by admin | 3 月 24, 2024 | Blog, 中菜, 小食, 深圳, 甜品
深圳中洲灣 24/3/2024 15:30
今次又抽中大眾點評免費試,雖然餐單只價值50元,但近近地嚟到中洲灣食都可以當下午茶,原來係潮式茶店。
阿嫲手作甜湯 25元
材料非常豐富嘅甜湯,有兩大粒湯圓,花生味同芝麻味,皮夠薄,醬料較多,咬開之後爆曬出嚟,味道唔錯。仲有好多粒煙煙韌韌嘅芋圓、桃膠,紅豆等。仲有啲類似淮山嘅材料。本身個甜湯未到未添,相當飽肚。
阿嫲炸物三併 25元
三款炸物包括肉腸、外皮脆脆的,中間幾個爽口,都有肉汁。炸蝦餅炸得香脆,蝦肉大大隻,非常爽口。最後一款應該係類似炸芋頭餅,仲有好多蝦米,都幾香脆,炸物略嫌炸得太乾身。
坐落商場地庫嘅一角,人流唔多,食嘅嘢比較特別,出邊唔常見,可惜味道唔太突出,試完就算,冇乜吸引力。
by admin | 3 月 17, 2024 | 外賣, 小食, 馬鞍山, 麵包
馬鞍山 17/3/2024 12:00
樓下開咗咁耐都未幫襯過,見到Klook有$15一張換領券,買咗兩張,今日換咗兩件三文治做早餐。
滿漢($23)即係綜合口味,有芝士,火腿,加上招牌嘅醬汁。麵包本身幾軟熟,感覺新鮮,材料俾得夠足,好飽滿。賣相不錯,切到好工整。
另一款係草莓芝士($22)係香甜口味,加咗草莓果醬,甜甜酸酸。
$15一件性價比算可以,正價未必考慮。
by admin | 3 月 10, 2024 | BB Friendly, 壽司, 日式料理, 馬鞍山
馬鞍山 10/3/2024 12:00
by admin | 3 月 3, 2024 | 外賣, 旺角, 甜品, 麵包
旺角 3/3/2024 17:00
估唔到旺角火車站收埋咗一間排隊人氣名店麵包舖,各大網絡媒體都推介。從櫥窗見到所有麻糬麵包色彩繽紛,非常吸引。
麻糬QQ球 $48/6個
一盒裝住六個麻糬QQ波賣相好靚,麻糬球都幾大個,麻糬本身煙煙韌韌,估唔到比較軟熟嘅質地。仲幾濕潤,再加上唔同味道,非常甜。
朱古力Oreo:中間係煙煙韌韌嘅嘅朱古力味道麻糬,面層灑上Oreo碎,相當甜。
朱古力豆豆:同樣都係朱古力味麻糬,面層加左脆皮朱古力,MM豆。
脆皮紫薯:面層好似菠蘿皮脆卜卜,中間麻糬仲有粒粒紫薯肉,好驚喜。
另外買咗盒士多啤梨爆漿牛角酥$28,賣相吸引,牛角酥本身好脆,中間係微甜微酸嘅士多啤梨忌廉,凍冰冰好好味。
by admin | 3 月 3, 2024 | 外賣, 旺角, 飲品
旺角 3/3/2024 14:00
奶蓋奶味濃,微咸,不錯。果汁飲得出去係黑提味,冰粒略嫌打得唔夠細。
by admin | 3 月 3, 2024 | Blog, 旺角, 樓上cafe, 韓國菜
3/3/2024 12:00
今日出旺角,朋友介紹去旺角726大廈搵食,原來交通都幾方便,全座大樓都好多食肆。
揀咗呢一間非常之正宗嘅韓國餐廳,餐廳細細,坐梳化位都幾舒服。
店員先送相前菜三款,泡菜輕微辣,非常新鮮。大豆芽菜麻油味香,非常爽脆。
無骨芝士燉雞 $278
實在太豐富,一大盤嘅份量,足夠3至4人分享。材料豐富,無骨雞肉大大件,都好多舊,肉質其實有啲實。好彩仲有好多煮到入晒味嘅薯仔、紅蘿蔔等。最好味當然係索晒醬汁嘅冬粉,非常之滑溜。醬汁甜甜的,小朋友都好鍾意。選擇加芝士版實在冇揀錯,芝士勁厚,份量超多,咸鮮味十足。
牛肉紫菜包飯 $78
賣相討好,每件材料都好豐富。紫菜脆卜卜,有麻油香,包住飯、黃瓜、甜蛋等,牛肉應該用醬汁煮過,非常之香甜。
藍檸梳打 $32
藍色嘅飲品,大大杯,非常吸睛。檸檬本身都好新鮮,梳打微甜,正好解膩。
全餐感覺非常正宗,值得一試。但價錢略貴,未必會返轉頭。