哈囉茶餐廳

哈囉茶餐廳@佐敦
24/6/2012 19:30

成日行過柯士甸道都唔知開左間新餐廳。$99食二人東南亞晚餐,又話有巴基斯坦咖哩、印度海鮮炒飯、印度薄餅咁,好似幾抵。早一日打電話訂位,去到就知道人流唔多,本以為訂位只係象徵式,但一入去無耐,啲人就好似跟住我地尾,不停入場,七點半已經全場爆滿。

冬瓜湯、飲品

蛋沙律
呢個蛋沙律係呢店人氣好評食品,個個都話難得茶餐廳嘅前菜出動到蛋沙律,而且味道都唔錯。呢個蛋沙律一來份量夠多,二來夠凍。粒粒蛋白加薯仔粒,再撈埋黃蛋醬就係咁簡單。味道唔錯,醬料好香,整體粉粉甜甜,拌生菜一齊食亦得。

印度海鮮炒飯
飯夠乾身,有好香咖哩味,少辣。材料唔太多,蝦仁、蜆肉、蟹柳、魷魚、生菜,甜椒等。

巴基斯坦咖哩雞配印度薄餅
味道濃郁,極富層次,重香料味,少辣,有薯仔,幾件雞。印度薄餅唔算鬆化煙韌,微焦,牛油味重。

雪糕紅豆冰
牛記三色雪糕加紅豆

原來正價一份晚餐,都係大約四十零蚊,團購九十九 蚊無特別平,同正價差唔多,一次就算。

求其寫篇。東哥蒸飯

東哥點心籠仔蒸飯專門店@荃灣
24/6/2012 14:00

 
食完雞蛋仔,先去食正餐,因為呢個團購只適用於下午兩點後。兩點黎到,原來呢間舖勁多人,門口堆滿等位嘅客人。咁多客,仲洗做團購? 團購餐$17包一款點心加一款腸粉,可以再加其他點心,兩個人食得飽飽。

東哥蝦餃皇 ($19)

蜜汁叉燒腸 ($15)
腸粉比較黏身,唔算薄,但餡料幾多,叉燒配埋芫茜,味道幾香,豉油都幾香甜。

蟹籽燒賣皇 ($15)

米網炸兩腸 ($18)
白腸粉皮包住火網炸蝦春卷,幾脆口,而且啲蝦都幾爽口,唔錯。

蒜蓉蒸蝦飯 ($35)
終於黎到全餐嘅重點,大籠蒸飯,原來$35真係好大籠。一打開籠蓋,一陣蔥蒜味撲鼻,真係好香。飯面舖左七、八隻大蝦,蝦吸收晒蒜香味,可惜蝦唔新鮮,蝦肉比較霉。飯蒸得乾身,粒粒分明,除左蔥蒜,再加埋甜甜地嘅豉油,同埋蝦嘅甜味,呢個飯認真唔錯。

香煎蘿蔔糕 ($10)
又粉,又碎,又無料,講完。

百醬蒸鳳爪 ($14)

沙茶蒸牛肚 ($16)
醬料幾夠濃味,幾香,OK。

此餐用左兩張優惠券,另加一個飯,三個點心,團購優惠仲免茶芥,最後補番$75,全餐總數$109。點心一般,價錢一般抵。溫馨提示,如果唔食蒸飯,唔洗特登黎。如果特登黎的話,記得去隔離英皇廣場嘟一嘟發達通,搭地鐵平兩蚊。

出一點Money,換一點堅持

荃灣古法雞蛋仔@荃灣
24/6/2012 13:30

行過荃灣德海街呢條小巷,都會聞到陣陣蛋香,原來呢間古法雞蛋仔係區內出晒名嘅,早前仲喺報紙專欄見報添,真係唔講唔知。一底雞蛋仔要$16,似乎比一般貴,但好多人話,試過就知道區區幾蚊係絕對值得俾。由於時間尚早,未見人潮。落單之後,雞蛋仔係即叫即整,仲睇晒全個製作過程,蛋香越來越濃郁,越等越想食。

朱古力雞蛋仔 ($16)
價值十六蚊一底嘅雞蛋仔,新鮮熱辣,拎上手非常有份量,可算係一般雞蛋仔兩倍重量,真材實料。雞蛋仔每粒都圓轆轆,惟外層並無滑到閃令令嘅外皮,只係保持雞蛋仔天然嘅奶黃色,有微細嘅氣孔,睇落似蛋糕,感覺反而仲真實。呢款朱古力味並無古銅色肌膚,係原用原味蛋漿,再起勢加上朱古力粒焗成。從表層黎睇,朱古力粒都唔少。

雞蛋仔講唔上非常香脆,但每粒雞蛋仔之間嘅薄皮,係脆到不得了。爆開蛋殼係充實而且飽滿嘅內餡,每一口都食到雞蛋仔嘅鬆軟,程度好比講大話蛋糕。味道方面亦算唔錯,蛋味還可以,朱古力味勁香濃,朱古力魔收貨。感覺上,比混和左朱古力醬嘅蛋漿更好,起碼兩種味道都食得到。一句講晒,呢度嘅雞蛋仔的確有水準,真正做到既脆且軟,味道亦唔錯,值得專程黎試。

至於價錢方面,十六蚊的確唔平,街邊仍有唔少十蚊一大底嘅選擇,不過質素絕對比唔上,睇你點揀。其實諗番轉頭,N年前十蚊一底雞蛋仔已經可以好高質素。時至今日,可能生意難做,有經營者選擇偷工減料,減低成本,將蛋漿溝稀務求做多幾底,雞蛋仔變得無內涵。亦有經營者堅持選用優質食材,通脹令成本增加,消費者自然要俾多幾蚊。俾多幾蚊除左食到好味雞蛋仔之餘,亦感受到小店對食品製作嘅一份堅持。家陣質素稍為好啲嘅雞蛋仔,又點至十蚊呀。

慢嘆神級傳說之丼

丼丼屋食堂@大埔
14/6/2012 13:00

上回講到,小女子黎丼丼屋食堂食過親子丼後,無啦啦被抽中做問卷調查,做完問卷就變三十蚊現金。早排睇報紙見到丼丼屋有新出品,一於去試下。

盛豚丼 ($58)
呢款期間限定嘅神級丼飯,係丼丼屋同日本丼食專門店「伝説のすた丼屋」嘅社長早川秀人先生合作,將「日本伝說のすた丼」帶黎香港。據講喺日本,每日有唔少人會特登走去排隊,食呢個原本係員工膳食,只係熟客仔先識得叫嘅隱藏版丼飯。呢個丼飯吸引左好多唔熟嘅客,變成熟客,老闆決定將隱藏不再隱藏。最後仲成為全日本最受歡迎嘅丼飯No.1,風行日本足足四十年。

豚肉滿滿舖喺飯面,中間加一隻白裡透橙嘅溫泉蛋,配上幾片蘿蔔漬物,一陣蔥蒜味香到不得了,一碗盛豚丼隆重登場。職員指示標準食法係將溫泉蛋摧毀,將蛋液拌勻豚肉同飯一齊食。不過,破蛋之前要先試原味。

先黎一片透薄豚肉,喺完全唔知道隻豬仔姓什名誰,邊度出產嘅時候,單憑入口嘅感覺都知道豚肉並非普通貨色。原來豚肉選用來自北意大利嘅頂級乳清飼豚肉,亦即係巴馬火腿嘅原材料。單張有寫什麼喺自然環境生長,以原始方式養殖等,反正總結一句就係高質素產物。豚肉嘅脂肪分佈非常平均,簡單黎講就係半肥瘦,肉質爽口嫰滑。肉汁非常豐富,入口帶有油香,油脂越咀嚼越甘甜。加上秘製醬汁香煎後,豚肉多一點焦香味。

所謂嘅秘製醬汁,係「伝説のすた丼屋」沿用四十幾年、自家研製、世代相傳嘅醬油。豚肉醃製後,充分吸收左醬汁嘅蒜香味,鹹香得黎,肉味都無被搶鏡。蒜香加上豚肉油香,呢個化學作用實在迷人。說實在,秘製醬油落得幾重手,味道略鹹,但拌飯食係剛好的。不得不提,丼飯仲加左唔少青蔥,同蒜香味相交融,香氣滿溢,更加惹味。

盛豚丼除左豚肉之外,一隻溫泉蛋亦係重點所在。溫泉蛋滑溜到不得了,破開蛋黃後,蛋液同飯混為一體,豚肉多一分蛋香,亦完全解決到蒜醬油嘅略鹹問題。而蛋汁亦令粒粒秋田小町米更加晶瑩剔透,黏黏軟糯。最後毫不猶疑,將所有材料反轉再反轉,撈完再撈,將醬汁同蛋液滲入每粒飯之中,味道互相補足配合,融合為一,真係唔錯。不自覺地放慢速度,慢慢品嚐每一口美味。

臨走時,職員邀請作一個簡單意見調查,問下盛豚丼嘅賣相、味道、價格等。不嬲呢度嘅食品賣相都係OK的,味道唔差。至於價錢方面,其實係相對嘅,睇你點睇。以日式料理黎講,$58一碗丼飯,有番咁上下質素,其實都算合理。但以午餐黎講,食一碗飯就要$58,仲要加一,埋單$64,真係幾貴。不過,今次有三十蚊現金使,埋單補番$34,乜都抵番。

到最後一條問題,問會唔會再食多次呢個飯,小女子好決絕咁答「應該唔會」。職員一面錯愕,相信潛台詞會係「有無攪錯」外加十個問號,心諗以上問題全部都勁讚,竟然唔願意再試。睇見佢將原本坐定粒六劃定嘅剔號塗去,一臉疑惑咁問「點解呢?」,佢個表情絕對符合Kawaii嘅定義。註,此職員係一位廿來歲嘅陽光男孩子。對於呢個廿來歲男孩子嘅疑問,我只好補答一句,「下次黎會試其他款式啦。」佢嘅表情即刻順番晒。真係對唔住,我唔興同一樣野試兩次。

驚險山林兌換記

新加坡文華雞飯@尖沙咀
6/6/2012 15:00
13/6/2012 15:00

玩左團購咁耐,近排越來越多事幹,似乎團購泡沫越來越勁。作為消費者,都分外小心。可惜,連一直看似有信譽嘅蜂賣都開始出事,買左兩張$50換$100山林道現金券,都要快快脆用埋。幾經考慮之下,最後半推半就連續兩個星期三去食同一間餐廳。

叫得做新加坡雞飯,唔食海南雞飯,不如唔好黎。最後選擇左新加坡叉燒飯套餐同燒雞飯套餐。套餐包括一個主菜、一個飯、一碟油菜,仲包埋肉骨茶或飲品,相當豐富。

首先,最抵讚就係海南雞飯三款醬都齊全,放喺每枱自由任加。特別欣賞呢度嘅黑醬油,味道濃厚,而且酒味香醇。酸辣醬除左酸味之外,蒜香味十足,辣味比較強。而薑茸就比較淡口,無乜特別。

燒雞飯套餐 ($68)
第一次黎,就貪得意叫左個燒雞飯。呢款燒雞,並唔係燒到脆卜卜嘅雞,反而似係油雞,外皮有醬油色水,賣相都唔錯。燒雞已去骨,所以食起黎非常方便。雞肉夠腍身,有皮有脂肪, 嫩滑度唔錯,但雞味較為淡,反而雞皮嘅醬油香更搶鏡。

白雞飯套餐 ($68)
第二次黎食,再試傳統白雞飯,賣相不俗,入口一樣軟滑爽口,可惜雞肉味唔算重,又係淡淡地,不過總好過燒雞皮搶味,係清淡之選。兩款雞飯都自動波跟埋油飯,呢個油飯比預期好。油飯有應有嘅光澤,未食已經聞到好香雞油味,每粒飯都係淡淡黃色,軟硬、濕潤程度適中。入口有油香,亦有點薑同香茅味道,唔會過份油膩,味道唔錯。

新加坡叉燒飯套餐 ($68)
先後兩次都點左新加坡叉燒,老實說,其實唔知同港式叉燒有乜分別,不過食過味道都唔錯。從賣相睇黎,的確同港式叉燒分別唔大,外皮都係紅紅地,略為燒焦嘅程度,中間呈白白、粉紅嘅色水。不過味道就有別於港式嘅齋甜、齋蜜味。呢款新加坡叉燒,除左固有甜甜地嘅叉燒醬味道,蒜香味都幾重,亦帶點香甜麵豉味,比港式叉燒更惹味。叉燒上面仲有薄薄一層外加醬汁,撈飯一流。

今次團購體驗比較奇特,一向使用團購優惠的話,店方絕對禁止團購客柯打套餐。但呢間餐廳竟然規定團購客必須使用套餐,不得散叫。估計因為套餐相對價錢較貴,餐廳收番除淨嘅零頭,可以賺多幾個錢。是次優惠計番團購,埋單$86,二人前下午茶其實唔算平。一心諗住,試過就算,但竟然連續兩個星期黎,真係迫不得意。

今次連續兩個星期黎同一間餐廳,可算係俾團購搵左個笨。一向謹慎,買團購前一定落足眼力,睇清楚全部隱藏條款,仲要計定預算消費額,計掂條數先會俾錢,寧願唔買,都唔會濫買。當日睇到蜂賣呢個優惠之後,一心想去試老趙越南菜嘅晚餐,所以一共買左兩張價值一百蚊現金券,諗住有二百蚊Quota實夠用,點知就中伏。

取巧一﹕虛擬兌換危機

家陣團購泡沫越來越勁,要令團購客對網上集體購買有信心,一個健全嘅「退款機制」係必須的。但凡商舖結業,或者會員買完無心情用,未有時間用,只要去信團購公司,嘈多兩嘈,公司大多會買你怕,以現金又好,爛鬼積分又好,都會願意退款賠償。不過如果客戶已經「兌換」優惠的話,就算點嘈,相信團購公司都會大條道理,闊老懶理。 就好似今次咁,會員要喺指定時間內,先將列印本「兌換」成實體現金券,所以無論最後有冇消費到,會員已經「兌換」成功。團購公司大可以堅持絕對零退款,會員只好局住用。都明白今次優惠係團購條街,唔係間間店舖有處理核實兌換券嘅能力同時間,所以集中由一間較為醒目,又抵得諗嘅甜品舖做中央統籌,商舖們真係要多謝你。不過,對於團購客黎講,呢個就係一個危機。

搵笨二﹕使用條款嚴重苛刻化
點解講到局住用咁慘,明明係你情我願,會員自願選購。可惜,換左實體現金券後,好多商舖都臨時反口,自行加鹽加醋,將團購條款嚴重苛刻化。最簡單就係修改使用時間,只安排慘淡時間俾團購客,例如晚餐要你黃昏六點前埋單等。又或者限制使用張數,無論你消費幾多都好,只可以使用一張現金券等,總之團購網頁所寫嘅所謂條款形同虛設。可能,商戶事後發覺呢件事原來無肉食,只係俾團購公司抽水,所以局限使用方式,變相拒團購客於門外。團購客只好搜尋僅有岩心水嘅商舖,將就下局住用,以免現金變廢紙。好明白團購只係一種宣傳,商舖唔想因為招呼團購客,而影響本身嘅生意,因小失大。不過,相信當初傾團購時,呢啲條款都係團購公司同商戶坐低傾的,事後反口,真有點那個。而團購公司唔監察,任由商戶自把自為,更加那個。

玩野三﹕商舖結業令局限更局限

呢兩個星期行過山林道,發現部份商舖疑似結業。就好似是次團購兌換統籌金玉滿糖,門口就貼住「內部裝修,暫停營業」。原本選擇已經唔多,仲有商舖結業,團購會員真係多得你唔少。以本人為例,發現使用條款局限後,都自行調節使用計劃。一早諗住將一次越式晚餐,改為一次午餐加一個甜品。點知連甜品舖都關門大吉,最後只好喺同一間餐廳食兩次午餐。咁總好過,明明無興趣都走去打泰拳、修甲、玩塔羅牌掛。

基於以上問題,只好選擇比較有興趣嘅文華雞飯,而且計落條數比較抵。不過使用時間超麻煩,只限平日嘅下午茶時間,惟有放假黎食。最後臨到期之前,先用晒果兩張現金券。如果網友們大手購入,真係難以想像佢地點用。經過今次驚險團購體驗,蜂賣嘅可信度已經急降到負一百分,相信日後亦唔會再買一啲要先換票再使用嘅優惠。經一事、長一智,真係要小心。

有緣相遇,與王子的一夜情

八王子拉麵@佐敦
1/7/2011 20:30
25/9/2011 19:30
10/6/2012 18:00

佐敦白加士街一條街已經有超多間有名嘅食肆。之前由尖沙咀行去旺角經常都會miss左嘅一條街,我地係近呢幾個月先發掘出黎嘅新蒲點,唔熟路到連行過左幾個街口都唔知。

今次蜂買團購換來$22食一碗拉麵,係人氣頗佳主打牛骨湯底嘅八王子拉麵。
用排隊黎考驗你有幾想食拉麵嘅誠意。等左十幾分鐘,俾我知道主打嘅牛骨湯沽清。好彩唔係太熱,又好彩有咁平嘅團購,如果唔係,我相信我會係誠意不足,會選擇半路中途調頭走佬的一群。等足三十分鐘,經歷過俾人爬頭的境況,我地終於都入到去涼冷氣。

招牌八王子拉麵、胡椒風味拉麵已經下架,最後叫左﹕味噌風味拉麵同味蛋豬骨湯拉麵。相信佢係拾錯單,得到嘅係「豬骨風味拉麵」同「味蛋味噌湯拉麵」。

賣樣吸引,而且份量十足。每碗都有叉燒、粟米、昆布、魚板、青蔥同最出名嘅溏心蛋,而味蛋麵更加俾足三個半隻。

錯誤地先試左味噌湯底,覺得好一般,難同和歌山拉麵比。呢度嘅味湯就好似吉野家送嘅味湯再淡口多少少,用黎送麵唔得掂喎。可見和歌山味噌拉麵暫時都係無敵嘅。

再試番我最喜愛嘅豬骨湯。我無言了,我再次遇上終極豬骨湯! 唔想多講,只想呷多幾啖。
豬骨湯係淺啡帶乳白色,淨係聞,都聞到濃烈嘅豬肉味。呷一口,係creamy柔滑嘅質感,味道係極度濃郁嘅豚骨味,仲有些少豬獨特嘅膻味。無錯,就係我期待已久嘅終極豬骨湯。硬要雞蛋裡挑骨頭,湯底上的油份略嫌多啲,多左份油膩感,如果少兩滴油就係完美架啦!

拉麵係自家製,低鹼度拉麵。可以用韌字來表達一切,係十級彈牙,超級煙韌。但希望為左避嫌,免得比人話太硬,請煮多十秒鐘。每碗配上幾塊日式叉燒,有微甜嘅日本醬油味,再經過燒烤,有多陣焦香氣味。肉質肥瘦適中,爽口到似豬頸肉嘅質感。而附送嘅溏心蛋更係不得了,蛋白煮得好軟滑,蛋黃半形固,而內外都充滿甜甜嘅醬汁味,頓然覺得散叫十蚊一隻蛋都值得加餸。另外,值得一讚係粟米粒粒都係香甜爽脆,配料都咁好味。

再溫馨提示,每枱都有芝麻同香蒜自助加料。食味湯係絕對唔建議加香蒜,而想豬骨湯更濃郁,係尾段時候,加些少香蒜撈麵係另一種風味。

係錯有錯著,招牌牛骨湯sold out先會有興趣試試豬骨湯,一試難忘,證明我同呢間店有緣,成為我的喜愛之一。一餐飯足見店舖誠意服務客人,堅持一位師傅主理拉麵,舖仔細細服待十零枱客,動用六個侍應走上走落。埋單加一係值得俾的,一碗麵$27,係抵到爛嘅價錢。今次團購係成功嘅,試完一次後,相信日後都會願意俾正價encore。

25/9/2011 19:30

一一年嘅七一回歸日,因為團購而認識八王子。相識一場,曾經話過「相信日後都會願意俾正價encore」,估唔到,呢日咁快來臨。今次要一試店方主打嘅牛骨湯底!

八王子拉麵 (黃金牛骨湯) ($52)
跟據店方介紹,湯底係由日本拉麵達人本田雄一郎先生秘制嘅牛骨湯。牛骨湯起源於日本鳥取縣,是日本主流三大拉麵湯頭之一。店方用八十斤新鮮牛筒骨、牛肋骨、雞骨、鰹魚等多種材料,經廿多小時熬煮而成。配以美國洋蔥碎,充分帶出牛骨湯鮮味。湯頭香味鮮、色澤金黃,所以取名黃金牛骨湯。湯底比豬骨湯清澈,而且較為鮮味,骨味感較重。配上煙韌嘅拉麵係唔錯的。而叉燒經過炭燒,鬆軟爽口,加上高質素溏心蛋,整個配搭的確唔錯。

胡椒風味拉麵 (胡椒牛骨湯) ($52)
胡椒風味拉麵係店方必食推介,湯底係牛骨湯再配上大量胡椒,香氣十足,有輕微辣味更加惹味。而叉燒係特別製作,為左配合湯底再加上胡椒醃漬,香氣更佳。

可能因為唔洗等位,今次體驗少左一份期待感同刺激。牛骨湯雖好,不過並唔係我杯茶,個人還好獨愛濃到震嘅豬骨湯。不過呢間拉麵都值得試,只希望佢可以保持質素。

10/6/2012 18:00

又做團購所以再黎,湯底仍是ok的,但配料好似甩頭甩骨。唔知發生咩事,點解無食一排差左咁多,有種就執笠嘅氣色。算吧啦,唉…

前篇
7/8/2011