壽司郎 坑口

壽司郎 坑口

坑口 30/4/2023 11:00

壽司郎黎到香港已經開咗好耐,咁耐都未試過,今日嚟到坑口發現仲可以網上預約。憑網上預約到店,等一等就可以入座,減省好多排隊時間。

用平板電腦落單,睇圖片揀嘢食,送餐直接送到座位,出菜速度非常之快。

叫咗幾款魚生類別,三文魚幾先甜,吞拿魚腩非常之肥美,啖啖油香。最鍾意火炙系列,暖暖地加上沙律醬幾好味。帶子都好鮮甜。碎吞拿魚軍艦只需要$12 ,非常抵食。總括嚟講魚生都好新鮮。醋飯大少少甜醋味,輕微黏口,幾鍾意呢種壽司飯底。

叫咗一碗豚骨叉燒拉麵,估唔到湯底幾濃郁,質素不錯,拍得住一般拉麵店。天婦羅炸物都新鮮即炸,熱辣辣$19一碗茶碗蒸,滑到不得了,入口即溶,湯底香甜。

最後係甜品環節,估唔到甜品都咁多選擇,朱古力香莓雪糕巴菲特大杯,牛奶味雪糕奶味濃郁香甜,淋上朱古力醬同埋各款雜莓,酸酸甜甜。抹茶口味加上抹茶蕨餅,口感煙韌綠茶味濃。日式布甸蛋味十足。卡達拉娜係芝士味極濃郁嘅蛋糕,凍冰冰。蜜瓜容器裝住酸酸甜甜嘅雪芭。

漢和韓國燒烤

漢和韓國燒烤

沙田石門 12/4/2023 11:30

呢間韓國燒烤自助相當抵食,午市時間連埋加一成人大約$200一位,仲要冇限時,有本事可以食足三、四個鐘。

燒烤肉類款式非常之多,牛、豬、雞、羊,每一款都有唔同嘅調味,仲有啲香腸、魷魚等嘅小食,仲有少量可以燒烤嘅菇菜。燒烤嘅肉類其實味道都差唔多,印象中比較特別嘅牛扒,肉質腍滑,個人最鍾意仲有豬大腸。

自助餐枱仲有好多款韓式前菜小食,主要係啲醃製過嘅餐前小食。仲有幾款蔬菜同埋沙律配料。

預先煮好嘅熟食都唔少款,各式煎炸熱氣嘢,飽肚嘅仲有炒粉麵等,款式多到拍得住一般自助餐。

食飽飽之後仲可以揀唔同嘅甜品,奶凍、啫喱糖相當不錯。新鮮豆腐花非常之滑,仲可以自助任家糖水黃糖。雀巢雪糕雖然普通啲,但勝在款式多。最緊要所有罐裝包裝飲品都係自助任飲。

環境闊落,帶小朋友都坐得舒服,職員都會經常幫你換鐵板,服務相當不錯。

Promenade

Promenade

都會海逸酒店 9/4/2023 12:00

適逢復活節有優惠,小朋友又可以自費參加甜品工作坊,就試吓呢一間嘅自助餐。

上邊一排全部都係食物嘅攤位,有唔少凍海鮮,仲有生蠔,生蠔唔算太大隻,但算幾鮮甜。旁邊仲有幾款冷盤同埋沙律。刺身款款都厚慘,非常新鮮鮮甜,旁邊仲有唔少日式小食同埋壽司。

熱食方面選擇相當多,除咗有廚房整好嘅世界各地美食之外,仲有一個粥粉麵檔,幾鍾意食佢嘅小雲吞,細細粒。仲有各式各樣嘅燒烤食品。

甜品選擇都非常多,期間限定復活節主題造型小食甜品,賣相都非常可愛。蛋糕類甜品都非常多,有爆谷同朱古力噴泉雪糕係movenpick,仲有新鮮即焗嘅疏乎厘等。

呢個自助餐相當受歡迎,仲有本地遊團體客,就人比較多,座位之間比較密

復活節期間小朋友可自費參加甜品工作坊,有甜品主廚教小朋友整白兔型cupcake,簡簡單單,製成品都幾得意,完成後仲有證書添。

克茗冰室

克茗冰室

深圳寶安大仟里 1/4/2023 15:00

快樂爆漿雞蛋仔、泥石流爆奶華、巴馬臣芝士薯條、瀑布芝士豬扒包、舊金山西多士、小熊奶茶