不錯,幾腍滑,調味適中,配蜜糖芥末醬幾好味。

混醬芝麻慢燒豬仔骨 $198
略嫌過火,較乾身。

黑松露雜菌意大利飯配63c溫泉蛋 $98

正常。

焗肉桂蘋果脆脆配意大利雪糕 $88
甜度適中,蘋果酸酸甜甜,雪糕幾好味。

焦糖比利士窩夫 $88
賣相非常吸引,味道不錯。

一行人黎到Cafe幾乎叫晒想食嘅野,賣相吸引,非常精緻,味道都相當不錯。價錢略貴,但一班人飲飲食食吹水吹足一晚,差不多啦。

工廈中的森林 I’s Land Cafe

I’s Land Cafe@觀塘
14/5/2017 12:00

經Openrice網上訂位非常方便,即時已經確定Mark左12:00嘅5大1B靚位。黎到駱駝漆大廈呢間工廈6樓,估唔到收埋左呢間餐廳。一入口門就覺得柳暗花明又一村,裝修用上好多木製餐椅同綠草,根本就係工廈中的森林。座位間格非常闊落,仲有位擺BB車,的確非常舒適。

美國頂級燒西冷牛扒配薯菜沙律杯 $108
柯打左兩個假期套餐,跟埋南瓜忌廉餐湯、餐包同蘋果汁。西冷牛扒都算幾大塊,上碟黎到自動五成熟,中間仲係粉紅鮮嫰。食落都幾腍,肉汁唔錯。配菜仲有薯角非常新鮮熱辣,瓜菜同埋沙律杯。

英式炸魚x雞軟骨配薯角伴雜菜沙律配黑松露酸忌廉醬及他他醬 $98
炸魚非常新鮮,肉厚皮脆,雞軟骨又夠香口,非常唔錯。

English Afternoon Tea Set $188

為呢個呃Like雀籠而來,的確幾吸睛。頂層有紫薯沖繩牛乳360布甸,紫薯味勁濃。仲有藍梅芝士餅、荷蘭忌廉卷、魚子醬吞拿魚麥包、巴馬火腿蟹柳卷、煙三文魚火龍果雜菜沙律杯。最後就係自家製真。紫薯蓉,的確非常香甜,口感幼滑。

花形士多啤梨窩夫配北海道3.6牛乳及綠茶雪糕 $68
甜品時間繼續非常吸引,新鮮即製,賣相好靚。窩夫外脆內軟,幾香蛋味,配上鮮甜士多啤梨,仲有好多果醬,而雪糕就夠晒凍,不錯。

埋單$462無加一,價錢合理。呢度環境真係一流,雖然處於工廈,但位置都好就腳。整體食物味道就正常,唔特別好味,但絕對唔差,賣相就加分不少,非常吸睛,一定可以喺FB度呃唔少Like。