深水埗 11/10/2025 14:00
今日來到西九中心美食廣場，呢間Pizza店選擇非常多。
千島海鮮韓式pizza $79: 新鮮即焗，賣相吸引，整個餅面有好多魷魚、蟹柳絲、蜆肉等等，再加上大量芝士，顏色配搭豐富。餅底厚薄適中幾鬆軟，千島醬嘅味道非常突出，甜中帶酸，好開胃，芝士份量夠慷慨做到拉絲效果。
卡邦尼炒年糕公仔麵 $69: 勁多奶油超忌廉咪，芝士奶香味濃郁，口感順滑，煙肉鹹香，洋蔥超甜。韓式年糕煙韌軟糯，富有嚼勁，公仔麵就夠索晒汁 好飽肚。
原味飯卷 $50: 紫菜鹹香，脆卜卜，材料都好豐富，有蟹柳，紅蘿蔔，青瓜，魚片等，好有韓式風味。
食物係不錯，但係西九龍中心美食廣場實在太多人，座位真係麻麻哋。
深圳領展中心城 3/8/2025 18:00
河源蒸米粉 30元﹕米粉蒸到條條分明，上面鋪滿咗肉碎、冬菇絲同埋大量蔥花。口感非常煙韌彈牙，仲帶有淡淡米香。上面嘅配料亦好惹味，肉碎鹹香十足，冬菇絲爽口彈牙，鮮味突出。全部味道滲透入米粉入面，成碟米粉食落唔會好油膩，味道恰到好處。
酸菜鱸魚 58元﹕個湯底酸菜嘅酸爽同辣椒嘅香辣結合，酸得嚟唔會嗆喉，辣味適中，飲落去非常順口。主角鱸魚片份量好多，切得好薄，而且全部無骨，啖啖肉，口感嫩滑，完全吸收晒湯底嘅精華，鮮甜得嚟又帶點酸辣，非常惹味。除咗魚肉，入面嘅配料都好足，索晒湯汁嘅酸菜爽脆可口，另外仲有啲粉絲、芽菜喺底，味道不錯。
菠蘿咕嚕肉單人餐 35元﹕咕嚕肉炸到金黃香脆，均勻被一層橙紅色、亮澤嘅糖醋醬包住。配料除咗有新鮮菠蘿，仲有青、紅椒同洋蔥，顏色五彩繽紛。咕嚕肉外皮炸得非常香脆，豬肉依然保持到好嫩滑多汁。糖醋醬汁調校得啱啱好，酸酸甜甜。新鮮菠蘿嘅果香同酸甜味，正好中和咗炸肉嘅油膩感，非常醒胃。
深水埗 1/6/2025 11:30
經朋友介紹，深水埗舊式大廈發現一間裝修清新簡潔嘅Cafe，到處都有可愛嘅小貓裝飾。
All Day Breakfast $118﹕呢份全日早餐有夠豪華。炒蛋本身非常嫩滑，奶香又有蛋香，再加上黑松露嘅獨特香氣，味道更加提升。雞扒外層煎得微焦，咬開之後雞肉鮮嫩多汁。牛油果口感綿滑，熟度剛好，味道香甜清新。忌廉芝士酸種麵包係一大驚喜，麵包外層酥脆帶嚼勁，內裏柔軟，本身已有滿滿嘅穀物香氣，再塗滿忌廉芝士，多一份咸香奶香。最後仲有希臘乳酪收尾，乳酪質地濃稠潤滑，帶有自然微酸味，相當清爽。呢份早餐可謂顏值與味道兼備，仲非常健康。另加$20加配紐綸堡腸同芝士腸，腸衣外皮勁脆，一咬爆汁，肉味濃郁又有咸香，非常好味。
明太子煙肉蘑菇忌廉汁意粉 $98﹕意粉靚，連隻碟都好靚，將東西風味完美融合。意粉煮至剛好熟度，保留咗輕微嘅彈牙感。忌廉汁濃稠，奶香味香濃，均勻咁黏附喺意粉上。意粉加上煎到脆卜卜咸香味濃嘅煙肉，同埋鮮味野菌，本身呢個配搭已經無敵。再加上日式明太子來一個變奏。明太子咸香，帶有海洋鮮味，伴勻意粉後味道更加豐富。
黑芝麻意式奶凍 $42﹕黑黑實實滑嘟嘟，切開中間就見到奶凍分左兩層。頂部係芝麻味為主，入口已感受到黑芝麻嘅濃香，芝麻味濃烈感慢慢散出，食得出顆粒感。中間係芝麻奶凍，奶味更為突出，口感幼滑，入口即化。淋上少少淡奶，味道更加柔和，整體黎講甜度適中，相當不錯。
牛角窩夫配雲呢拿雪糕 $58﹕兩片牛角窩夫焗到金黃色，大大一個雪糕球加上莓果紅藍相間，賣相非常吸引。牛角窩夫係香脆鬆化口感，中間層層堆疊嘅酥皮，牛油味勁香濃。現烤出爐嘅窩夫仲暖暖地，加上雲呢拿雪糕來一個冰火。雪糕有粒粒雲呢拿籽，口感幼滑黏稠，相信唔係平價貨。加上藍莓同紅桑子都大大粒酸酸甜甜，整體相當平衡，簡約中見心思。
榛子牛奶咖啡 $42﹕一黎已經被香醇濃郁嘅咖啡香氣吸引。一啖飲落去，咖啡與榛子味道恰到好處，咖啡濃郁甘香，口感絲滑柔和，除左奶香，仲帶微甜嘅榛子堅果香。
薄荷特飲 $45：原來係新鮮薄荷加上青檸嘅梳打特飲。酸甜清爽，檸味香濃，加上梳打氣泡嘅刺激感，冰涼又清爽，岩晒而家咁熱嘅天氣，亦為豐富嘅一餐解膩。
呢間小店無論喺裝修風格、食物、餐具盛器都好靚，感覺清新悠閒，好適合享受慢活。老闆娘親切友善，自營小店值得支持。
深水埗 8/2/2024 20:00
豆花 $13
外賣豆腐花，返到屋企仲係暖笠笠，豆花非常白白滑滑，入口即溶，豆味都幾濃郁，加上薑糖水，甜甜地。個人最鍾意加黃糖，更加香甜。
豆花布甸都係非常幼滑。
美食廣場@深水埗
豬骨濃湯叉燒拉麵 ($65)
湯底濃香超膠口，拉麵幾幼滑，叉燒一般
@火之鳥
極上雞叉燒白湯拉麵 ($65)
隠家拉麵工場@深水埗
30/12/2012 18:00
一間以沾麵為主嘅拉麵店，靜靜地入主深水埗蘋果商場。店面係用木搭成，蓋上竹簾，好有低調隱世Feel，與店名襯絕。隠家引入日本山手拉麵嘅沾麵，以豬骨湯底為基礎，再加入黑蒜油、番茄辣醬變化出唔同口味，拉麵每日於店內由師傅徒手製作，每日限量供應100碗。店方六點開門，五點四十五分到達已經要排隊，真有名氣。
隠世白伝 $78
拉麵送到時係分開兩碗，一碗放拉麵，另一碗係湯汁同配料。
配料有兩塊叉燒、一隻蛋、紫菜、筍乾、青蔥等。參考食用指南，首先搞妥湯汁，夾一啖拉麵沾上湯汁黎食，食晒後可叫職員加清湯，再一飲而盡。沾麵嘅湯底比正常拉麵重口味，唔應該直接入口，不過壞孩子通常都唔跟規矩，偷咪一啖，的確濃。湯底濃稠，有好香豬骨味，魚鮮味都好重，略帶一點微酸。網友資料所講，估計應該用上唔少鰹魚粉。有別於一般齋豬骨嘅感覺，味道有層次感。店方亦建議加少許昆布醋提味，更加酸甜醒胃。不過略嫌油份比較多，有少許膩口。
沾麵配上微粗嘅麵條，口感相當爽滑煙韌，不過痴埋一舊比較難夾。掛湯能力好強，輕沾幾秒已經吸收到湯汁嘅精華。配料方面，有兩塊薄切叉燒，肥瘦均勻，肉質柔軟，肉味都唔錯。附送嘅一整隻蛋更加出色。蛋白外皮變成醬油色，黃白軟滑入味，溏心蛋黃做得好。不得不提，一片細細嘅紫菜仲印上店名，非常特別。不過沾麵雖好，仍有改善空間。唔明白點解店方將所有材料都放入湯汁之中，材料浸多一段時間，唔係浸得太濃味，就係浸到散晒。見過介紹同網友相片分享，有時會將配料同拉麵一齊放，唔知係唔係繁忙時間，連排盤時間都想慳番?
隠世黑伝 $88 外加一隻溏心蛋$10
黑伝係以豬骨湯底為基礎，再加入黑蒜油，更香濃惹味。
此店可謂零裝修，話自己身處貨倉都不為過。座位同餐枱都係用汽水箱造成，兼覓十足，不過坐得超唔舒服，連放腳嘅地方都難搵。如果唔介意要排隊，兼且地方屈質，不妨一試。