亞參雞飯
屯門市廣場 17/8/2025 17:00
趕得切食下午茶。
迷你海南雞飯 $48﹕份量迷你但賣相對版，雞肉滑嫩多汁，有雞肉味，皮薄有彈性。米飯粒粒分明，吸收左雞湯精華，有濃郁香氣。搭配傳統三色醬就係海南雞飯嘅精髓。酸辣味酸辣度適中，薑蓉又夠味，醬油甜香，不錯。
檳城紅茄參巴醬鴨腿摻摻 $48﹕鴨腿經過慢煮，肉質鮮嫩，外皮微脆，帶有一絲焦香。紅茄參巴醬酸甜中帶辣味，味道濃郁，摻摻有油麵同炒絲組合，吸收晒湯汁，超切味。
亞參雞飯
屯門 17/8/2025 17:30
趕得切食下午茶。
亞參去骨海南雞飯 $48﹕賣相不錯，雞肉嫩滑多汁，雞皮帶有少少膠質，入口即化，配埋特製嘅醬汁，鹹中帶甜，仲有少少酸辣味，好開胃。油飯用雞湯煮成，粒粒分明又香濃，仲有陣陣雞油香。三色醬都齊全，辣椒醬，辣度適中，帶有蒜香同酸味，點飯或者雞都不錯。輕盈版份量真係好輕盈。
檳城紅茄參巴醬鴨腿滲滲 $48﹕大大隻鴨腿煮得入味，皮脆肉嫩，帶有濃郁嘅紅茄參巴醬香氣，微辣中帶甜，好惹味。滲滲係蛋麵同米粉，麵同米粉嘅比例啱啱好，麵條彈牙，米粉滑溜，吸晒紅茄參巴醬嘅精華，每一啖都充滿層次感。湯底酸甜開胃，帶有少少辣勁。
The Platter
屯門Hotel Cozi Resort 17/8/2025 12:00
特登嚟屯門食自助餐，因為環境實在太吸引，到處都係火車主題，連座位都係火車車卡包廂，小朋友一入場已經勁興奮。餐廳外有一個觀景平台Cozi Starry，環境光猛都幾舒服。
餐廳唔算大，但係應有盡有，麵包前菜、沙律、凍海鮮、刺身、熱盆、甜品、飲品都齊全。主打海鮮主題選擇都幾多，蒜蓉粉絲蒸扇貝限量，粉絲索晒蒜蓉汁。即煮嘅海膽汁鮑魚蝦仁意粉，新鮮熱辣，味道不錯。最愛嘅甜品首選自製脆皮窩夫，牛油味夠香，新鮮熱辣，外脆內軟。自行配上雪糕同埋朱古力醬，拍得住出邊嘅甜品舖。最後仲有多款雪糕選擇，貴價嘅Movenpick、Häagen-Dazs口味都幾多。首次是香港品牌Co Co Berry有好多香港特色嘅口味，豆腐味清甜豆味香，超推介。香港奶茶非常濃郁，都不錯。
食飽飽上五樓兒童遊樂場玩，場地唔算大，但玩樂設施應有盡有，連電動車都有得玩，真係超開心。
貝爾特酒廊半自助餐
貝爾特酒廊＠屯門
12/8/2018 12:00
趁生日去食自助餐，今次揀左呢個新開無耐嘅型格酒店，有半自助餐食。
位置西鐵站不遠處，但遇上落雨，推著BB車有啲狼狽。精品酒店餐廳唔算大，但座位闊落，非常舒適自在。
週末自助早午餐。
一邊係自助檯，以半自助餐黎講都算唔錯，有芝士、煙三文魚、風乾火腿。
麵包、沙律吧連兩款凍海鮮。
三款粟米片可自行配鮮牛奶，另有燒味、pizza。
熱盆炒小菜、粉麵飯等飽肚野。
仲有少許中式蒸點心同餐湯。
主菜揀左一份烤羊架配淡咖哩汁，味道正常。
另一個主菜叫左個燒豬柳配蘋果蓉，賣相唔係太得，好普通。
又到甜品時間，選擇算多，有水果，仲有蛋糕、杯子甜點等。
價錢唔貴，雪糕就只有最普通嘅雀巢牌。但甜品味道都正常嘅。
來到咁偏遠嘅地區，唔會要求自助餐有幾咁好食，＄258位，唔知有幾多折。正正常常，普普通通，志在hea一個中午慢歎午餐。
霸氣拉麵四天王
麵屋武藏 武骨@屯門
23/9/2012 14:30
今日黎一個新界西一天遊，不忘搜尋區內人氣拉麵。第一回先去日本第一嘅拉麵王麵屋武藏。始創於日本新宿嘅麵屋武藏，開業短短十幾年，已經成為日本No.1拉麵天王。店方喺多個日本全國票選同電視台拉麵店比賽中勝出，超過十萬家拉麵店中一枝獨秀，獲得「拉麵四天王」嘅美譽，早已喺日本享負盛名。
老闆知道香港人鍾意食拉麵，不惜搵食搵到日本，所以決定喺香港開設第一間海外分店，仲派出新宿店大廚來港擔任培訓及監督工作，以保證出品原汁原味。是次先黎試下人氣黑武骨湯底，再加一個白武骨沾麵。
黑武骨豚角拉麵 ($72)
烏卒卒嘅一碗拉麵，烏黑程度絕對係超乎想像，蒜香味亦驚人。人氣之選黑武骨係豬骨濃湯嘅基礎上，加入黑蒜油增加香氣。熱辣辣嘅頭啖湯味道的確驚喜，湯底膠質豐富，濃厚忌廉咪。豬骨味濃，感覺好鮮甜，甜味之中散發陣陣蒜香味。據講湯底除左用上大量豬骨之外，亦加入左唔少鰹魚、海鮮料熬製而成。而黑蒜油係洋葱、蒜嘅精草，所以味道更加濃郁。
優質湯底亦需要拉麵配搭得宜。武藏嘅自家製拉麵明顯比一般拉麵粗身，卷曲而且較為扁平，形狀十足烏冬麵，煙韌彈牙得黎亦非常掛湯。
主角選擇左豚角，份量足夠，橫切面亦相當吸引，明顯分得出三層巴士。豚角就好似中式東坡肉，脂肪、肉相間，以燒汁滷製。腩肉部份非常鬆化軟腍，醬汁滷得徹底入味。脂肪部份入口即溶，滑溜到不行。看似肥膩，但卻鮮甜無比，無過份負擔。
配料方面仲有長白蔥絲、菠菜、紫菜同半隻溏心蛋，怒將配料吸滿黑武骨湯絕對係上佳做法。而溏心蛋亦值得一讚，熟成度剛好，蛋白不失幼滑，蛋黃亦香滑黏口，不錯。
白武骨叉燒沾汁麵 ($75)
沾汁麵亦係武藏嘅拿手好戲，特別選擇另一款白武骨試試原味。顧名思義，沾汁麵係用麵沾上湯汁先食，所以麵同湯係分開送上，排盤賣相亦更為豪邁。沾汁麵嘅湯底係特別製作，以確保沾麵嘅一秒間，麵條就可以吸盡湯汁嘅精華。貪口痕先試一口沾汁，味道濃得過分，一大碗湯嘅味道完全濃縮喺小碗之中。豬骨香甜，亦滲透海味，再帶一點青蔥香味。鹹，的確鹹，但特別留意，呢個唔係正常食法。只要加入麵條略為一沾，入口嘅味道絕對剛好。又扁又粗嘅麵條，更能發揮吸汁嘅功效，配搭更加突出。
沾汁麵指定配上叉燒一大塊，厚切到跟豬扒無異。叉塊用簡單汁煮，無再經過炭燒等花巧程序，但豬肉嘅鮮甜已經勝過一切，入口鬆軟，肉質嫩滑。將叉燒浸入沾汁，香味更加倍提升。
不得不提沾汁麵嘅一大特別之處。食晒所有拉麵、配料之後，不妨請店員加入魚高湯，略為攪拌後，就會變成一碗好味嘅餐後湯。湯除左豬骨味外，亦有好香海味，加上少許味噌，絕對比開粉嘅味噌湯好飲一百倍。最後連汁都飲埋，真正完食。
子持白魚天婦羅 ($32)
單睇名稱就知道白魚係有子的，魚身中間有粒粒魚春，口感幾得意。魚仔沾上麵衣去炸，外皮脆脆地，還好食落唔油膩。
今次拉麵挑戰非常成功。拉麵賣相、味道、質感都好滿意。特別討小妹歡心嘅，就係濃郁無比嘅湯底，口味絕對岩心水，值得比個Good。另外，不得不讚下店內嘅裝修同氣氛都好日系。探索半開式廚房後面，睇見師傅煮麵、瀝水嘅功架，加上閒時大叫口號，呢啲表演實在超給力，兼好有武士嘅霸氣。
求一碗好拉麵等候時間大約一小時，實在夠苦悶，不過都算值得。相信好嘅拉麵仲有好多，一於繼續追尋。