by admin | 11 月 19, 2023 | BB Friendly, Blog, 尖沙咀, 星馬菜, 黃大仙
星怡@尖沙咀 19/11/2023 18:00
第二餐食星怡尖沙咀分店。分店坐落Isquare相當方便。
新加坡怡保雞絲河粉湯 $98﹕非常十分極之清淡嘅一味,材料有一隻蝦、魚片、一埋雞絲等,無特別。
新加坡農湯福建炒麵 $118﹕ 賣相麻麻地無乜色水,材麵有大蝦球,魚餅絲,豬肉片等,比較濕潤,但唔算惹味,明顯比上次茄汁炒麵遜色。
美祿煉奶沙糖多士 $48 ﹕份量唔算多,兩大件多士,中間夾左微冷嘅厚牛油,面層灑上美祿朱古力粉同煉奶,入口甜帶微咸,味道不錯有驚喜。
馬來千層糕 $42﹕班蘭椰味香,濕潤有實感嘅蛋糕。
黑糖寒天椰汁冰 $39﹕非常濃郁杰物嘅椰汁,加寒天啫喱條,飲幾啖覺得幾香,但多飲就覺得太甜唔解渴。
玫瑰花蜜茶 $33﹕玫瑰花味香,蜜糖夠多,味道香甜。
今次點評有$400,埋單補$13,價錢可接受,但明顯上次黃大仙食嘅比較好。
星怡@黃大仙現崇山 5/11/2023 18:00
呢間東南亞菜原來都有幾間分店,今次嚟到黃大仙現崇山店,從地鐵站行過去大約5分鐘一個住宅商場地下。店舖外邊有戶外空間,可以睇波,相當有情調今日一家大細揀咗室內嘅卡位。
海鮮釀油條 $88
賣相幾吸引,油條包住蝦膠、雜菜等,炸得非常鬆脆,一啲都唔油膩。加埋酸甜辣醬,多一份酸辣味更加開胃。
櫻花蝦炒飯 $98
賣相非常之吸引,除咗舖滿櫻花蝦之外,仲有大大飯蝦球。真係非常大隻,仲有五六隻咁多,都相當彈牙,但係一如正常蝦味就欠奉。飯炒得乾爽。
乾炒馬來蝦麵 $98
材料非常豐富嘅炒麵,一樣有大大隻蝦球,魚餅絲、蛋、番茄、芽菜等。油麵用蕃茄汁炒過,仲有少少鹹鮮味。旁邊有參巴醬,可以按需要自行添加,加咗之後更加多一陣香味。
鳳梨水果茶 $39
甜甜地微酸嘅菠蘿汁加上好多唔同類型嘅雜果。
美祿恐龍 $33原來
美祿飲品加上朱古力脆脆,飲品仲係暖笠笠,絕對講唔上係凍飲。
樣樣食物都新鮮熱辣,好笑嘅係點杯凍飲都係熱嘅。食物味道尚算可以,服務都係正常,但係衛生環境改善進步空間。
第一次抽到大众点评香港免費抽,有$400現金券。埋單連加一總數大約$390 ,唔需要補錢。
by admin | 11 月 12, 2023 | Blog, 中菜, 深圳, 酒樓, 點心
深圳萬象天地 12/11/2023 10:30
成功抽到大眾點評免費試食二人餐。今日重臨萬象天地,一樓半戶外嘅平台就見到陶陶居。
咁早嚟到人流都已經唔少,好彩唔需要等位。興幸坐係一張靠邊卡位非常之闊落,見中間圓枱比較貼近較為迫。坐低先飲啖普洱茶,清香錯。
點評送既二人餐已經非常豐富,但係熱菜需要11點後才供應,只好先叫幾個點心填下肚。
黑魚子香菇燒賣 36元:燒賣啖啖肉,好實在,菇味香濃。
流沙奶黃豬豬包 29元:賣相非常可愛,新鮮熱辣,流沙奶黃爆曬出嚟,唔太甜,味道不錯。
回味荔灣艇仔粥 33元:餸都非常多,有魚肉、疑似鮑魚絲、豬皮等。粥底本身好綿好夠味。
陶陶居大蝦餃﹕係點心四大天王之一。蝦餃超級大粒,起碼比平時酒樓食大1.5倍,非常飽滿。餃皮都算薄,蝦非常之多而且爽口。
明爐香滑靚葡撻﹕新鮮熱辣,皮非常酥脆,蛋非常幼滑,入口即溶,不太甜。
紅燒乳鴿﹕外皮脆卜卜,內有肉汁,啖啖肉。
惹味秋葵煎牛肉粒﹕賣相一流,材料非常多,牛肉超級腍,蒜味十足,好香口。
啫啫生菜煲﹕連煲上菜相當澎湃,熱辣辣,有蝦乾帶點鹹鮮味。
乾粉牛河﹕非常大碟,賣相一流,入口有鑊氣,餸料牛肉都非常多。
食物水準十分高,新鮮熱辣味道好。服務亦一流,服務員非常多,自動自覺。其實點心價錢非常可觀,一籠燒賣都近40元,但係就免加一,價錢同香港比較差不多,但深圳食一定質素更佳。
by admin | 10 月 19, 2023 | Blog, 外賣, 西餐, 韓國菜
釜山炸雞批薩
馬鞍山 14/10/2023 18:00
今日買外賣晚餐,小店就喺馬鞍山後街一個唔起眼嘅角落,一入門口就相當韓國感覺,原來老闆同廚師都係韓國人。效率非常高,外賣只需等15分鐘,兩大袋,分量十足嘅外賣新鮮整好。外賣包裝非常之好,仲有手套附上。打開包裝,實在太豐富,太澎湃啦!
五味炸雞 $239
主打韓國炸雞當然要試吓,呢一個五味炸雞,就啱晒選擇困難症嘅人,一次過試齊五種唔同口味。先食原味,外皮脆卜卜,中間仲有肉汁,唔油膩。炸雞仲有加左洋蔥蛋黃醬,洋蔥味濃帶微酸。蜜糖芥末醬更加重口味。甜辣醬好杰身,帶微辣好開胃。個人最鍾意雙重芝味,芝士粉舖滿外皮,好香好甜,芝味十足。
韓式烤肉PIZZA $169
首次試韓式Pizza,賣相好靚仲好大個,餅底有厚度,芝士超多做到拉絲效果,材料豐富,主要係肉粒、火腿粒等,醬汁係甜甜嘅韓式燒烤醬,味道不錯。
炸醬麵 $68
炸醬麵醬汁味道帶甜,配料有薯仔肉碎等,麵條粗粗地有啲似烏冬,口感煙韌,每條麵條都沾上醬汁。
芝士蛋卷 $108
超大份嘅蛋卷,煎得好靚好工整,略為實淨厚身嘅蛋卷,中層夾左芝士,加少少番茄醬美味十足。
估唔到係馬鞍山收埋左一間咁正宗嘅韓國餐廳。味道好,份量勁多。實在係外賣Party Food好選擇。
by admin | 9 月 17, 2023 | BB Friendly, Blog, 尖沙咀, 日式料理, 甜品
紅葉茶屋@尖沙咀
17/9/2023 11:30
今日一家大細出尖沙咀行街,帶埋BB出遊搵食都要諗過度過。就喺尖東帝國中心搵到一間新開嘅日式餐廳,估唔到非常適合帶小朋友,值得記錄一下。餐廳係日式裝橫,環境相當闊落,容許BB車直入,實在感恩。坐係近窗嘅卡位,仲有非常穩嘅BB椅同兒童餐具,非常適合帶B出街嘅家庭。餐單選擇相當多,各款日式定食,麵食同甜品等。睇相已經好吸引。
溫泉蛋卡邦尼烏冬 $92 賣相非常靚,擺盆有心思,選用器皿都好特別。卡邦尼烏冬奶香味非常濃郁,忌廉汁相當多,上面仲有唔少煙肉,一隻半熟蛋。估唔到西式醬汁加上烏冬配搭不錯。定食送上兩款小食,應該係牛蒡同醃蘿蔔。
牛肉壽喜燒定食 $138 大大碗牛肉壽喜燒跟飯,仲有麵鼓湯同餐前小食,相當豐富。牛肉相當多,肉質都幾腍滑,最鍾意甜甜嘅壽喜燒湯汁,最岩撈飯。
雪糕抹茶拿鐵 $25,叫定食隨餐加配飲品,$25大大杯絕對抵加。抹茶味相當濃,又有奶香,加上雲呢拿雪糕球,好味。
自選炸物盛合 $88 炸餃子 $38 自選炸物揀左炸生蠔鮮,鮮甜大大隻,不錯。豆腐魚餅有粟米蘿蔔魚肉等,好咪有營養,好適合小朋友。另外仲有兩件炸雞,脆皮薄薄的肉質都OK的。另外再加一客脆卜卜炸餃子。
紅葉甘之三味 $88 秋日期間限定,睇相已經好吸引,估唔到實物同圖片一樣都係好靚。一客甜品有三款,赤肉蜜瓜雪糕非常清甜,完全係水果天然嘅味道,非常驚喜。士多啤梨奶凍入口即溶好軟好腍,小朋友食唔停口。Tiramisu用木盒盛載,靚到不得了,紫色原來藍莓版本,甜中帶一點酸,幾特別。
抹茶蕨餅新地 $68 小朋友揀野食就係賣相行先,一睇就點中呢個靚靚嘅甜品。上菜時真係嘩一聲,大大一杯窩夫皮裝住巨量牛奶雪糕,雪糕應該加左焦糖醬,牛奶味帶點焦糖甜。仲有一個特濃抹茶雪糕。紅豆又係令人回憶日本風味,煮得軟爛仲甜度十足。最欣賞主角抹茶蕨餅,抹茶味重,帶一點甘苦味,口感煙韌。成個甜品就令我地回憶起當年宇治之旅。
幾鍾意呢間餐廳無論環境、食物,特別係甜品都充滿日本風情。雖然佢並唔係一間親子餐廳,但係異常地適合帶小朋友。係尖沙咀咁繁忙嘅地區中,一個非常適合一家大細食飯嘅好去處。
by admin | 8 月 16, 2022 | Blog, 小食, 快餐, 沙田, 西餐, 韓國菜
雞吧@石門
16/8/2022 17:00
今日黎石門玩到黃昏時間,買啲野食加餸先。一期就見到呢間主打炸雞嘅外賣店。一於試下。炸雞都有好多口味,突然選擇困難症,將呢個重任交俾女女。
半半炸雞L size $138
最後直接買大盒雙併,滿足貪心之人。小朋友揀左蜜糖牛油同車打芝士,每款有八件雞。雞新鮮炸起,脆卜卜,炸漿唔算多,最好係唔油膩,咬開中間肉質好滑,仲保持到肉汁,有驚喜。蜜糖果款蜜味好夠,脆皮吸收晒蜜糖,好夠甜。另一款係配上一大盒車打芝士醬,非常杰身嘅芝士醬,芝味極濃。
意式香草肉丸 $36×2
另外叫左兩份肉丸俾小朋友。十幾粒肉丸好澎湃。豬肉丸本身都好彈牙又有肉汁,醬汁係燒汁,小朋友都鍾意食。
雙色芋泥圓併地瓜球 $36
一盒有六大粒,粒粒都圓轆轆。外皮香脆,中間煙煙韌韌,包住甜甜嘅芋泥。另一款係一咬爆漿嘅地瓜球,蛋黃流沙唧晒出黎,有驚喜!
細細間店仔,充滿住炸雞嘅香味。拎到番屋企仲係新鮮熱辣,炸雞同兩款小丸子都風味十足。今次石門一行有意外收穫。
by admin | 8 月 7, 2022 | Blog, 太古, 日式料理, 西餐
Sensu@太古
7/8/2022 12:00
為慶祝生日,book左呢間好美味嘅餐廳。早排食過沙田店相當不錯,今次黎到太古呢間新店。野外露營做主題,門口就有打卡位。十二點開門原來已排緊隊,人氣甚高,好彩一早book左位,否則實有排等。
黑松露薯條 $48
新鮮熱辣辣,沾上黑松露沙律醬,帶少少酸味,不錯。
焗章魚燒風味薄餅麵包 $98
賣相吸引,麵包好鬆化牛油味香濃,加上海鮮配料,估唔到配上日式風味係咁夾。
朱古力咖啡 $48
拉花非常靚,咖啡味濃郁,帶朱古力味,味道平衡。滿意!
靛Indigo $68
期間限定嘅清爽飲品,大愛紫紅色,相當夢幻。有檸檬啫喱,藍色啫喱,西瓜,酸酸甜甜,爽爽口感豐富。
黑松露野菌扁意粉 $108
意粉上面大大單黑松露,香氣十足。意粉軟硬適中,配上黑松露忌廉汁,仲有好多雜菌。
脆脆吉列豬扒芝士歐姆蛋包飯 $148
豐富嘅飯,豬扒大大塊,外皮脆脆的,肉質鬆軟仲好Juicy。滑蛋脹卜卜,切開中間仍保留蛋汁,好嫩滑。據聞採用日本蛋,所以蛋味濃郁,包住中間嘅有味飯,非常適合小朋友。
抹茶提拉米蘇 $88
甜品方面特別出色,呢個提拉米蘇真係非常好味。蛋糕上面有三粒麻糬波波,淋上芝士奶蓋同灑上抹茶粉。切開後見到明顯三層,抹茶、忌廉芝士。入口即溶,充滿奶香及抹茶味。大愛!
食物賣相吸引,都值得相機食先,味道亦相當唔錯,上菜快,服務亦好,值得一試。
[/et_pb_text][/et_pb_column]
[/et_pb_row]
[/et_pb_section]