by admin | 6 月 11, 2026 | Blog, 中菜, 四川菜, 小食, 沙田, 燒烤, 西北菜
沙田 11/6/2026 12:30
今次去咗「小野人串燒」食午餐，滿滿炭烤香味，有驚喜。午餐選擇多，仲可以優惠價追加小食。
大漠燒羊肉串飯 $89﹕配宮廷小茄子，五大串羊肉串份量十足。羊肉串得肥瘦相間，炭烤到外層微微焦香，撒上孜然同辣椒粉，肉質都幾滑，帶點羶味，非常正。加配小野人菠蘿沙冰($16) 夠解膩，沙冰幼滑綿密，酸酸甜甜，超暢快。
台南肉飯 $48﹕賣相不錯，滷肉飯肥瘦相間，滷到入晒味，肥肉部分腍滑得入口即溶，油脂香又唔覺膩，瘦肉入味，最正係滷汁濃稠香醇，鹹中帶甜，撈飯一流。
小野人燒牛肉串 $28﹕肉質細緻鮮嫩，牛味勁香。
台灣香腸 $36﹕香腸大大條，腸衣微焦脆卜卜，中間肉滿滿豬肉餡，肉汁豐富鮮味。
北海道蒜蓉粉絲大扇貝 $57.8﹕新鮮扇貝配上大量香蒜粒烤熟，仲有勁索汁嘅粉絲，超惹味。
烤香滷肥腸 $51.2﹕聞到陣陣炭火香，同埋肥腸膻味，入口滑，脂肪濃厚，油香味十足。
燒嫰雞肉串 $23﹕雞肉烤到外層微微焦香，鎖住滿滿肉汁，仲有青蔥更香。
燒魷魚鬚 $26﹕烤到邊位微微捲起帶少少焦邊，咬落爽脆彈牙，越嚼越有味，調味微甜，不錯。
燒雞脆骨 $23﹕烤到金黃焦香，脆卜卜嘅口感，鹹香調味。
牛舌芯 $23﹕牛舌芯部位本身肉質嫩滑，烤到微脆，入面就嫩滑多汁，肉味濃郁帶油香。
by admin | 6 月 7, 2026 | Blog, 外賣, 大埔, 日式料理
大埔 7/6/2026 17:00
點齊幾款人氣日式丼飯加小食。
壽喜燒牛肉飯 $57: 牛肉片燜到完全入味，壽喜燒醬汁甜鹹平衡，醬油同糖嘅比例剛剛好，牛肉腍滑多汁，肥瘦相間，再加埋焾身洋蔥嘅天然清甜，白飯吸滿晒精華。
滑蛋鰻魚丼 $66: 份量十足，滑蛋上面有大半條鰻魚。鰻魚肥美油潤，肉質軟綿，蒲燒汁味道香甜。半凝固嘅滑蛋入口幼滑，蛋味香濃，加上鰻魚汁送飯非常正。
滑蛋雙拼雞扒牛肉丼 $60:一碗食到雞同牛兩款肉，雞扒煎到外皮微微帶焦香，咬落嫩滑唔柴，牛肉就鮮嫩多汁，兩款肉鋪上嫩滑滑蛋，鹹香惹味。
日式炸餃子 $29: 炸到金黃帶脆，餃皮薄脆，入面肉餡鮮甜爆汁，肉香夠晒足，蘸少少醋同醬油更加開胃。
by admin | 6 月 6, 2026 | Blog, 外賣, 大圍, 港式
大圍 6/6/2026 15:30
家常兩餸，今次叫咗兩淨餸，揀咗咖哩薯仔雞翼同豉椒排骨，另外仲有豆腐班腩同番茄炒蛋可以選擇。淨兩餸$40一盒真係非常抵食。
咖哩薯仔雞翼咖哩汁熬得濃稠馥郁，薯仔煮到腍，完全吸晒咖哩嘅香氣，雞翼有四大隻，燜得入味，肉質幾滑。豉椒排骨係醃得好入味，豉汁鹹香濃郁，肉質軟嫩，有骨有肉。豆腐班腩嘅班腩肉厚，豆腐就完全吸晒醬汁嘅精華，食落滑嘟嘟又惹味。番茄炒蛋酸甜濃郁，蛋炒得嫩滑鬆軟，送飯一流。
by admin | 6 月 6, 2026 | Blog, 拉麵, 日式料理, 旺角
旺角 6/6/2026 13:30
蒲燒鰻魚飯定食$88﹕賣相靚，鰻魚舖滿整碗飯面，蒲燒醬汁油亮，鰻魚肉質肥美厚實，入面非常嫩滑，完全無腥味，鰻魚有豐腴嘅油脂香。蒲燒醬汁甜中帶鹹，最正係醬汁滲入埋底層嘅白飯，粒粒飯都吸滿晒鰻魚同醬汁嘅精華。
今次試咗自選天婦羅豚骨湯蕎麥麵$30，最正係可以自己揀料，今次就一次過豪晒，揀齊黑毛和牛 $52、穴子$24、珍寶蟹柳$20、鮮帶子$20、鰻魚$20、帆立貝$14同杏鮑菇$8，陣容真係非常華麗。豚骨湯底鮮甜，蕎麥麵本身就煙韌爽彈，淡淡嘅蕎麥香。每件天婦羅都炸到外層金黃酥脆，個漿炸得薄而脆，黑毛和牛一咬落去油脂即刻散開，嫩滑又香口；穴子炸完依然保持鬆軟嫩滑鮮甜；珍寶蟹柳爽口彈牙；鮮帶子同帆立貝鮮甜，外脆內裡仍然飽滿多汁；鰻魚有驚喜，肥美油潤，本身已有蒲燒汁，炸左更好味﹔杏鮑菇都炸得外脆內嫩，啖啖菇香爆汁。加多兩支日本汽水，午市無加一，超滿足!
by admin | 6 月 6, 2026 | Blog, 外賣, 旺角, 港式, 甜品, 麵包
何文田 6/6/2026 12:30
最鍾意呢啲新鮮出爐麵包小店。今次試咗四款甜品，每一款都有驚喜！
花生糯米糍 $6﹕大大粒好吸引，外皮煙韌軟糯，咬落去口感彈滑，入面包住勁澎湃嘅花生碎，甜味適中。
古早味芝士蛋糕 $18﹕質感輕盈細膩，口感綿密如雲，芝士味都幾香濃，食落好順喉。
古早味肉鬆蛋糕 $20﹕鹹甜派甜品嘅代表，蛋糕鬆軟濕潤，配上表面鋪滿嘅香酥肉鬆，鹹香同甜香互相配合，估唔到咁好食。
朱古力心太軟 $12﹕外層蛋糕烤得剛好，輕微脆脆，切開即刻流出濃郁滑潤嘅朱古力漿，非常香甜，勁驚喜。
by admin | 5 月 31, 2026 | Blog, 中菜, 酒店, 酒樓, 馬鞍山
馬鞍山 31/5/2026 18:00
今日試中菜，揀左幾款招牌菜。
晚市孖寶$338。金銀蒜粉絲蒸聖子皇﹕陣陣蒜香蒸，聖子皇飽滿，肉質鮮嫩彈牙，味道都幾鮮甜，粉絲索汁夠惹味。
岩石火焰黑豚燒皇﹕上枱有火焰效果，黑豚肉本身油脂分佈均勻，帶微微焦香，滿滿肉汁，肉質爽滑，醬汁鹹甜味不錯。
豉油皇龍鬚炒麵 $128﹕炒麵幼細，口感爽彈，炒得夠鑊氣。豉油皇醬香濃郁，仲有魷魚鬚、芽菜等唔少配料。
椒鹽包仔豆腐 $78﹕包仔豆腐炸得外酥內嫩嘅，外層金黃酥脆，中間都幾軟嫩，豆香香，加上椒鹽，帶微微香辣，幾惹味。
晚市送甜品，芝麻糊味道微甜，芝麻幾香。紫米椰汁糕，紫米幾軟糯，椰汁味幾香，配合得不錯。
味道雖不錯。晚市茶錢$20/位，仲有一碟花生$20，連加一都要$688，唔平。
