嚐味海南雞飯

嚐味@馬鞍山
22/11/2015 19:30

頌安新開無耐星馬茶餐廳。好多人食海南雞飯同喇沙等。
海南雞飯正常,醬汁幾好味,酸微辣。可惜油飯賣晒,下次要再試。
另外,豬頸肉不錯,幾香口。

Cafe 1950 歐陸餐廳 早餐篇

Cafe 1950 歐陸餐廳@馬鞍山
22/11/2015 10:30
25/10/2015 11:30
16/8/2015 11:30


22/11/2015 10:30

雞扒意式番茄湯米粉加炒蛋 $31
番茄粒都幾多,有粒有醬,番茄味濃。炒蛋幾嫰滑不錯。

25/10/2015 11:30

芝士火腿忌廉碎蛋牛角包

配蛋白鮮奶麥皮及熱飲 $28


16/8/2015 11:30

歐陸早餐$35。

香煎雞扒、腸仔,另加炒蛋。仲有美式焗豆、超甜粟米、迷你牛角酥。

吉列豬扒配煎蛋,另加薯餅 $38

吉列豬扒超脆,幾腍身,唔錯。

吉列魚柳早餐 $33

吉列魚柳好脆,都幾厚肉,唔錯。

馬鞍山芝士撻

惠康M18@馬鞍山
15/11/2015 17:00




廿蚊兩個。蛋撻皮幾香幾鬆化,較為實淨香脆。芝士餡半熟,奶味重,個人較鍾意呢個。


麵包城@馬鞍山
8/11/2015 16:40

馬鞍山友推介馬鞍山芝士撻,十蚊一個一試無妨。蛋撻皮幾香幾鬆化,芝士餡半熟,芝士味算幾濃,抵食。

丼丼屋食堂

丼丼屋食堂
8/11/2015 18:30
18/10/2015 13:30
28/9/2015 19:00
12/2/2013 20:00
16/9/2012 19:00

8/11/2015 18:30 @沙田
天婦羅魷魚鬚 $38
天婦羅皮夠繭,微脆,中間魷魚夠大條好足料新鮮。

鐵板野菌露筍牛油燒 $35
牛油、黑椒味好香,令所有菇都好份味,估唔到咁好食!

十勝帶廣名物豚丼並盛 $88
豬肉都鬆軟,燒得微焦,加左山椒、甜醬油提味,不錯。

滑蛋吉列廣島蠔丼 $88

滑蛋豬扒丼 $85

18/10/2015 13:30 @鑽石山

鐵板黑椒腸餅拉薯條 $38

天婦羅餅配冷烏冬 $70
烏冬非常煙韌,味道幾甜。天婦羅餅好足料,有埋三文魚、蝦、菇等。不錯。

滑蛋豬扒丼 $85
豬排炸得酥脆,炸粉唔算厚。今次呢塊豬排非常好味,半肥瘦好鬆化,肉味好甜。配上滑蛋認真不錯。

埋單總數$212.3,之前中左問卷調查送$50,$162.3,再用Cash Dollar俾錢。埋單時仲中多個問卷,下次又有$50洗,超開心。

28/9/2015 19:00 @鑽石山

芝士玉子卷 $43
原來無左原味玉子卷,揀左個芝士味,但好似縮左水,蛋卷冇咁漲bok bok,但芝士多到流出黎,賣相都算吸引。入口蛋味仍然香甜,加埋芝士味都唔錯,但個人較鍾情原味版本。

親子丼 $58
再試神級親子丼,半生半熟嘅蛋液仍然最吸晴之處,撈飯絕對一流。

和風醬汁吉列豚丼 $68
新出品期間限定,足足有三大塊吉列豬扒,相當澎湃,加上酸酸甜甜嘅和風醬,賣相非常吸引。吉列炸得酥脆,即使加左汁仍然香口。醬汁係大阪串炸嘅沾汁,入口帶酸,非常開胃。唔錯。

12/2/2013 20:00 @鑽石山

汁燒牛扒丼 ($78)

賣相不錯,份量亦算多。牛扒落單指示要五成熟,但來到似乎有六七成。有肉味,略為煙韌。 醬汁味道唔錯,算可以。

咖哩吉列豬扒烏冬 ($75)

咖哩汁幾香甜,咖哩汁份量足夠,每條烏冬都沾到醬汁。烏冬煙韌,份量亦夠,豬扒香脆可口。

芝士餅薯餅 ($38)
一碟有兩件,炸得很金黃香脆。薯蓉包住奶香味十足嘅芝士,外脆內軟,不錯。

16/9/2012 19:00 @鑽石山
數數手指,原來已經係第三次黎丼丼屋。不過一向酷愛日本料理,相信一日食三餐都無有怕。何況仲有大把恆生Cash Dollar,仲有Quota可以食多幾餐。此行目的,係試試另一款元祖級丼飯「勝丼」,以及好評如潮嘅玉子燒。
燒玉子卷 ($28)
一向認為蛋呢家野,只係平價貨,唔應覺浪費金錢出街食,所以食壽司從來唔願叫玉子壽司。不過呢味小食風評不錯,一試無妨。一客四件雞蛋仔排得整整齊齊,同櫥窗嘅食物模型有九成九相似。玉子燒係將蛋液燒好,一層一層捲成,所以從橫切面可見蛋皮嘅紋路一圈圈的。煎蛋卷有一定技術要求,每層蛋液厚度要平均,而且切開之後唔可以鬆散,丼丼屋嘅出品,算相當精緻。 特別鍾意玉子燒味道甜甜的,蛋香濃郁帶清甜香味,的確誘人。口感鬆軟、具層次感,中層蛋皮仍保留幼滑質感,仍有微量蛋汁。配上微甜嘅醬汁,再加上蘿蔔蓉,正係日本最家常嘅清新小點。
滑蛋炸豬排飯 ($68)
勝丼可算與親子丼旗鼓相當嘅丼飯一哥。記得早年沉迷日本綜藝節目《料理東西軍》,勝丼對親子丼嘅賽事出現過好幾次。呢款丼飯等候時間稍長,因為要經過酥炸豬排嘅工序,再加上滑蛋汁先完成。豬排炸得酥脆,炸粉唔算厚。可惜肉質一般,只有半肥瘦部份比較鬆化,其他地方略嫌乾身。不過重點仍在於滑蛋,滑蛋同樣滑,可以中和一下炸豬排嘅熱氣。整體黎講,只屬一般質素,始終豬排嘅威力不及滑蛋,驚喜欠奉。
事實證明,丼丼屋嘅蛋料理至係靈魂所在,炸物嘅技術仍有改善空間。個人黎講,此店仍有吸引力,尤其係期間限定嘅神級丼飯,應該要把握機會試試,上次嘅盛豚丼的確唔錯。

馬鞍山德興

德興茶餐廳@馬鞍山

8/11/2015 10:30

雞蛋咸牛肉三文治 ($25)

沙嗲牛肉五香內丁麵 ($25)
蛋牛治唔錯,麵包好軟身,炒蛋夠嫰,足料!

餃子王將

大阪王將@馬鞍山
1/11/2015 20:30

話說馬鞍山呢個美食沙漠,近排開番幾間食得下嘅餐廳。今次就黎試下大阪王將。八點落到黎都要排隊,大約等左半個鐘。

呢間大阪王將除左餃子出面,仲有天津飯。基本$45起,任選選類、蛋、汁,另外再加錢跟配料。

五味海苔飯+元祖天津蛋+王將咖哩汁+自家製漢堡扒 ($63)
記憶中同早期食過嘅天津飯好唔同,之前食過醬汁係類似中式芡,呢個似奄列蛋飯多啲,仲可以自選醬汁。鐵板上,厚厚嘅天津蛋包飯飯,上面加左塊漢堡扒,汁係另上。

本來睇落乾乾地,將淋上去,賣相即時變得吸引。漢堡扒幾鬆軟,入面幾Juicy,肉味都幾濃,唔錯。天津蛋係好厚嘅滑蛋,幾驚喜係雖然外皮全熟,但切開裡面仲幾濕潤,夠幼滑,蛋味正常。所謂嘅五味海苔飯係珍珠飯面加左少去海苔碎。而咖哩汁係傳統日式咖哩,夠香,辣度低,整體黎講算唔錯。

套餐跟餃子 ($18)
餃子似乎係即叫即煎,夠新鮮熱辣。餃子皮薄微脆,內裡肉餡多汁,都OK。

滑蛋豬扒鍋 ($62)
以火鍋上,能夠保持溫度,可惜出品麻麻。豬扒炸粉漿太多,豬扒太薄,仲甩皮,普通貨式。而醬汁偏咸,香味不足。