by admin | 3 月 28, 2024 | 2024 復活節六人行台北之旅, BB Friendly, 台北, 旅遊, 甜品, 西餐, 飲品
化石先生熊貓主題餐廳
28/3/2024 12:30
行完山下園場都12點,午餐就係最人氣嘅熊貓館二樓,新開嘅「化石先生 熊貓主題餐廳」。餐廳人氣相當高,評分4.6,係動物園裡最高質餐廳。黎到已經要排隊等一陣位。餐廳座位舒適,靠窗位置仲可以見到樓下嘅熊貓。餐單主打西式輕食,選擇都相當多。
焦糖拿鐵NT$150、鳳梨蘋果汁NT$180、奇異果汁NT$180、鳳梨冰茶NT$150﹕果汁類全部鮮即榨,味道有驚喜,水果新鮮酸酸甜甜,仲有果肉。咖啡味道香濃,不錯。
奶香蘑菇燻雞意麵 NT$300﹕意麵質地煙韌,奶油醬好香奶味,非常忌廉咪,材料都多,雞肉、蘑菇、西蘭花等。
青醬海鮮意麵NT$350﹕第一次試青醬,醬料有香草味,估唔到咁香濃咁惹味。海鮮料非常多,味道對板。
肉醬麵NT$280﹕肉醬相當豐審,正正常常。
章魚燒比薩NT350﹕賣相吸引,薄脆餅皮新鮮熱辣脆卜卜,醬料多,甜甜的,芝士多,海鮮料亦多,好有日式風味。
炸物拼盆NT300﹕款式多,香脆可口,洋蔥圈最好味,仲有魚柳、炸雞肉質都OK。
提拉米蘇NT100、彩虹蛋糕NT190﹕蛋糕賣相都好靚,彩虹蛋糕非常吸睛。蛋糕鬆軟味道略甜,但個人幾鍾意。仲有一款小熊貓蛋都相當出名,可惜賣晒。
埋單NT2,530,唔算太平但又唔算貴,坐得舒適,味道都不錯,主題景點餐廳算可以吧。
by admin | 3 月 28, 2024 | 2024 復活節六人行台北之旅, 台北, 旅遊
28/3/2024 10:00
趁第二日天氣好,先安排戶外行程重頭戲。今日坐文湖線去到尾站「動物園站」,車程都只係二十分鐘。文湖線係高架鐵路,沿途都睇到台市內景色。落車行出口行幾分鐘就到動物園門口。
是次搵到Klook歡樂券套票,包括動物園門票、遊園列車單程及貓空纜車來回票,每套$65,因為大小同價只買四套,扣除平台優惠,平均每套約$62,抵到爛。 (原價﹕動物園入場券NT$60+遊園列車NT$5+貓空纜車來回NT$120X2 = NT$305 =HK$76) 而小朋友就散買入園,但原來動物園兒童遊客價都係NT$60。
初入園落小雨,還好可以先去室內場館睇下,第一個必去一定係「熊貓館」。落地玻璃見到入面有兩隻都幾生猛嘅熊貓,仲有一個戶外地區,生活環境唔錯喎。熊貓館樓上有間熊貓餐廳,就計劃中午再黎呢度食。
睇完熊貓再周圍睇山下園區,呢度好多動物都係隨地放養。印象較深刻就係兒童動園區有幾隻好搞笑嘅草泥馬、狐獴等。臺灣動物區仲有梅花鹿、黑熊等。行入昆蟲館有一個好大嘅蝴蝶溫室。
by admin | 3 月 28, 2024 | 2024 復活節六人行台北之旅, 台北, 旅遊
28/3/2024 09:00
今年係Hello Kitty 50週年,台灣捷運打造Hello Kitty主題捷運,正正就係酒店所在嘅「南京復興站」B1轉乘層。一去到B1就見到Sanrio主題入閘機,連服務台都係主題佈置,Metro Corner仲放左一個Sanrio打卡位,旁邊就係Mini shop售賣主題產品。
淡水信義線就有一架Hello Kitty彩繪車,用捷運App就可以Check到Kitty彩繪車嘅位疊,就係第三日喺「士林站」同我地擦身而過。車身貼上Sanrio主題公仔,雖然未能親身上車,但上網查到彩繪車箱第三至四卡親子車卡都貼滿Sanrio Character貼紙,原來部份捷運車箱都貼上相同貼紙,呢幾日不知不覺已儲齊各式車箱貼紙,實在太靚。
店
by admin | 3 月 28, 2024 | 2024 復活節六人行台北之旅, 台北, 快餐, 旅遊
KFC台北中山店 28/3/2024 08:30
KFC嘅餐單同香港明顯唔同。早餐係一個包加飲品嘅組合,叫左幾個唔同套餐試下,而今期限定係花生肉鬆雞堡都幾吸引,一定要試下。
花生肉鬆嫰雞蛋堡 NT$79﹕漢堡新鮮熱辣辣,炸雞肉本身好好味,外皮脆脆肉又腍又有肉汁。中間醬料係花生醬,味道幾香,仲有少量肉鬆,呢個又咸又甜嘅配搭非常有創意,估唔到咁好味。
吮指嫰雞蛋堡 NT$69﹕呢個係炸雞加蛋漢堡,材料豐富。
吮指嫰雞蛋捲餅 NT$85﹕餅皮蛋捲包住炸雞,幾夠台式。
紅藜燕麥嫰雞粥 NT$65﹕估唔到KFC都有粥食。
跟套餐包一款飲品或加NT$5就可以升級玉米濃湯,果然加得無錯,粟米湯味道好濃,粟米粒又夠多。
台式KFC主食都係雞,呢度雞扒明顯比香港做得出色。再用炸雞做成具台灣特色嘅漢堡同雞捲,甚至煮粥,變化多,味道又不錯。
by admin | 3 月 27, 2024 | 2024 復活節六人行台北之旅, 台北, 台式, 外賣, 甜品, 飲品
徐杯杯粉圓仙草@Uber Eat
27/3/2024 22:00
返到酒店梳洗好之後,發現時間尚早,加入咗Uber試用一個月,可以無限運費,即刻試吓order甜品。好快就收到貨,效率非常高。
牛奶芋圓嫩仙草 NT$75: 材料非常多,面層鋪滿仙草,味道好香,非常滑。仲有好多珍珠,芋圓爽粒,煙煙韌韌,味道香濃,本身牛奶底唔算太甜,夠晒凍,不錯。
珍珠鮮奶茶 NT$75: 奶茶味道不錯,茶底都幾香,珍珠煙煙韌韌。
黑糖仙草凍飲 NT$55: 黑糖味比較濃嘅奶茶配仙草。
估唔到隨便叫一個外賣質素都相當高。
by admin | 3 月 27, 2024 | 2024 復活節六人行台北之旅, BB Friendly, 台北, 台式, 旅遊, 麵食, 點心
朱記餡餅粥店 松山壹號店 27/3/2024 18:00
離開「饒河街夜市」步行五分鐘就到「松山Citylink壹號店」。呢個商場係松山火車站直結,非常方便。商場入面有好多食肆,揀左呢間人氣連鎖包餅餃子店。Google評分有4.1分相當唔錯。小店座位唔太多,我地六人只能與人共坐一張長檯,還好仲有BB椅。
黃金鍋貼NT$125﹕鍋貼大大隻,外皮煎得脆卜卜,皮唔算太薄,厚度適中,咬開外皮中間肉餡好多,仲有肉汁,味道不錯。
鮮肉小籠包NT$150﹕賣相唔錯,外皮幾薄,肉餡香甜,中間有肉汁,價錢唔貴味道交足功課。
菜肉餛飩麵NT$125﹕ 碗麵上面有買大粒菜肉餛飩,皮唔算太薄,菜肉好豐富。麵條幼滑,有米香味。
紅燒半筋半肉麵NT$230﹕牛腩煮得幾入味,牛筋夠腍身,但係刀削麵質地較厚,口感比較硬。
櫻花蝦炒飯NT$160﹕炒飯炒得乾身,材料豐富,好多櫻花蝦,飯充分同蛋混和做成黃金炒飯蛋味香。
鮮蝦餛飩炒手NT$130﹕有八大粒鮮蝦餛飩,內餡豐富,比菜肉多一份蝦味鮮甜。醬汁蒜味香少辣,非常下飯。
燙青菜NT$70﹕燙椰菜加上勁多蒜蓉。
全部埋單NT$990,圍番港幣$250,算係地道又平民嘅台式小籠包餐,味道還好。