隠家拉麵工場

隠家拉麵工場@深水埗
30/12/2012 18:00

一間以沾麵為主嘅拉麵店,靜靜地入主深水埗蘋果商場。店面係用木搭成,蓋上竹簾,好有低調隱世Feel,與店名襯絕。隠家引入日本山手拉麵嘅沾麵,以豬骨湯底為基礎,再加入黑蒜油、番茄辣醬變化出唔同口味,拉麵每日於店內由師傅徒手製作,每日限量供應100碗。店方六點開門,五點四十五分到達已經要排隊,真有名氣。

隠世白伝 $78
拉麵送到時係分開兩碗,一碗放拉麵,另一碗係湯汁同配料。
配料有兩塊叉燒、一隻蛋、紫菜、筍乾、青蔥等。參考食用指南,首先搞妥湯汁,夾一啖拉麵沾上湯汁黎食,食晒後可叫職員加清湯,再一飲而盡。沾麵嘅湯底比正常拉麵重口味,唔應該直接入口,不過壞孩子通常都唔跟規矩,偷咪一啖,的確濃。湯底濃稠,有好香豬骨味,魚鮮味都好重,略帶一點微酸。網友資料所講,估計應該用上唔少鰹魚粉。有別於一般齋豬骨嘅感覺,味道有層次感。店方亦建議加少許昆布醋提味,更加酸甜醒胃。不過略嫌油份比較多,有少許膩口。

沾麵配上微粗嘅麵條,口感相當爽滑煙韌,不過痴埋一舊比較難夾。掛湯能力好強,輕沾幾秒已經吸收到湯汁嘅精華。配料方面,有兩塊薄切叉燒,肥瘦均勻,肉質柔軟,肉味都唔錯。附送嘅一整隻蛋更加出色。蛋白外皮變成醬油色,黃白軟滑入味,溏心蛋黃做得好。不得不提,一片細細嘅紫菜仲印上店名,非常特別。不過沾麵雖好,仍有改善空間。唔明白點解店方將所有材料都放入湯汁之中,材料浸多一段時間,唔係浸得太濃味,就係浸到散晒。見過介紹同網友相片分享,有時會將配料同拉麵一齊放,唔知係唔係繁忙時間,連排盤時間都想慳番?

食晒麵條後,請店員加入清湯,稀釋湯頭就可以豪邁地飲清光。唔知加入什麼清湯,但配上原湯底後,味道更加清甜易入口,鮮味十足,的確可以一飲而盡。呢度嘅份量比一般的拉麵店多,再飲埋呢碗好味清湯,絕對食得飽飽。

隠世黑伝 $88 外加一隻溏心蛋$10
黑伝係以豬骨湯底為基礎,再加入黑蒜油,更香濃惹味。

此店可謂零裝修,話自己身處貨倉都不為過。座位同餐枱都係用汽水箱造成,兼覓十足,不過坐得超唔舒服,連放腳嘅地方都難搵。如果唔介意要排隊,兼且地方屈質,不妨一試。

千奇百趣低B班之沒有迴轉的壽司

大丸迴轉壽司@深水埗
11/3/2012 19:30

深水埗除左街坊平價茶記之外,早排發現開左間日本料理,試過午餐都可以。見團購做優惠,$43當$100現金消費,非常抵食,買左兩張,可以食餐好嘅。

一口炸雞 ($28)
散叫嘅兩款小食用一隻大碟一次過盛裝,但夾埋成六十蚊,睇落份量比較少。一口炸雞細細件,真係一口食得晒。雞炸得非常乾身,乾到汁都無滴,食落比較實硬,肉汁欠奉,嫰滑不足。

日本芝士年糕 ($32)
三十幾蚊得兩件,切開一半都係細細件。年糕外皮脆脆地,白色嘅年糕煙韌度略嫌不足,但米味唔錯。中間粉黃色嘅,係想流出黎嘅芝士軟心,芝味幾濃郁。但整體黎講,好似元氣比較好味。

日式帆立貝炒飯 ($68)
呢個炒飯嘅宣傳相片影得非常吸引,實物同相片大致差無幾,只係上面嘅帆立貝比相片縮水縮左一半,還好幾鮮甜。炒飯算炒得唔錯,飯幾乾身,粒粒分明,珍珠飯粒非常煙韌,有咬口。炒飯用左唔少青蔥、蘿蔔粒同柴魚片等,炒得非常乾爽,好有鐵板炒飯風味。

芥末八爪魚軍艦 ($18) presented by “Wearing a Beanie” Hello Kitty
每次食壽司例必點嘅八爪魚軍艦,用可愛嘅小木板送上,賣相討好。芥末八爪魚煙煙韌韌,份量都好澎湃,芥末味亦充足,只不過紫菜略嫌腍左少少,唔夠新鮮。

饅魚壽司 ($15)
最愛嘅饅魚壽司兩件只需$15,賣相唔錯,味道亦正常。

三文魚三味 ($18)
特價嘅三味,包括火炙黑椒三文魚、火炙醬油三文魚、火炙三文魚壽司,每款各一件。呢間店嘅火炙系列味道唔錯,炭燒味濃郁,再加上黑椒、醬油等唔同調味,更加惹味可口。三文魚燒得半生熟,更加腍滑。而其中一件三文魚肥美度好比三文魚腩,如果真的話,實在太抵食啦。

辣味三文魚軍艦 ($15)
三文魚第四種死法,係用辣汁醃製再放上軍艦,不過呢款三文魚辣味不足,麻麻地。

吉列炸蝦卷 ($25) presented by “I Love You” Hello Kitty
吉列炸蝦卷細細粒,應該係一件炸蝦切三件。炸蝦都算幾香脆,除左炸蝦之外,仲加左些少生菜,食落幾清爽,外層仲加左啲蟹子,味道正常,但唔太特別。

埋單要計埋加一,總數$241,計晒團購優惠,呢餐約係$130,團購價當然唔貴。$130埋單,質素收貨有餘的,但正價吸引力唔太大,其他地方都係咁上下。始終呢間位置唔係特別方便,而深水埗實在太多平價選擇。如果行開呢頭,想食壽司的話,都可以試下嘅。因為呢間有一個非常好嘅態度,所有壽司都係即叫即製,保證新鮮,一定唔會放得太耐。小店明明有一大條識轉識行嘅迴轉壽司帶,但上面係一件壽命都無,只係轉緊啲宣傳單張。想食壽司的話,一律要落柯打。態度係值得欣賞的,但改名做迴轉壽司,有迴轉壽司帶,但竟然無一件壽司係迴轉緊,呢個境況值唔值得上千奇百趣呢?

故地、老店、舊餐牌、新名稱

甜甜地甜品屋@深水埗
26/2/2012 14:45
搞電腦黎到深水埗,被迫要hea一個鐘,就喺附近搵地方hea,發現石磨坊已經消失左,惟有上開飯網搵搵,點知原來呢間甜甜地就係舊時嘅石磨坊,由原班人馬繼續經營,相信只係改左個名。
朱古力雪花冰 ($24)
精裝版雪花冰真係好精裝,份量細細,一個人應該都食得晒,正好解決到想食但凍到食唔落呢個問題。雪花冰一絲絲,比一般軟身,入口即溶。朱古力係特濃口味,輕微甘苦。配料仲有棉花糖、香蕉同椰果,再喺冰面淋左少許甜忌廉,味道正常,廿零蚊抵食。
椰香紅豆泥涼粉 ($26)
最鍾意石磨坊呢款甜品,一來將材料磨成泥真係少見,二來賣相仲好靚。紅豆泥圍住碗邊,中間有椰汁刨冰,下層就係涼粉,簡簡單單,但配搭唔錯。紅豆泥磨得好幼細,完係無粒粒嘅雜質,微甜但紅豆味超級濃郁。中間嘅冰底淋上香濃椰奶,撈埋紅豆泥一齊食亦得。破開椰汁冰,下面係涼粉,加左少少糖水,少少花奶,可惜涼粉味道太清。呢款甜品每款材料都可以獨立食,撈埋一齊食又得。食到最尾,紅豆泥已經慢慢溶化,撈埋椰汁花奶,感覺幾似紅豆冰,相當特別。廿幾蚊一大碗,份量十足,食完超飽。
椰香雜果涼粉 ($38)
點呢個甜品,因為睇相非常吸引,原來實物黎到,一樣強勁澎湃。冰柱整得超高、超結實,冰柱周圍仲有唔少款式嘅水果,最後有涼粉舖滿碗底,非常豐富。
刨冰刨得細碎,但仍然非常結實,冰柱屹立不倒,冰柱仲有紅、黃、綠、白幾種顏色,相信係特登淋上椰汁、芒果汁、西瓜汁同蜜瓜汁,營造彩虹效果,所以除左椰香味之外,刨冰仲滲透住水果嘅香甜。各式水果相信少不免會受過糖水浸禮,但甜度係可以接受,亦算新鮮,撈埋涼粉一齊食亦唔錯。呢個冰品實在太巨型,一個人根本無辦法完成,強烈建議要多人分享,如果唔係一定變雪人。

一向都幾喜歡石磨坊嘅出品,甜品款式比其他小店較為特別。最緊要就係價錢唔貴,亦有番咁上下質素,真係抵繼續支持。

飲茶不再飲茶

盅源@深水埗
13/11/2011 19:00
一盅兩件不再限於酒樓同點心專門店,年青人大膽創業,喺深水埗開設點心快餐店,先用團購提高人氣,三十蚊一位,可以任點任食多款點心同蒸飯,仲包一杯飲品,一個字抵!
有十四款細籠仔點心同四款蒸飯選擇,無限量任叫,當然唔客氣第一輪已經全部試一次。
1. 鵪鶉蛋燒賣﹕ 一盅一件嘅鵪鶉蛋燒賣,外型唔錯呀,一大件份量唔細,但蒸得比較乾身,鵪鶉蛋都收乾水,而燒賣略嫌太實,但調味還可以。
2. 山竹牛肉球﹕ 圓圓一大粒牛肉就好一般,好粉口,無乜牛味。
3. 南瓜牛骨髓﹕ 非常少見嘅一道點心,唔多覺有南瓜味,反而蒜味道較濃,牛骨髓夠腍,但我唔多鍾意食。
4. 蟹子伴燒賣﹕ 一盅兩件嘅燒賣,唔好睇佢平平地以為無餡,用魚肉燒賣黎呃人,原來入面真係足料,而蝦都爽口大隻,燒賣亦有肉味,唔錯,拍得住一般酒樓水準。
5. 四寶滑雞扎﹕ 足料,有火腿、雞、芋頭等,雞夠嫩滑,可以接受。
6. 蠔油鮮竹卷﹕ 完全唔知邊度有蠔油,但勝在夠足料,有齊木耳、蘿蔔、西芹、肉碎等,大大條味道都幾好。
7. 豉椒蒸排骨﹕ 全場最好食嘅一味,encore左多次。排骨有骨有肉,半肥瘦,而且有肉味,用少許豆豉蒸煮都夠好味。份量又唔少,雖然係細籠,但件頭不比酒樓嘅少,超水準完成。
8. 清蒸鮮蝦餃﹕ 夾起蝦餃時已發覺餃皮穿左,食落皮太厚粉,而且只得細細隻蝦仁,竹筍比較多。
9. 豉汁蒸鳳爪﹕ 一盅有三隻,調味味道剛好,鳳爪夠入味,又夠腍。
10. 香菇棉花雞﹕ 正常水準,棉花夠爽滑,幾大塊厚身,而雞都算滑,好足料。
11. 香茜白肉餃﹕ 似蔬菜餃多啲,個皮好粉,連個餡中間亦係粉嘅,唔得。
12. 柱候牛孖根﹕ 牛根超入味,又腍,又黏口,柱候味夠濃,分分鐘好味過啲粉麵檔。
13. 奶皇水晶包﹕ 唔知係唔係放耐左吹凍晒,個水晶皮好似塑膠咁硬,中間得少少奶皇。
14. 叉燒包﹕ 同一般叉燒包味道唔同,唔知有乜材料。
兩個人總共叫左四十籠點心,除左個別兩、三款唔掂之外,大部份點心都係正常水準。三十蚊任食當然舉腳俾笑臉。參考正價的話,可愛嘅細籠點心一盅一件大約五蚊雞,正常版就大路價錢約十幾蚊一籠。小店亦有套餐提供,三十幾蚊一個餐,可以選擇一碗盅頭飯、三款點心,仲包一杯飲品,的的確確係快餐價。
平時飲茶多數都係去酒樓或者新興嘅點心專門店,年青老闆們將飲茶文化結合快餐,提供左另類選擇。而家都唔知道呢條係財路定死路,但幾欣賞佢各款點心都係新鮮製作,快餐的話應該唔會係即叫即蒸,但每籠點心都係熱辣辣出晒煙,而味道亦保持應有水準。
小店創新嘅諗頭,值得欣賞。飲茶食點心唔再指定只可以揀水仙、香片定普洱茶,你想飲奶茶、咖啡,定係可樂、雪碧?

名店名物Go高糕!

坤記糕品專家@深水埗
9/10/2011 14:00

團購已經做到爛晒,團購優惠越來越唔吸引,可以全個星期一個團購都買唔落手,所以選擇遊走深水埗區搵平食。食完蝦子麵食埋個甜品,去左一間歷史悠久嘅中式糕點專門店買糕點。


芝麻糕 ($7)
高身又黑麻麻嘅芝麻糕一層一層堆砌,質地柔軟,可能因為預先包裝,邊邊位置有少許溶化,變得一pat野。質感係可以話入口即溶,無粒粒好幼滑,但好腍好粉,並非期望食到嘅煙韌感。芝麻味,有嘅,但唔濃郁,亦唔夠香,未至於人地所講嘅流動芝麻糊咁誇張。其實好普通料,七蚊一舊仔,不如俾多幾蚊食芝麻糊好過。

白糖糕 ($5)
白雪雪嘅白糖糕,係此店最出名嘅名物。最鍾意佢一絲絲嘅條紋,食落夠鬆軟,亦夠煙韌彈牙。一入口係一陣好清甜嘅白糖味,味道唔錯。但趙多幾啖,開始食到微微嘅酒味,繼而係酸味,相信係因為發酵時間過長,所以味道變酸。細細一件賣$5,其實真係貴。

名氣超大嘅一間舖,有無數個報紙、雜誌、電視節目介紹過,無數個名人黎採訪過。好多由細食到大嘅街坊,都慨嘆報導靠害。報導令出名的更出名,人氣越勁,賣得越多,越難保持固有水準。好多街坊都話,糕點無以前咁好,退步左好多。
算啦,對我黎講, 叫做試過所謂嘅名店,食過所謂嘅名物就算。