by admin | 1 月 19, 2025 | 外賣, 深圳, 甜品
購物公園Coco Park 19/1/2025 16:30
提拉米蘇咖啡芝士蛋糕 49元
原本芝士蛋糕芝士味香濃，口感濕潤，加咗咖啡，味道濃烈，面層仲舖滿濃郁、帶輕微苦味嘅朱古力粉，完完全全就係提拉米蘇嘅完美演繹。
崗廈北卓悅中心 17/11/2024 17:00
栗子紅茶芝士蛋糕 49元
芝士蛋糕本身芝士味香濃，口感濕潤，喺呢個基礎上加上紅茶嘅香味。上面在之上超級多嘅栗子蓉，栗子蓉幼滑，栗子味香，微甜，估唔到呢個配搭都相當好食。
東門太陽廣場 11/10/2024 17:00
海苔肉鬆芝士蛋糕 49元
喺芝士蛋糕嘅基礎上，加上超級多肉鬆同紫菜，本身甜味嘅芝士蛋糕加一分鹹鮮味。根本就係一個巨型版嘅肉鬆小貝。
深圳萬象天地 14/7/2024 17:00
巧克力芝士蛋糕 49元
雪凍咗之後非常好味，朱古力味濃，亦都有芝士味，口感濕潤黏口，味道不錯。
深圳深業上城 26/5/2024 17:00
茉莉輕茶芝士蛋糕 49元
芝士蛋糕質哋濕潤黏口，芝士味本身好濃，再加上香濃茉莉花味，香味相當突出，非常特別，但唔太啱個人口味。
深圳益田假日廣場 3/9/2023 18:00
原味芝士蛋糕 39元
深圳人氣芝士蛋糕，次次見親次次行過都見到排長龍，今日特登去遠少少，真係好彩唔使點排隊。行過店舖前邊已經俾佢嘅香味吸引。
返到屋企打開包裝，除咗有芝士蛋糕之外，仲有非常齊全外賣餐具。蛋糕芝士味香濃，口感濕潤棉襪，下邊仲有幾多提子乾加少少點酸味，都幾似大阪老爺爺。雪凍食，有少少食雪糕嘅感覺。
by admin | 1 月 19, 2025 | BB Friendly, Blog, 中菜, 深圳, 麵食
深圳中洲灣 19/1/2025 11:00
點評抽到一份湯煮料理一人餐。湯底係白果藥膳豬肚雞湯，湯頭非常清新鮮甜，原汁原味，係健康嘅味道。熱辣辣，好暖胃，而且無任何加入調味料，亦都唔覺有味精，店家提供獨立包裝鹽和胡椒，係按需要自行加入。介紹話湯底加左黨參、沙參、西洋蔘同玉竹等，好滋補。細長透明的嘅粉絲吸飽左湯汁，好順滑。
配料有些排骨、潮汕手工豬肚丸、手工馬鮫丸，丸類爽口彈牙有肉汁，味道不錯。仲有好多新鮮蔬菜，如娃娃菜、冬瓜、生菜、薯仔、金菇、腐竹等。菜葉吸收湯汁，瓜類保留清脆嘅口感。
值得一提沙茶醬起左提味作用，新鮮淡嘅餸菜配料變得香濃。
牛奶桃膠雪燕頓時有驚喜，飲得出鮮奶嘅香濃，仲有好多細細碎碎嘅桃膠同雪燕，味道微甜，原汁原味。
by admin | 1 月 18, 2025 | 外賣, 甜品, 西餐, 馬鞍山
麥當勞@馬鞍山 18/1/2025 15:00
Oreo曲奇福岡草莓新地 $10
香港麥當勞今期新出的主題雪糕實在不得了呀！ Hello Kitty主題雪糕杯，非常靚，有很多圖案。今期係日本福岡士多啤梨味雪糕，味道酸酸甜甜，士多啤梨味幾香。雪糕有別於平時嘅形狀，係圓碌碌非常可愛，而且口感幼滑。上面仲淋咗大量朱古力醬，加咗一塊。迷你Oreo曲雪糕，不錯。
by admin | 1 月 12, 2025 | 外賣, 樂富, 沙田, 甜品
沙田 12/1/2025 19:30
三色芋圓豆花 $30
豆花以濃郁的豆乳製成，入口滑順，豆香味濃。三色芋圓軟糯彈牙，紫色芋圓係紫薯，白色芋頭，黃色番薯帶有微微的甘甜，滿滿溫暖。
拉絲麻糬芋薯豆花 $45
新推出冬季期間限定嘅豆花甜品的，有最鍾意嘅拉絲麻糬。以豆花為基底，加上辣味十分嘅薑湯水。豆花依然入口即化，充滿大豆香。亮點一定係拉絲，麻糬軟韌Q彈，食得出微甜嘅米香，而且韌度十足，絕對能夠拉絲。仲有大大件三色芋薯，粉嫩芋頭、與金黃香味番薯，仲有香香紫薯。完完全全就係番薯湯水加豆花。
沙田 3/2/2024 16:00
今日嚟到沙田，知道河畔花園收埋咗一間豆乳狂人，正好可以買個豆花做下午茶。小店細細只做外賣，買返屋企慢慢嘆。
黑糖珍珠豆花$28
豆腐花本身豆味重，都非常滑，豆腐花嚟講質素相當高，味道微甜， 正好食得出豆嘅香味。其中一款加上黑糖珍珠，多一份黑糖味，珍珠煙煙韌韌，配合豆腐花相當不錯。
三色芋圓豆花$30
另一款加上我最愛嘅三色芋圓，芋圓都相當多，口感煙韌，食得出有芋頭、南瓜、紫薯味道，相當不錯。
原來唔同分店餐牌唔同價錢都唔同。
樂富 30/7/2023 15:00
今日嚟到樂富廣場食完個午餐，見仲有空間搵甜品食。就喺附近見到呢一間豆腐花專門店，環境相當闊落，有座位，又可以放得入BB車，非常正。
三色芋圓豆花 $32
呢款比較簡單，只係豆腐花加三色芋圓，芋圓都口感煙韌，有南瓜、紫薯等味道，相當不錯。豆花本身都幾滑，豆味幾香。
紫紫之選 $63
期間限定嘅一款甜品，配料相當豐富，粉紫色賣相好靚。豆腐花幾重，質地實淨得來都算滑。除咗豆腐花之外仲加咗紫薯蓉，口感綿密，味道清甜。出面仲有非常多嘅三色芋圓，每粒抖音煙韌韌，味道幾突出。
估唔到一碗平平無奇嘅豆腐花都可以變得咁豪華，真係新一代食法。
by admin | 1 月 12, 2025 | BB Friendly, Blog, 沙田, 越菜
越男仔@沙田 12/1/2025 18:30
沙田圍呢度其實都好多餐廳，今日食呢間越南仔，餐廳裝修充滿着好多玩味嘅佈置。
紅蕃茄火車頭煲 $155
天氣凍叫咗個火車頭煲，一上枱已經非常豪華。濃郁嘅蕃茄湯基底，酸酸甜甜，用料十足，食得出好多新鮮蕃茄肉，豆角，洋蔥等。火鍋材料非常豐富，包括牛肉片、牛筋、牛丸等。牛肉片嫩滑多汁，牛筋膠質滿滿，牛丸非常彈牙又爆汁。加$8加配黃薑飯絕對值得。黃薑味香濃，仲食得出好香嘅香茅同埋椰奶味。淋上濃郁嘅番茄湯汁，小朋友都胃口大開。天氣涼涼哋，食呢個熱辣辣嘅湯鍋實在非常正斗。
蒜蓉牛油海南雞脾撈金邊粉 $98
主角海南雞脾非常嫩滑，皮肉均稱，上面淋上蒜蓉牛油汁，濃郁而不過膩。金邊粉非常爽口彈牙，米味香濃，仲加咗好多新鮮蔬菜，好清爽。撈金邊粉嘅靈魂醬汁魚露，酸酸甜甜帶微辣，咸香味濃，清爽解膩，可算係食過最高質嘅撈金邊粉。
三色檬紙卷拼盤 $138
賣相一流，色彩繽紛。拼盤有三款特色檬紙卷，每款嘅基本元素係檬紙加滿滿嘅蔬菜同檬粉，蔬菜的確好新鮮。牛炸醬帶著燒烤香氣，牛肉軟嫩帶微辣。煙三文魚咸鮮味十足。手撕雞一絲絲肉質細嫩多汁，感覺健康又清爽。整道菜色彩鮮豔，好睇又好食。
椰汁拉茶紅豆冰 $36
以香濃嘅椰汁為基底，口感濃郁順滑，加上濃郁嘅拉茶。底下嘅紅豆煮至軟糯，帶天然香甜味道。飲品層感豐富，好飽足。
鮮菠蘿梳打冰 $35
另一款清新怡人嘅特飲，新鮮菠蘿酸甜適中。最驚喜就係原玻璃樽梳打，慢慢倒入菠蘿冰裏，菠蘿嘅自然酸甜味同梳打水非常夾，氣泡又夠晒多，非常清新，非常解渴。
餐點單價其實唔算平，全單$517，但係菜式份量同質素對得住價錢。無論係賣相，食物嘅味道，都食得出非常正宗講究。感覺上小店係自家經營，老闆及店員都非常之親切有禮，亦都好體貼小朋友嘅需要。好難得今時今日仲有咁嘅服務態度，全餐飯都係非常之滿足。
by admin | 1 月 12, 2025 | BB Friendly, Blog, 小食, 甜品, 西貢, 西餐
西貢 12/1/2025 13:00
今日來到西貢，海邊有好多舒適嘅餐廳，揀咗呢間Square，空間感十足非常適合親子。菜單選擇非常多，揀咗一款pizza，一份漢堡，再加一啲小食甜品。
BBQ Chicken Pizza $188
Pizza超級大個，好喜歡佢薄薄嘅餅底，口感煙靭，批邊脆脆的。材料非常豐富，有好多雞柳、燈籠椒，最重要嘅係一層厚厚嘅芝士。醬料係酸酸甜甜嘅燒烤醬，非常滋味。
Maple Bacon Cheese Burger $160
非常澎湃，賣相好靚嘅楓糖煙肉芝士漢堡。安格斯牛肉漢堡扒濃郁多汁，用楓糖漿烤至金黃酥脆嘅煙肉先最驚喜，脆到好似薯片咁，味道香甜。芝士都毫不吝嗇，完全覆蓋漢堡。麵包經過烤焗，但牛油香，外皮脆卜卜。
Cajun Prawn Aioli Chips $62
奇尊粉蝦 香蒜蛋黃醬薯條
金黃香脆嘅薯條，外脆內軟。上面加咗香蒜蛋黃醬，蒜蓉味香濃，帶少少辣味。上面仲有幾隻墨西哥風情奇尊粉蝦，爽甜彈牙，好新鮮。撈埋薯條一起食都好夾。
Hazelnut French Toast Box $138
睇相片已經非常吸引，實物來到簡直100% match，超級靚！大大件全個法式多士磚，原來中間加咗大量嘅榛子脆米醬，超級濃甜，脆卜卜。多士上邊有大量香蕉、朱古力片。值得一提雲呢拿雪糕好滑，而且士多啤梨係超級甜。為濃郁嘅甜品加一份清爽。
全單$600，主菜到甜品都大大件，份量十足，而且味道相當不錯。最喜歡佢環境舒適，座位闊落，小朋友需要嘅BB椅，兒童餐具都齊全，好適合一家大細，難怪人氣十足。
