用九百秒品嚐神之炒蛋

澳洲牛奶公司@佐敦
22/8/2012 11:45
截至現時為止,喺開飯網擁有一千三百五十個好評嘅澳洲牛奶公司,可算係神級茶記。無論名氣、人龍、食物、速度都達神級程度。神在於人係絕對估唔到、諗唔明。今日終於有機會一試神之炒蛋。
早餐 ($26)
十二點前幫襯仍屬早餐環節,早餐嘆個牛油方飽、炒蛋、火腿通粉加飲品,廿六蚊埋單。熱杏霜飲落順口,有杏仁味,中規中矩,始終唔夠意樂咁好飲。至於奶茶就唔錯,茶味同奶味都夠濃郁,早餐提醒之選。
火腿通粉可以話比普通茶記出品更普通。湯係略咸嘅味精湯,通粉並無講究用坑通,只係普通不過嘅快熟通粉,而且煮得過腍,臨近變一pat粉嘅邊緣,不過火腿味道就幾香。牛油方飽烘得夠,中間嘅牛油落得重手,可惜麵包唔夠鬆軟,只屬中等級數。講到好味嘅牛油方包,首推民華茶餐廳嘅厚多士,一定好食過呢件一百倍。
試過前面幾樣,質素可算係比一般茶記更一般,開始懷疑開飯網嘅千幾個好評點樣呃番黎。不過此行嘅重點,應該係網友盛讚到天上有地下無嘅神級炒滑蛋,所以有心將神蛋留喺最後品嚐。蛋係普通不過黃黃橙橙嘅滑蛋,賣相並無過人之處。將一口滑蛋送入口就會發現神蛋嘅魅力。蛋香味濃,口感滑到不能再滑,半凝固結實之間仍帶有蛋汁,順滑溜口,可謂入口即溶。店方已經自行將蛋調味,少少嘅咸味更帶動黃香倍增,香味充滿口腔,係會令人食唔停口嘅味道。唔係講笑,亦無誇張,係咁耐之來,食過最好味嘅炒蛋,果然名不虛傳。
憑一款咁好味嘅炒蛋,呢間澳牛嘅生意可謂唔憂做,門外全天候排長龍就係證明。為左要消化呢條人龍,呢間小店嘅工作速度亦係極神奇,速度單位應該以「秒」黎計算更為合適。
位於人龍第八位左右,等候1分鐘已經可以入座。入場後,用45秒時間一邊安頓自己嘅身體同行李,一邊睇餐牌。睇完餐牌回過神來,身邊已出現一位侍應大哥聽候柯打。用5秒時間落左兩份套餐,2秒鐘之後,枱面已有齊所需架撐。拎起架撐作滿足心理嘅簡單清潔之間,一碟火腿通粉就送到。小結一下,從落單到第一樣食物送到,前後需時大約10秒。對於某啲叫野食總係猶豫不決嘅人士黎講,呢10秒鐘,可能係剛意識到「死啦,叫錯野添。」嘅時間。不過,當你醒覺之後,剛才「叫錯左」嘅野,就已經出現喺你面前。
接過一碗熱辣嘅火腿通粉,品嚐120秒之後,一碟更加新鮮熱辣嘅炒蛋多士就出現。再用480秒處理枱上所有食物,一聲令下,你杯飲品就喺10秒之內送到。去到此餐嘅尾聲,奢侈地用180秒時間慢嘆杯熱飲。最後用60秒時間收拾細軟,將座位放出黎,再行到櫃檯找數,離開一個有如打仗嘅戰場。由入場起計至離座,大約用左900秒。
觀察900秒所得,要應付咁龐大嘅客量,小店用都左唔少方法提高工作效率。
首先,學麥小朋友話齋,呢度嘅早餐、茶餐同快餐都係咁上下。只要控制到客人嘅選擇,食物自然出得快。雖然小店除左套餐之外,仲有一張水蛇春咁長嘅餐牌,不過因為呢度嘅神蛋實在太出名,食客自然地傾向選擇神蛋系列,廚房大可以運用大堆頭製作,乜都唔洗諗全力製作套餐嘅食物。所以留意到水吧長期有五、六碟火腿通粉,而食客亦無需要擔心擺耐左唔夠新鮮熱辣。呢度嘅食物流量,係出一碟、拎走一碟嘅流水式作業。加上長期有幾位侍應大哥喺水吧守候,摩打手式輸送食物,基本上你一落完單,新鮮熱辣嘅通粉就自動出現,時差不多過10秒。
另外,實在不得不讚下店內嘅小二哥。廚房出得快,小二哥都要處理得夠快。當日所見,上下左右嘅侍應大哥都係主動、積極、盡責、勤力,基本上就係優質員工嘅典範。更有趣嘅係,純粹經過觀察同聯想,估計佢地嘅運作模式,見證到店內分工做得極好,而且員工甚有默契。當你食完碟通粉放低隻湯匙,1秒之後,左邊就冒出一隻手拎走吉碗,右邊就送上一碟炒蛋多士。樓面大哥嘅步伐急速,卻無任何衝撞。表面上自各做緊自己野,實際上係有系統地貢獻整個運作流程。留意到幫我地落柯打嘅人,並唔係最後寫埋單嘅人。900秒之間,要收嘅通粉碗、炒蛋碟已經收晒,究竟B君如何知道我地呢份係$26、$28定$30? 觀察所得,發現有白色矮杯熱飲、透明玻璃杯凍飲同鋼杯凍飲,已經清楚分到三個價錢。再推上一層,凡係有通粉嘅客人,套餐必然有炒蛋配多士,多士哥可以唔洗諗就自動送上一份。可以話係店方設定套餐有深思,而樓面大哥亦培養出無需多講就識做嘅默契。外人睇係形同打仗般忙亂,睇通後發現係亂中有序,而實情卻係一啲都無亂過。
好多網友話呢度啲樓面好惡,一句公道話係,樓面大哥並無惡言相向,不過無論言語、行為都俾客人有壓力的確係事實。入座後自動企喺你附近聽候你柯打,落單時用提問方式加快你嘅柯打速度,再加上左右夾攻嘅超快速服務,令食客不自覺地跟上佢地嘅速度。兩個人分坐一張四人枱嘅一邊,900秒之間,對面嘅兩個位,先後有三個人坐過,不難想像客人流量之快,對家嘅速度亦都無形中拉扯我地嘅速度。作為一個有公德心嘅好市民,都應該要盡量配合,真係唔好意思慢慢嘆,更加無人會嘗試拎份報紙出黎睇。
網上流傳話有人肯出錢請人去澳牛坐一、兩粒鐘,不過無人認投。此舉唔算玩命,因為斷估店方唔會拉你出門口打,只會用言語、行為加群眾壓力迫使你合作。相信無人認投去惡搞,係出於對呢間小店嘅愛護,對神蛋嘅尊重。

成熟含蓄的賣非佛

貴族甜品@大角咀
19/8/2012 18:00
今日需要甜份。
去大角咀用埋啲團購券,一睇就知呢間貴族甜品同九龍城果間皇室有九成相似。今次完全唔考慮想定唔定,只係隨意選擇左兩款人氣甜品,來一個破天荒,呢個新嘗試就換來一個新的賣非佛。
龍珠二世 ($30,團購價$15)
爽脆水晶珠、煙韌黑珍珠,加芒果沙冰做基底。上面加上又酸又甜嘅芒果、朱古力味雪糕同龍眼肉。淺嘗兩啖覺得還可以。
宇治金時 ($30,團購價$15)
估唔到朱古力魔今日嘅重點會落喺宇治金時上。三十蚊一份,未計團購折扣一半,會唔會大碗得太慷慨? 真心欣賞小店做團購唔偷工減料。
抹茶刨冰做基底,加上一大堆蜜紅豆、白玉同一個綠茶雪糕,係宇治金時嘅基本配搭。綠色嘅茶配上一紅一白,好日本。小店話冰底係用來自日本嘅特級宇治綠茶製作,冰底有微甘嘅綠茶香。唔知係唔係小店特製,定係自然形成,最底層嘅冰綠茶味更濃郁。蜜紅豆的確又大粒又蜜,煮得夠腍。白玉係糯米丸子,煙煙韌韌,可惜無黎味道。不過只要每一啖都夾埋綠茶冰、紅豆同白玉,就會發覺佢地能夠起互補作用,味道既甜亦帶微甘,入口即溶又帶煙韌。最後一個奶味極重嘅綠茶雪糕更係亮點,可以舒緩甘苦味,讓你感受綠茶的香甜。
突然覺得甜品舖嘅朱古力甜品好細路,因為好多用朱古力做主調嘅甜品,都會改埋一啲極具童話氣氛嘅名稱,咩魔鬼森林、黑王子定朱古力天地咁。感覺上好合襯,但不失一點低能。惟獨宇治金時,一味唔常見,但見親都唔會改名嘅甜品。從名稱、賣相、配色、味道都極成熟嘅樣子。
從來,青綠色都係佔據小妹最討厭顏色排行榜第一位。宇治金時,一個日本極度出名嘅冰品,咁耐以黎都係睇到當睇唔到嘅選擇。但有時食得多甜到漏嘅朱古力,成熟地、含蓄地甜嘅綠茶甜品,可能係另一種選擇。可能從今以後,或會成為小妹一個新賣非佛。

大大粒,彈彈下,超A老翻魚蛋

安利大排檔@筲箕灣
13/3/2011 13:30

一向都甚少黎港島區,難得有事要落筲箕灣一轉,當然要去下筲箕灣嘅食街。
一條東大街有兩間安利,是但求其搵一間等位,都等左差唔多半個鐘。

魚蛋米 ($20)
呢碗魚蛋粉係可以一次過滿足晒三個願望,可以試晒魚蛋、蛋片、魚皮。
魚蛋大大粒,彈牙到不得了,幾驚佢彈走,係超爽口、超彈牙。又好夠魚味,但好彩唔腥。薄薄地嘅魚片就無乜特別,係比魚蛋香口少少。
竟然,連炸魚皮都好正,鬆脆、但唔油膩。熱氣版食法乾啃又得,想浸死佢腍晒食又得,得左。就一塊咁簡單嘅魚皮就可以為碗廿蚊雞嘅魚蛋米加分,好野!

墨丸豉油撈粗 ($24)
可能係呢度嘅特色,呢度啲丸全部都係大大粒。墨丸尚且算叫做OK,都仲係有少少咁多粉,但已經好過出面。撈粗麵又唔錯喎,個豉油醬汁甜甜地,幾有香味。

上網搵搵資料,好多人都話呢間叫大排檔嘅係翻版,但我又覺得翻唔翻版唔重要,啲野好食先緊要。就算如果佢真係翻版,我相信呢間都係超A貨嘅老翻,因為素質係唔錯喎。希望正版會更好,下次試!

後記
安利魚蛋粉麵@筲箕灣
15/8/2012 11:00

又黎筲箕灣搵食,二話不說就直衝入安利魚蛋粉試下正店。諗都無需多諗就柯打左切腩同魚片頭嘅配搭,話晒都係招牌菜,點都無錯。

切腩魚片頭河 ($30)
三十蚊一碗有清湯切腩同一大堆魚片加頭,其實相當足料。出面食一碗清湯腩都三十幾蚊,仲未計你要雙拼。清湯切腩最好就有肥有筋,膠質豐富,食起黎唔韌,仲有黏黏嘅口感。清湯腩本身有少許甜味,牛味亦夠濃郁。當然比唔上出名嘅清湯腩,但以一般麵檔質素黎講都算唔錯。炸魚片頭係此店名物,味道好香,明顯係外片炸得酥脆嘅香味。魚片有魚味,入口亦爽口彈牙,但略嫌咸左少少。

切腩牛丸麵 ($30)
另外一碗選擇左牛丸,呢度嘅牛丸似乎係手打,纖維比較多,而且仲有果皮味,味道似酒樓嘅山竹牛肉。

總結一句,如果過開港島經過的話,呢間小店都不妨一試。

MB白木屋

白木屋@九龍灣
12/8/2012 19:30

Babybamboo $60買$100用,買左兩張有$200洗。

正宗廣島風薄餅 ($56)
粉多過頭啦。

香蒜牛油帶子 ($48)
牛油味夠香,但只屬一般,可來一番人氣?

和風滑蛋炸豬扒 ($58)

鐵板鹽燒牛利 ($58)

屋店風日式炒麵 ($56)

明太子芝士雲吞 ($36)

不得了。之前APM果間咁好食,Mega Box呢間完全唔掂!