コメダ珈琲店

コメダ珈琲店

紅磡黃埔 11/6/2023 12:00

紅酒燉牛肉$90,牛肉大大件,配上紅酒汁,上面仲有芝士忌廉,烤焗到金黃微焦。配上兩件法包, 正好用嚟點醬汁食。

照燒雞烤三文治$70,麵包經過烤焗成金黃色,中間嘅照燒雞肉質嫰滑,仲有肉汁。

甜品叫咗迷你抹茶牛乳冰與火 $50,自家製丹麥麵包香甜鬆化,牛油味香,暖笠笠,上邊加上抹茶牛乳雪糕的確做到冰火,牛乳雪糕非常之幼滑,味道濃郁。

牛乳軟雪糕 $35 奶味十分之香濃,微甜不錯。


紅磡黃埔 18/12/2022 12:00

今次試一試名古屋知名連鎖品牌。環境裝修非常之有日本家庭餐廳風味。

炸豬扒方堡$75 大大件,中間嘅炸豬扒同麵包一樣咁大,加上甜甜酸酸嘅豬扒醬同埋生菜,好好味。

兒童套餐$68 有雙併三文治、炸雞、薯角、薯仔沙律、啫喱、果汁,相當豐富。

香脆薯角$38

六件炸雞$45 炸得香脆,調味不錯

紅豆牛油多士$48 佢嘅紅豆的確好味,多士焗到剛剛黃金色,加上鹹鮮味嘅牛油,呢份早餐的確好味,高度還原日本出品。

Promenade

Promenade

都會海逸酒店 9/4/2023 12:00

適逢復活節有優惠,小朋友又可以自費參加甜品工作坊,就試吓呢一間嘅自助餐。

上邊一排全部都係食物嘅攤位,有唔少凍海鮮,仲有生蠔,生蠔唔算太大隻,但算幾鮮甜。旁邊仲有幾款冷盤同埋沙律。刺身款款都厚慘,非常新鮮鮮甜,旁邊仲有唔少日式小食同埋壽司。

熱食方面選擇相當多,除咗有廚房整好嘅世界各地美食之外,仲有一個粥粉麵檔,幾鍾意食佢嘅小雲吞,細細粒。仲有各式各樣嘅燒烤食品。

甜品選擇都非常多,期間限定復活節主題造型小食甜品,賣相都非常可愛。蛋糕類甜品都非常多,有爆谷同朱古力噴泉雪糕係movenpick,仲有新鮮即焗嘅疏乎厘等。

呢個自助餐相當受歡迎,仲有本地遊團體客,就人比較多,座位之間比較密

復活節期間小朋友可自費參加甜品工作坊,有甜品主廚教小朋友整白兔型cupcake,簡簡單單,製成品都幾得意,完成後仲有證書添。

米氣

米氣

米氣@黃埔 11/9/2022 12:00

紅磡主打日式米飯嘅專門店,點餐自由度相當高,前菜、主菜、白飯、甜品,都可以自由配搭。免治雞漢堡最突出,日式蒸蛋都相當唔錯,好日式風味。米飯本身甜甜的。甜品賣相不錯。但價錢唔算平,性價比一般。

Flames

Flames

Flames@黃埔

14/8/2022 12:00

10/7/2022 12:00

今日想去黃埔玩,經Openrice搵到呢間餐廳勁多好評,訂位仲有七五折優惠。點知黎到仲有一個更優惠嘅優惠,原來假日叫一份Holiday Brunch就送一份兒童餐。最後買二送二勁抵。

黑松露卡邦尼扁意粉 $108
可以話係食過最好食嘅Carbonara,無懸念。意粉硬度剛好,忌廉味勁重,好香黑松露味,煙肉、雜菌、洋蔥嘅配搭,整體真係好好味。

葡式燒雞扒漢堡配薯條 $128

非常澎湃嘅一份漢堡,雞扒大到突番出黎,好吸引。漢堡仲有番茄、生菜等配料。將佢解體,雞扒有辣味,有肉汁,可惜麵包略為乾身。薯條都係非常多,新鮮炸起,脆到不得了。

迷你炸魚薯條配他他醬

迷你?真係迷你?一大碟你話係正常Size我都信。兩大件魚柳炸得香脆,粉漿唔厚,配上偏酸嘅他他醬,好味。

番茄肉醬扁意粉

呢份就合理Size嘅迷你意粉,但味道相當不錯。番茄味濃,肉醬亦相當多。

兒童餐一份原價$68,一個迷你主菜加一個雪糕。細細碗兩個小雲呢拿雪糕球,口感較為黏身,唔似一般平價雪糕,有驚喜。

食物賣相,味道都係非常好,單叫一份Brunch一百零蚊,跟飲品已算非常合理。而家仲送多兩份兒童餐,就真係抵到離晒譜。一定會Encore!

芝麻綠豆

芝麻綠豆

芝麻綠豆@黃埔 14/8/2022 15:00

招牌芝麻糊,拼鮮奶燉蛋白,熱辣辣,鮮奶燉蛋白幼滑,奶味香。中間加左芝麻糊,黑白配。

冰品任選自由配搭,揀左士多啤梨西米冰。超級冰凍,水果都好多,非常適合夏天解渴。

另一款芒果西米冰都相當旁澎湃。