華星冰室

華星冰室
17/5/2016 09:00

15/2/2013 11:00

@旺角
17/5/2016 09:00

鹹牛肉蛋治$22
要食豐富嘅早餐就要食厚厚嘅三文治,賣相相當靚仔。麵包好軟身,華星嘅炒蛋夠厚,亦炒得好滑,蛋香味幾濃,鹹牛肉落得夠多,都算足料,不錯。


@灣仔
15/2/2013 11:00

同澳牛一樣的常餐,滑蛋係好味的,可算不相百仲。
呢度的職員比澳牛更和藹親切,比澳牛多一份悠閒。

神虎拉麵

神虎拉麵@灣仔
6/12/2015 12:30

咁岩黎灣仔聽講座,咁耐冇食拉麵梗係要搵間好味嘅。呢間神虎係大阪過江龍,開飯網排名都相當高。

等左一陣就入座,坐喺吧枱位。枱面有極冰凍嘅檸檬水、醬菜同辣芽菜。
是日叫左兩款拉麵同一客煎餃子。
餃子 ($38) 係網友推介菜,話有驚喜。餃子真係即煎,上枱時熱辣辣,隻隻脹bok bok,外皮微焦,賣相不錯。餃子外皮非常薄,菜肉餡好鮮味多汁,非常唔錯。

神虎 ($85)

整碗非常夠熱,湯底相當唔錯。質地好忌廉味,非常幼滑。豬味味好濃郁,再左豬背油提香,唔算油膩,相當鮮甜。加上蔥花湯頭更香,辣醬都幾夠辣,稍為撈湯又另一番口味。拉麵係幼麵,硬度不錯。蛋都係唔錯,醬油味夠,流心度一流。仲有兩塊叉燒,肉質還好,味道幾甜。

白虎 ($75)
其實湯底係一樣,只係神虎多左隻蛋。自選自虎配料全走,無伴青蔥果真差咁D。

總算收貨,但因為地置太遠,較難吸引回頭。一紙記錄就算吧。

Triple O’s by White Spot

Triple O’s by White Spot@沙田
21/4/2014 14:00


Triple O’s by White Spot@灣仔
16/12/2012 20:00

第二次食Triple O’s by White Spot,又有團購,$25買$50現金券。

煙肉芝士漩漢堡套餐 ($78,團購價$53)
牛肉漢堡、煙肉、芝士、生菜、蕃茄。

燒牛肉漢堡套餐 ($78,團購價$53)
薄切牛肉加蛋黃醬、辣根汁。

麵包新鮮鬆軟熱甜,漢堡肉味濃又多汁,醬汁亦落得重手,加埋一大塊酸瓜,正。

薯條連薯皮裝得滿滿,每條都粗度十足,外脆內軟,粉粉腍腍,有薯仔味。仲好就係樽裝茄汁任唧唔嬲。

北海道牧場餐廳

北海道牧場餐廳@灣仔
9/2/2013 12:30

忌廉雞湯麵全餐 ($39)
火腿忌廉雞湯似係罐頭忌廉湯,不過味道算濃,配公仔麵都幾夾。蘑菇炒蛋係炒蛋配上蘑菇醬。炒蛋似日式奄列煎法,外皮煎得實在,切開中間就係半熟嘅嫰蛋,蛋汁豐富,好嫩滑,充滿蛋香同牛奶味。牛油多士夠厚,烤得香脆,入口鬆化不錯。咖啡香濃,奶味香,夠忌廉咪。

北海道套餐 ($42)
叉燒湯意粉、火腿炒蛋、牛油多士

經典瑞士風

瑞士咖啡室@灣仔
2/7/2012 18:30

團購似乎就黎玩完,唔止優惠越來越少,連啲優惠都越來越hea。今次呢個優惠,只需俾$10團購網賺,就可以去瑞士咖啡室享用晚市全單六折。團購網連set個套餐都慳番,客人鍾意食乜都得,勝在夠自由。

瑞士常餐 ($40)
常餐同茶餐真係無乜分別,呢個常餐包括呢餐廳嘅必點食品瑞士雞翼。套餐仲有牛油多士、火腿奄列、瑞士雞翼公仔麵同熱飲,正價要四十蚊,真係嚇人的貴。
兩塊厚多士烘得幾靚,平均的焦香,外皮脆脆的,中間腍腍的,可惜唔夠鬆軟,牛油又唔夠多。火腿奄列蛋略為乾身,蛋汁未見,唔夠幼滑,不過超多片火腿的確可取。至於名物瑞士雞翼就可以,應有的入味,應有的甜味,可惜雞翼頗為瘦,又可能煮得太耐,肉質幾乾柴仲有少少嚡。餐飲貪得意叫左朱古力立克,不過朱古力味同好立克味都唔夠。

西冷牛扒腸仔配意大利粉洋蔥汁 ($40)
一心諗住試試呢度嘅鐵板餐,但搵勻都唔見,惟有求其叫。牛扒同一般餐廳一樣,醃到無晒質感,得個腍字,味道淡晒。腸仔煎到乾晒,縮晒皮。洋蔥汁都係咁,意粉都係咁。

呢餐嘅質素普通過普通,嚴格黎講,只屬低級茶餐廳質素。正價超過四十蚊,可以話又貴、又難食。只係團購價俾個全單六折,感覺無咁不安。此店惟一可取之處,係六十年代嘅懷舊冰室裝潢,亦可以話係僅有嘅賣點。白色、綠色相隔嘅紙皮石階磚、青咇咇嘅卡位等,確實營造到非八、九十年代嘅風味。最少,難兄難弟,奇哥同寶珠姐食野嘅地方都係咁上下,估計呢個就係六、七十年代經典風情。黎呢度食,志在食氣氛,別無他求。

天上有地下牛

大利清湯腩@灣仔
6/4/2012 14:30

得到阿蘇讚到天上有地下無嘅老字號清湯腩,分店越開越多,竟然都有做團購嘅一日。$38套餐包括清湯腩或咖喱腩配粉麵飯,跟埋飲品,其實價錢唔係特別平,不過試下無妨。小店位於灣仔一條大街嘅後巷位置,唔留心真係搵唔到,人流亦唔多,可能就係做團購嘅主要原因。

清湯腩米、牛骨湯
先講下個牛骨湯,相信黎過呢度食野嘅朋友,一定知道小店牆上貼住唔少張,語帶恐嚇嘅說話「唔飲湯就係你嘅損失」。的確,個人覺得果碗牛骨湯係幾好飲嘅,湯底好清澈,一滴油都無,入口非常清甜順喉,帶有好香嘅牛骨味,雖然咁牛,但一啲都唔油膩,飲完亦唔覺口渴。電視節目介紹過,湯底不含味精,由多種藥材加二百多斤牛熬成,而且仲經過多重隔油,牛味更突出,真正原汁原味。

感覺上,清湯腩米嘅清湯真係比牛骨湯清,牛味稍弱,相信係溝淡左嘅原故。還好,牛腩份量都幾多,夠飽肚。落單時,無特選部位,所以都唔識分佢係咩位置。牛腩半肥瘦,少部份痴筋,肉質紋理非常細密。食落唔韌,非常軟腍,有入口即溶嘅感覺,完全唔痴牙,加埋筋位嘅爽脆質感,又軟又脆。牛腩肉味亦夠濃郁,夾雜左膻味同油脂味。小店話採用新鮮本地活牛,再用秘方調味燉煮足足十二小時,保證入味兼爽口鮮嫩咁話。唔理佢點整,但加埋個吸收晒清湯嘅米粉一齊食,我係收貨的。

咖喱腩飯
咖哩並非什麼印度式、什麼馬來式,只係典型港式咖喱,香辣平衡,無過份香料。只見咖哩上一層紅油,其實有啲驚,但聞落的確好香、好惹味。咖哩汁嘅辣味係可以接受,不至於食一啖,飲一啖水,個人認為辣得正好。沉浸喺咖哩汁嘅牛腩,份量都唔少。不過明顯地,呢碗牛腩比較肥,入口一樣腍滑入味,滲透住陣陣咖哩香。間中仲夾到兩、三件牛根,果種入口即溶、滑嘟嘟嘅感覺,真係引死人。不過可能係紅油壊事,實在過份油膩。另一樣要投訴就係,飯係一半熱、一半凍的,店方實在要留意下。

$38換來一個老字號牛腩體驗,感覺良好。未至於網友所講,出左名就差到無朋友,退步十丈遠,但價錢就繼續狂加。可能幫襯時並非繁忙時間,人少少,咁好彩可以分到正野。可惜,又未至於好食到,好似阿蘇所講嘅世間珍寶咁誇張。唔少網友都會將大利同附近幾間出名嘅清湯腩店比較,睇黎都要夾下行程,搵日去試埋先。