Simplylife @ 沙田 31/7/2022 12:00
收到Eatizen有張八五折優惠券，特登出黎沙田食個Sunday Brunch。
＄143一set，有餐湯，主菜，仲有冰茶。
麵包專門店嘅麵包都不錯，加上奶香味嘅牛油。餐湯南瓜湯夠濃味，仲有粉粉粒粒好杰身嘅感覺，小朋友勁鍾意。
車打芝士牛肉漢堡配煙肉。牛肉漢堡牛味濃，都保持到肉汁，不錯。薯條新鮮即炸，熱氣十足。
芝士奄列大大件，滑溜溜，中間仲有好多蛋汁。配上薯角，非常飽足。
焦糖香蕉法式多士。多士本身係鬆軟，仲充滿蛋香。香蕉又夠甜。加配煙肉，非常豐富。
質素高，價錢略貴，但今次有八五折，值得！
Diamond Blue＠沙田
24/7/2022 12:00
今日出石門食個簡單午餐。見呢間有梳化位幾舒服，又有BB椅。
芝士汁焗薯條 （＄38）
新鮮熱辣，芝士味都幾香。如果多啲汁仲好。
夏威夷Pizza ($49)
配料主要係菠蘿火腿，芝士都落得重手，Pizza本身都幾鬆化。
墨西哥薄餅卷 （＄68）
一件大大件，可以選牛、雞、鴨，選左牛都幾夠腍，加多唔同醬料，味道不錯。
雞扒黑松露燴飯 （＄49）
黑松露味道夠，同飯完美撈勻。雞扒就略嫌一般。
餐牌選擇多，小份量，價錢唔貴，可以揀多幾樣。
炊豕店＠銅鑼灣
21/7/2022 12:00
難得今日黎銅鑼灣做野，先同同事一齊食個久違了的Happy Lunch。
揀左呢間係加路連山道，勁多好評嘅小店。12點未夠就黎到，岩岩好唔洗等位直接入座。
小店專做豬扒料理，就試一款日式風味嘅大阪燒豬扒撈粗麵，加多杯飲品，埋單＄74。
一上菜，嘩一聲，乜豬扒可以巨型到咁，金黃色仲相當厚實，炸得好透。上面唧左大阪燒汁、蛋黃醬，仲舖滿左木魚碎，真係大阪燒黎架。
豬扒炸到脆卜卜，炸皮唔算太厚，咬開豬扒仲好腍，充滿肉汁。原味已經好食，再加上大阪燒醬汁，多一點日式風味，仲無咁膩。
粗麵底幾爽口，加左少少甜豉油。實在好熱氣，但令人不禁一口接一口，食晒碗太飽足，之後飲啖茶吧。
花月庭＠旺角
17/7/2022 11:30
慶祝放暑假，一家大細食自助餐。鍾意花月庭位置方便，餐廳夠大，野食選擇夠多。自助午餐有八折，平均每人約＄370。食物櫃檯多，分門別類。
有即開生蠔每次每人限拎兩隻，唔算大隻，但勝在幾鮮甜，值得encore。
仲有各式凍海鮮，都算新鮮。
有幾款刺身，少量壽司選擇。試左三文魚都ok甜。
熱盆都好多選擇，湯品、肉類、蔬菜，仲有麵檔等。特別鍾意食海鮮燉蛋白，細細碗，小朋友都岩食。燒牛肉牛味都幾香，淋上燒汁不錯。
類品款式都相當多，揀左幾款蛋糕，最鍾意藍莓芝士蛋糕。新鮮即製嘅雞蛋仔都唔錯，外皮脆卜卜。特別鍾意奶凍類杯仔甜品，北海道牛乳同抹茶紅豆奶凍值得一試。
最後有movenpick雪糕，是日有六款口味。朱古力係最好味嘅，小朋友最鍾意自行加上唔同朱古力、糖做裝飾。
地方較大，相對食客都多，間中都排隊拎野食。幸好坐埋一邊自成一角，可以慢慢食。
Flames＠黃埔
10/7/2022 12:00
今日想去黃埔玩，經Openrice搵到呢間餐廳勁多好評，訂位仲有七五折優惠。點知黎到仲有一個更優惠嘅優惠，原來假日叫一份Holiday Brunch就送一份兒童餐。最後買二送二勁抵。
黑松露卡邦尼扁意粉 ＄108
可以話係食過最好食嘅Carbonara，無懸念。意粉硬度剛好，忌廉味勁重，好香黑松露味，煙肉、雜菌、洋蔥嘅配搭，整體真係好好味。
葡式燒雞扒漢堡配薯條 ＄128
非常澎湃嘅一份漢堡，雞扒大到突番出黎，好吸引。漢堡仲有番茄、生菜等配料。將佢解體，雞扒有辣味，有肉汁，可惜麵包略為乾身。薯條都係非常多，新鮮炸起，脆到不得了。
迷你炸魚薯條配他他醬
迷你？真係迷你？一大碟你話係正常Size我都信。兩大件魚柳炸得香脆，粉漿唔厚，配上偏酸嘅他他醬，好味。
番茄肉醬扁意粉
呢份就合理Size嘅迷你意粉，但味道相當不錯。番茄味濃，肉醬亦相當多。
兒童餐一份原價＄68，一個迷你主菜加一個雪糕。細細碗兩個小雲呢拿雪糕球，口感較為黏身，唔似一般平價雪糕，有驚喜。
食物賣相，味道都係非常好，單叫一份Brunch一百零蚊，跟飲品已算非常合理。而家仲送多兩份兒童餐，就真係抵到離晒譜。一定會Encore！
Sensu＠沙田
3/7/2022 12:00
多次行過Sensu，已被佢靚靚嘅裝修吸引，但次次都排晒隊。今次醒目，先係Openrice訂位，終於可以一試。餐牌靚到不得了，相片非常吸引，假日仲有Holiday Brunch，會員價仲平百幾蚊，二話不說，出賣少少個人資料登記入會先。咁靚嘅餐廳，都有穩陣嘅BB Highchair，BB Friendly，讚！
二人前套餐＄368有前菜、餐湯、一款飯／意粉、一款主菜同飲品。
餐湯係好好味嘅周打忌廉湯。
揀左小食拼盤，有炸到脆卜卜嘅雞翼、似乎係炸蠔，仲有滑嫰嘅胡麻豆腐。
和風照燒雞肉旋風蛋包飯
賣相靚靚，旋風蛋非常完整，中間係好多唔同配料嘅炒飯，加上酸甜番茄汁，小朋友好鍾意。
香煎豬鞍配蜜糖芥末醬
大大件豬鞍，切開中間熟成度岩岩好，都唔覺得好鞋，仲有啲肉汁。
加錢配是日甜品，係小蛋糕，唔太甜，岩小朋友。
蔚藍星球 ＄98
二人餐應該岩岩好夠兩個成人，我地仲有兩個小朋友，另外加個甜品等佢開心下。加左個獨狂洗版嘅吸精甜品。打開甜品，有啲抹茶蛋糕、慕絲、少少水果，各式各樣。
餐廳靚，食物靚，味道都ok，已好值得黎。