by admin | 8 月 24, 2026 | Blog, 九龍城, 小食, 甜品, 西餐, 鐵板燒
啟德 24/8/2026 14:00
今日嚟到啟德 AIRSIDE 享用午餐，午市套餐非常抵食。餐廳環境大，靜靜地，他他條條慢慢食。
阿根廷安格斯肉眼扒 (8oz) 配 香草燒薯仔 $138: 呢客 8oz 安格斯肉眼扒份量十足。用熱石送上略生嘅牛扒，按個人需要自行煎熟，七成熟的話切開肉質粉嫩多汁，石板太熱，牛扒好快熟晒。牛味都算濃郁醇厚，咬落都有肉汁。加配嘅香草燒薯仔內裏綿密鬆軟，仲有幾粒紅蘿蔔、菠蘿、粟米做配菜。
喇沙露筍蝦意大利飯 $82: 喇沙醬汁濃稠香濃，帶有淡淡嘅椰香與微辣辛香，粒粒意大利飯均勻吸飽精華，口感軟硬適中。入面嘅大蝦爽口鮮甜，配搭清脆鮮嫩嘅露筍，正好平衡咗喇沙汁嘅厚重感，惹味之餘毫不油膩。
柚子蜜炸雞 $35: 小食幾抵，一份有六大件，炸雞炸得外皮金黃薄脆，入面嘅雞肉依然保持鮮嫩多汁。沾上清甜微酸嘅柚子蜜醬，酸酸甜甜嘅果香中和咗炸物嘅油膩感。
焙茶芝士蛋糕 $32: 芝士蛋糕質地細膩幼滑，入口即溶。芝士濃厚，鹹香味明顯，有淡淡嘅焙茶香。
石板街蛋糕配朱古力雪糕 $42: 朱古力蛋糕口感扎實濕潤，朱古力極之濃郁，入面仲食到棉花糖同提子乾嘅豐富咬口。配上一球冰凍香滑嘅朱古力雪糕，雙重可可濃香喺口入面交織，冰火層次分明。
熱榛子鮮奶咖啡 $13: 熱榛子鮮奶咖啡奶泡打得幼滑綿密。咖啡都算幾濃厚，有香甜嘅榛子堅果香，入口溫潤順滑。
全單$400有找，有午餐可以選擇，整體還算不錯。
by admin | 8 月 16, 2026 | Blog, 九龍城, 日式料理, 甜品, 飲品
啟德天璽天 16/8/2026 15:00
終於都試到呢間極高人氣嘅抹茶專門店，次次行過都排晒隊，超受歡迎!
抹茶豆腐草莓 $85: 賣相精緻誘人，層次感非常豐富。抹茶濃郁醇厚，草莓醬啖啖果肉，鮮甜果酸，口感格外清新，最後係滑溜細膩嘅豆腐雪糕淡淡嘅大豆清香，甜而不膩。可惜抹茶給比下去。
兩球雪糕 $58: 揀左開心果堅果味、焙茶味，一次過滿足兩款大人氣口味。開心果堅果味雪糕質地綿密扎實，極濃郁嘅堅果香，奶香十足；而焙茶味雪糕則茶香撲鼻，炭焙焦香，茶味濃烈，甜度控制得恰到好處。
抹茶雪糕大福 $38: 經典日式甜品嘅極致展現，賣靚靚。一大粒超甜士多啤梨，加抹茶粉。大福糯米皮薄得嚟極之煙韌軟糯，入口軟綿彈牙。包住入面厚實冰凍嘅四號特濃抹茶雪糕，抹茶雪糕質地順滑，茶香濃烈而回甘悠長，50%抹茶真材實料。充滿日式風味，抹茶控不可錯過。
by admin | 4 月 19, 2026 | Blog, 九龍城, 外賣, 港式, 飲品
啟德天璽天 19/4/2026 16:30
終於試左近期大熱嘅香港人的茶飲品牌! 味道不錯，值得bookmark。
龍眼桂花冰 $41﹕龍眼沙冰原汁原味，感覺非常新鮮天然，仲有清甜滑溜嘅桂花茶凍，茶味好清香，新鮮龍眼肉飽滿多汁，甜度恰到好處，清爽涼快!
抹茶鮮奶茉 $39﹕頂層芝士奶蓋口感極之綿密，味道微鹹，加上抹茶粉夠晒甘甜，飲得出的高級感。鮮奶茉茶底順滑醇厚，加入煙韌彈牙嘅黑糖珍珠，整體味道配合得相當不錯。
牛油果甘露乳酪 $46﹕牛油果乳酪保留左牛油果天然嘅順滑口感，味道濃郁豐富，配搭酸酸甜甜的乳酪、芒果、柚子肉、西米等，啖啖果肉，口感超豐富，味道微酸平衡得剛剛好。
by admin | 3 月 14, 2026 | Blog, 九龍城, 外賣, 小食, 西餐
九龍城 14/3/2026 18:00
九龍城除咗出名食泰國菜，其實仲有好多高質素嘅隱世小店值得發掘。飢餓館2.0原來係鴨脷洲搬過嚟嘅人氣小店。
煙三文魚炒蛋墨西哥卷餅 $72: 份量十足嘅墨西哥卷餅，外層嘅卷餅皮微微烘過，帶點微脆同麵粉香。入面嘅餡料非常澎湃，煙三文魚鹹鮮味，炒蛋勁厚，炒得極之滑溜、蛋香濃郁，仲有好多新鮮嘅蔬菜，口感層次極之豐富。跟餐有即叫即炸嘅薯條夠晒熱辣辣，金黃香脆。
野菌黑松露烏冬 $61: 面層鋪滿濃郁芝士，賣相吸引，醬汁非常濃稠滑溜，黑松露香氣濃郁，完美咁掛喺每一條烏冬上面，烏冬又夠煙韌彈牙，入面有好多唔同種類嘅野菌，非常好味。沙律脆爽口嘅沙律菜，配上微酸開胃嘅沙律汁，清甜解膩。
值得一提飲品都好有誠意，唔係預製品，值得encore。
by admin | 1 月 11, 2026 | BB Friendly, Blog, 九龍城, 日式料理, 港式, 火鍋
九龍城 11/1/2026 18:00
天寒地凍來火鍋，有得食有得玩，帶小朋友就最岩。今次揀左「番茄薯仔鮮牛鍋」，大大件番茄、薯仔，仲有粒粒鮮牛肉，味道香濃，酸酸甜甜，夠晒開胃。
冰震鮑魚都係冰爽彈牙好鮮甜，今次嘅池魚刺身非常新鮮，味道甜甜，魚油味香。霜鮮肥牛油花非常靚，輕輕煮十秒，入口嫰滑到不得了。
火鍋料有招牌水餃皇，超飽滿勁大隻，皮薄餡靚，入面係原隻大蝦，非常爽口彈牙，仲有配料，充滿鮮味。手打鮮肥牛丸更加係必食推介，非常彈牙多汁，牛味極濃，而家肉汁豐富。雲吞併韭菜餃就岩晒小朋友，細細粒但餡料豐富，幾香甜。蝦滑併墨魚滑非常新鮮，煮熟左係非常爽口彈牙。
最後要讚下個紫菜響鈴，平時食響鈴多數係齋腐皮，呢度加埋紫菜，淥三秒即食，外層吸滿番茄牛湯嘅精華，內層紫菜帶嚟淡淡嘅海洋鮮味，酥脆得嚟又有層次，真係邪惡又好食！
by admin | 6 月 29, 2025 | BB Friendly, Blog, 中菜, 九龍城, 日式料理, 火鍋, 親子餐廳
九龍城 29/6/2025 18:30
九龍城廣場對面有一間主打中式同日式嘅火鍋專門店，類似私房菜形式，非常高檔。
先來一個豪華刺身拼盆﹕一盤匯集左海花金古、冰鎮鮑魚、加拿大象拔蚌、北寄貝同三文魚，賣相勁吸引，滿滿奢華感。海花金古新鮮撈起即切，上碟時魚肉仲跳動緊，可見新鮮程度。魚肉呈半透明淡白色，切片厚薄適中，入口即能感受肉質天然嘅清甜，簡單沾少少芥末同日式醬油，足以突顯其鮮味。冰鎮鮑魚肉質飽滿，並且完整保留其天然精華。經過適當的低溫處理，鮑魚的鮮味緊實且有彈性，無需過多調味，自帶鮮美！鮑魚肉帶有微微的鹹甜新鮮度。象拔蚌切得薄薄，入口非常清爽，食得出微微嘅貝類甜味，脆脆的口感。北寄貝都係香甜煙韌，三文魚油脂豐富，整個刺身拼盆食得出的新鮮，滿滿海洋風味濃縮於一盆，超高質素。
椒鹽三文魚骨腩﹕作為開胃小食真係非常吸引。三文魚有金黃酥脆嘅炸粉，骨腩仍有唔少魚肉，肉質鮮嫩多汁，油香滿溢。椒鹽調味帶出鹹香與微微嘅辛辣，味道恰到好處。
鮮味卜卜蜆鍋﹕湯底有卜卜蜆，隻隻都大大隻，肉質飽滿，淡淡嘅鹹香海味，入口滑嫩，非常新鮮。湯底清甜，啖啖海鮮甜味，係一個相當百搭嘅火鍋湯底。湯窩本身加左粉絲，粉絲索晒湯汁，非常香甜。
手切鴛鴦牛﹕火鍋料揀左一份鴛鴦牛，油花勁靚，非常吸引。兩款牛肉都相當高質，只需要輕輕涮幾秒就可食用。肉質非常鮮嫩，口感順潤。首先安格斯肥油脂較為豐富，入口更加腍滑，油香味濃。另一款係特級鮮牛，牛肉更加濃厚，較有口感。湯底清爽，可以突顯牛肉天然香氣。
脆鯇魚片﹕輕輕燙十幾秒，魚片熟透微微捲起，已經感受到纖維緊實。脆鯇真係非常爽脆鮮嫩，無魚腥味，吸引左湯底嘅精華，更加香甜清爽。
稻庭烏冬﹕最後煮個烏冬，吸收晒所有海鮮嘅精華，味道香甜。本身烏冬又夠腍滑，伴湯食十分正斗。
洛神花大大杯﹕三十幾蚊咁大杯，非常解渴，味道酸酸甜甜，爽!
全餐由廚師發辦，總共$2708，價錢貴，但質素非常高質，幾對對得住價錢。
加上有一個兒童玩樂區，小朋友玩得開心，大人食得放心，輕輕鬆鬆享受一個晚上。
