陶陶居

陶陶居

深圳萬象天地 12/11/2023 10:30

成功抽到大眾點評免費試食二人餐。今日重臨萬象天地,一樓半戶外嘅平台就見到陶陶居。

咁早嚟到人流都已經唔少,好彩唔需要等位。興幸坐係一張靠邊卡位非常之闊落,見中間圓枱比較貼近較為迫。坐低先飲啖普洱茶,清香錯。

點評送既二人餐已經非常豐富,但係熱菜需要11點後才供應,只好先叫幾個點心填下肚。

黑魚子香菇燒賣 36元:燒賣啖啖肉,好實在,菇味香濃。

流沙奶黃豬豬包 29元:賣相非常可愛,新鮮熱辣,流沙奶黃爆曬出嚟,唔太甜,味道不錯。

回味荔灣艇仔粥 33元:餸都非常多,有魚肉、疑似鮑魚絲、豬皮等。粥底本身好綿好夠味。

陶陶居大蝦餃﹕係點心四大天王之一。蝦餃超級大粒,起碼比平時酒樓食大1.5倍,非常飽滿。餃皮都算薄,蝦非常之多而且爽口。

明爐香滑靚葡撻﹕新鮮熱辣,皮非常酥脆,蛋非常幼滑,入口即溶,不太甜。

紅燒乳鴿﹕外皮脆卜卜,內有肉汁,啖啖肉。

惹味秋葵煎牛肉粒﹕賣相一流,材料非常多,牛肉超級腍,蒜味十足,好香口。

啫啫生菜煲﹕連煲上菜相當澎湃,熱辣辣,有蝦乾帶點鹹鮮味。

乾粉牛河﹕非常大碟,賣相一流,入口有鑊氣,餸料牛肉都非常多。

食物水準十分高,新鮮熱辣味道好。服務亦一流,服務員非常多,自動自覺。其實點心價錢非常可觀,一籠燒賣都近40元,但係就免加一,價錢同香港比較差不多,但深圳食一定質素更佳。

和味館

和味館

和味館@長沙灣
25/8/2019 12:00

難得黎到長沙灣探麻麻,帶老人家去飲茶慢慢歎。就係屋企附近隨便搵間茶樓,原來是新開無耐的,環境不錯,相當新淨舒適。叫幾樣點心食下。

幾欣賞點心係熱辣辣,非常新鮮。
炸雲吞就香脆,唔油膩。
老人家鍾意食傳統的中式點心,牛肉球、粉果等都係合格之選。

個人最鍾意菜苗餃,餡料足,仲有大大隻蝦。
鳳爪醬汁帶微辣,非常惹味。
排骨配上少見的陳村粉,加少少豉油都已經好好味。

中午時間兩個大人都係食左百零蚊,相當抵食。麻麻話平日仲有套餐更加抵食。
真係街坊價。

Hello Kitty 中菜軒

Hello Kitty 中菜軒@佐敦
18/5/2015 11:00

Hello Kitty計Cafe後,又要新搞作,就係開中菜館。現時仲係試菜期間,但都要過黎潮拜一下。

場境擺設係靚到無可挑剔,食物賣相都係唔錯,但深深明白到食物只供拍照嘅道理。預左主題餐廳唔會好食,重點係價錢實在太貴,入到去先睇到價錢,一個點心閒閒地五、六十蚊,少試三碟招牌點心,連茶錢都已經超過$200,真係好貴,相信當中包括左好多成份係版權費。

流沙包 ($62) 少少流沙,味道正常,包皮偏實。

蝦餃皇 ($68) 蝦餃皮厚,偏硬,蝦味正常,較乾身。

叉燒酥 ($48) 算係正常之作,但真係好細舊。

講完配菜,餐廳內嘅裝修先係主菜。餐廳裝修有中式風味,整體感覺唔錯,真係落過心機。
 
 

茶水吧裝修非常亮眼。連天花吊燈都好靚。

 

主角公仔非常可愛,著上旗袍拎住大包,好有中國特色。後期餐廳推出毛公仔,雖然係幾靚,但又係一頸血價錢。
 

菜牌盡是貓樣係一個重點,另一個重點係價錢。

  

木枱、椅、茶壺、餐具、紙巾到菜牌,完全都有貓樣。餐具相當精美,Logo做得唔錯。

連個點心蒸籠都咁靚,點可以唔收貴啲。
 

到最後都唔見傳聞嘅四美圖,膽粗粗問職員,原來係VIP房,平時唔開放,但佢都好樂意開門俾我地影相。

門口仲有精品展示。

事實證明,黎呢度真係當行主題樂園,食野係其次,拍攝先係重點。

珠江酒家

珠江酒家@太子

6/3/2015 19:00

傳統舊式酒家,主打小炒、海鮮、香口小食,菜式夠特別。價錢唔貴,八位女士,人均百六蚊左右。

黃金墨魚咀
外層蛋黃很香脆,墨魚咀爽口

潮州蠔爽
入口外層香脆,內裡蠔肉不乾身,加青蔥拌炒,估唔到蠔都好鮮甜

炒花甲

醬料好惹味,花甲非常新鮮

山東流亭豬手

白雲豬手配帶酒香嘅蒜醬油,豬手夠爽口

冰梅金沙骨
金沙骨骨少肉多,鬆軟入味,啖啖肉,醬汁帶微酸香梅味,不錯

金銀蛋莧菜

潮陽來不及
拔絲炸香蕉,香蕉甜,炸粉唔厚,非常好味

假期飲茶頭號選擇

鍾菜@九龍灣
4/4/2012 10:00
29/7/2012 13:00
距離Mega Box一條馬路嘅商業大廈樓下,原來隱藏左一間稻香集團旗下酒樓。聽聞此店嘅大廚仲參加過唔少電視廚藝比賽,來頭唔少。雖然晚餐仲未食過,但試過唔少次茶市,感覺良好。
咸水角拼香煎蘿蔔糕
咸水角炸得幾脆,中間嘅餡料都唔少,味道適中,夠香、夠惹味。而蘿蔔糕食落唔太粉,有粒粒嘅白蘿蔔,滲透住蝦米、臘腸嘅香味,非常足料。
柚子雲吞盞
雲吞炸得超級酥脆,中間有蝦仁等材料,略嫌內餡唔夠豐富。喺酥炸雲吞之上,加上柚子沙律。沙律係一般常見嘅鮮雜果,加上清爽嘅柚子果肉,可以中和炸物嘅熱氣感。
格子紅白腸
呢度嘅腸粉都算OK,幾滑身、有米味,腸粉附上豉油、甜醬同麻醬,歡迎隨便混醬。
脆網紅米腸
呢款腸粉係人氣創作菜式,腸粉染左紅色,佢話用左紅米,但味道同一般白腸粉分別不大。中間嘅餡就非常好味,係炸蝦卷。蝦卷外皮炸得超鬆脆,中間係非常新鮮彈牙嘅蝦肉。一軟一脆包埋一齊,幾似炸兩腸粉嘅豪華版。只需沾少許甜豉油,已經非常好味。
剁椒蒸魚雲
剁椒應該係辣椒,加上少許豆豉同蒜蓉,用黎蒸魚雲。魚雲蒸得相當入味,每啖魚都充滿住蒜同辣椒嘅香味,夠濃、夠香,一啲都唔腥。
貢苗海蝦餃 
餃皮係一般常見透明、煙韌嘅澄麵皮,包住大大隻鮮蝦同菜苗,新鮮熱辣、清甜好味。
灌湯小籠包
第一次試呢度嘅小籠包,一般啦。小籠包皮都幾薄,肉味鮮甜,肉汁有嘅,但唔澎湃,一般樓酒正常貨式。
香麻煎堆仔
熱辣辣煎堆仔,外層芝麻舖得平均,外皮香脆,煙煙韌韌,中間係爆醬流沙奶黃餡,奶味同蛋黃勁香,好味。
酥皮叉燒包
酥皮叉燒包係用上菠蘿皮,菠蘿皮有少許厚度,非常酥脆仲好香。中間叉燒餡超多,係粒粒叉燒並唔只係叉燒醬。好味程度拍得住添好運果款。

白花玉子豆腐
玉子豆腐加上蝦膠,再配上蛋白芡,又滑又爽口。

晶瑩棗茸糕
一上枱已經棗香撲鼻,口感極為煙韌,紅棗味香濃,少甜版亦夠健康。

脆米西施泡飯 ($88)
呢款係家人極力推薦之選。係海鮮魚湯泡飯,再加上炸脆米。材料十足之餘,玩味亦十足。魚湯鮮甜到不得了,口感幼滑,好忌廉咪,再加上少許芫茜提味,好味得全碗清空,一滴不留。配料有蝦、帶子、魚肉、草菇等,每款海鮮都鮮味十足,爽口彈牙。最後自行灑上脆卜卜的炸飯粒,幼滑得黎,夾雜香脆,口感一流。

幾次四個人去飲茶,人均消費大約四十幾蚊,真係超抵食。正價點心$20至$50,其實唔平。但由於位處商業區,假期反而人流更少,所以星期六、日同公眾假期有超優惠價錢,所有點心七折,小點只不過$14.5,大點都係$21.5。假日仲有點心優惠組合,四款點心加埋只需$56,同一般點心專門店差唔多價錢。而且呢個集團嘅酒樓最興免茶芥、免加一,計落條數相當抵。呢度除左地點有啲唔方便之外,環境真係非常舒服、地方闊落,仲有開放式廚房,俾你睇晒廚房嘅一舉一動,感覺更加乾淨衛生。怕等位都唔緊要,可以預先電話訂枱,去到後通常等多三、兩張枱就可以安排到入座。所以呢度已經成為我地一家假期飲茶嘅頭號選擇。除左家人聚餐之外,近排都興約埋班老友飲茶聚舊,貪佢坐得舒服仲hea得耐,仲好過去Cafe。

安牛任食火鍋攻略

魯一居利寶閣宴會廳@九龍灣
19/2/2012 18:00

即使有免費穿梭巴士,總覺得Mega Box真係好遙遠,所以好日都唔黎一次。真心覺得果度嘅商舖生存空間好低,所以有中菜館要搞團購,$98火鍋任食兩小時,包埋加一、茶芥喎,咁抵。

老實說,食過之後,覺得一般質素, 其實都無諗過要記低。不過見團購有超過一萬人買左,咁受歡迎,都不妨hea寫做個record。如果團購友未食,又或者有興趣試正場嘅朋友,都可以參考下。

事前準備
1. 必須晨早預約。十二月初預約時,職員話即日至一月份嘅檔期已經完全滿晒,建議早兩個月前預約唔過份,始終假日多人,而且菜館唔算十分大,當天所見,全部人都係食火鍋,都幾爆場。

正場
2. 一定要早到。雖然話晚市六點至十點半,但強烈建議食早場,始終下場refill速度係未知之數。早趁職員落場時間準備充足,樣樣材料乾淨整齊,點都會食得開心啲。而且敬請六點前齊腳,因為菜館真係唔到六點都唔開燈,六點正已經有長長嘅人龍,等安排入座都幾費時。

3. 入座後,要立即填表申請食物,因為遞左表都要等差唔多十分鐘先有湯底,食材大約要等十五分鐘。餐紙有七款湯底可選,仲有八款任叫嘅食物,另加六款優惠價嘅海鮮類貴野。餐紙default每枱得兩張,其實每次叫野可以唔洗諗,怒寫報大數。多次試驗下,估計菜館廚房佬對數量嘅定義為每一份等於一件、一片、一粒或者一pat。
3a. 火鍋係一人一鍋唔洗爭,試過黑松露上菌鍋,清湯底加一pat黑色野,有啲菇味,唔知真定假嘅黑松露,但味道幾得意。馬來沙嗲鍋都係清湯底加沙嗲醬,味道都夠,但較油膩。聽講香茜皮蛋湯都正常,可試。
3b i. 免費任叫嘅食物,包括是次火鍋主題食材美國安格斯牛肉,比一般雪花肥牛靚啲、肥啲,牛味認真唔錯,有少許膻味,輕涮十秒就食得,夠腍夠滑,值得怒點一百份。
3b ii. 除左安牛,仲有本地肥牛,總覺得比安牛差少少,有安牛就唔洗特別揀本地牛。
3b iii. 鯪魚肉有手打鯪魚球同鯪魚滑兩款,其實味道一樣,建議揀鯪魚球,因為無咁捩(口棄) [註﹕ 呢hea]。
3b iv. 仲有黑豚肉片,比一般豬肉片肥啲,肉味都唔錯,甜甜地。
3b v. 仲有其他味道正常嘅材料,包括魚皮餃、韮菜豬肉餃同竹串海蝦等。
3c. 要自費嘅費野包括美國桶蠔、龍蝦、帆立貝等,無叫,唔講。
By the way,佢送果杯竹蔗水又幾好飲,清甜足料,但太細杯。

4. 喺個鍋未到之前,見人少少,未出現人龍,就要先去自助bar拎野食,最好分工合作, 一次過拎定多啲,因為到中段時間,人龍會排到出門口。自助配料都有唔少選擇,一般火鍋要食嘅材料都有齊。材料一盆盆放得整齊,經過一個鐘時間受盡催殘之後,都總算無食唔落口嘅甩皮甩骨情況,相信當日嘅客人都比較斯文,而樓面阿姐都有花時間整理。

5. 一人一鍋係用細爐仔,一舊迷你燃料燒到尾,都預左火力唔猛料,所以煲勁耐都唔滾。所以要採取一次過大堆頭放料策略,每次水滾就要將想食嘅生料冚唪唥放晒落去,一定要加蓋,而且唔可以中途開蓋,熱氣一走晒又要由頭黎過,耐心等候係必須的。特別好味嘅有,彈牙多汁牛根丸、豬頸肉、咖哩味雞軟骨。炸魚皮都唔錯,本身有少許咸味,落水揈[註﹕ fing]兩野就上岸時間剛剛好,吸收啲湯味,仲脆脆地。

散場
6. 團購價$98已包茶芥同埋加一服務費,無另加貴價海鮮的話,就無其他虢礫(口緙)嘞[註﹕ kick溺卡嘞]收費。食飽想閃嘅時候,禮貌上叫番阿姐埋單,阿姐話你走得先好走。

呢個火鍋除左有安格斯牛肉之外,真係無乜特別,只不過團購唔洗一百蚊有得任食,而且款式都算多,叫做幾抵。正價任食火鍋,都係正路價錢,大約一百鬆一位,另計茶芥、加一。除左任食火鍋之外,仲有飲茶點心放題,宣傳板寫一位大約五十幾,好似好抵,但原來茶芥收十蚊一位,另計加一,夾夾埋埋七十幾蚊埋單,好似吸引力唔大。