荔枝角 20/7/2026 16:30
近排幾鍾意呢間外賣丼飯店，性價比高，整體份量十足，外賣之選。
咖喱吉列豬扒飯 $52﹕豬扒金黃脆卜卜，咖喱汁係日式風味，味道濃郁，充滿蔬果香甜，質地濃稠，微微辣度岩岩好，撈飯就最岩。
滑蛋照燒雞扒牛肉丼 $60﹕雙拼飯雙重享受！面頭嘅滑蛋半熟狀態，入口即化，仲有淡淡嘅日式甜醬油香。雞肉外皮微脆，肉質鮮嫩多汁。牛肉肥瘦適中，口感奶滑，灑左少少七味粉，更加惹味。
胡麻手撕雞蕎麥麵 $54﹕清新嘅一味，手撕雞肉質嫩滑，充滿雞油香，撈埋濃郁醇厚嘅胡麻醬，真係好開胃。蕎麥麵口感爽滑有彈性，吸晒胡麻醬汁之餘，仲帶有淡淡嘅蕎麥清香。再加上青瓜絲，整體配搭非常清爽，唔會覺得好膩，夏天食就最岩。
日式炸餃子 $29﹕五大隻，外皮炸到金黃酥脆夠香口。入面嘅豬肉同菜餡保持到豐富肉汁，沾埋微酸嘅日式餃子醋，惹味又開胃。
荔枝角 20/7/2026 15:30
發現荔枝角茶飲，選擇非常多，三十零蚊大大杯好抵飲。
抹茶紅豆拿鐵 $32: 抹茶味道濃郁，微微回甘，奶味平衡，香滑順喉，仲有粒粒紅豆綿軟香甜，同抹茶苦甘完美夾埋，甜而不膩，非常解渴。
布丁粉粿奶茶$32: 奶香濃滑，茶味配鮮奶味道幾平衡，五分甜啱啱好。雞蛋布丁滑溜溜，仲帶淡淡蛋香，口感超綿密。台式仙草粉粿QQ彈牙，煙韌得嚟又順滑。
荔枝角 22/8/2025 17:00
連雞煲都可以外賣自煮，外賣包裝企理 非常方便，絕對係懶人福音。
前菜係醉蝦同醉花甲，一打開盒就聞到濃郁嘅酒香。大蝦隻隻新鮮飽滿，已經做左去殻，蝦肉質地緊實彈牙，新鮮香甜，酒味甘醇慢慢散出。花甲大大隻，肉質鮮嫩，吸收酒味嘅能力更強，鹹鮮與醇香平衡，回味無窮。
按指示先煮熱湯底，加入材料煮十分鐘就食得，再按喜好加入純酒。湯底有勁多杞子、元肉、紅棗，味道甜甜，啖啖酒香，非常好味。半隻雞好新鮮，肉質鮮嫩有彈性，肥瘦適中，充分吸收左湯底嘅精華。
蝦滑、墨魚滑彈牙爽滑。五花腩肉片肥瘦相間，肉質嫩滑。菠菜餃皮薄餡料足。最後加落埋米線同蔬菜吸收湯底精華，順滑香濃。
值得一提，佢嘅爆炸蔥醬油真係超好味，蔥油勁香。辣醬油
另外煮埋幾粒芝麻湯圓，芝麻餡爆漿，味道濃香，完美嘅收尾。
非常豐富，份量夠晒多，而且非常好味嘅一餐，適合懶人在家自製，還原餐廳高品質。
荔枝角 22/7/2025 13:30
細佬仲係BB嘅時候已經食過呢間紅葉茶屋尖東店，又靚又好味，三個餐夠晒一家食，超豐富。原來呢間分店遍地，今次就來荔枝角同Friend子來個Happy Lunch。
豪華海鮮丼茶漬飯配鰹魚昆布湯 $178﹕首先擺盤賣相係勁精緻，各種海鮮刺身錯舖係醋飯上，有夠豪華。每款刺身都非常新鮮，厚薄適中，入口食得出魚肉嘅鮮嫩同彈性。三文魚同吞拿魚都有濃郁油脂香氣，帶子鮮甜無比，甜蝦夠甜又夠腍滑，搭配少少醬油已好好食，值得一提呢度用嘅芥末似係新鮮即蘑，所以味道更為強烈，有驚喜! 試完原味，再倒入熱辣辣嘅鰹魚昆布湯來一個變奏。湯汁本身清澈又充滿鮮味，同米飯結合增添濃郁嘅海鮮風味。刺身輕微加熱，半熟狀態，與湯底完美融合，別有一翻風味。
壽司配迷你櫻花蝦烏冬 $128﹕呢款定食係期間限定，一來就俾餐牌相片吸引，真身同相片百分百完美還原，視覺效果一流。八貫壽司絕對係今餐主角，每款不同，每一粒都食得出刺身嘅鮮甜，醋飯醋味微酸，味道明顯，同刺身非常合襯。當中最突出就係蟹肉壽司，鮮甜無比﹔另有一款醬油蝦加上柚子酸甜味嘅創作壽司都相當特別。壽司搭配烏冬一向都係最強組合。烏冬湯底清淡咸香，烏冬煙韌彈牙，櫻花蝦嘅加入令烏冬更加咸鮮。大滿足!
雪糕抹茶拿鐵 $25﹕餐點加飲品只需$25就有大大杯，超正! 本身抹茶基底味道濃郁，帶微微清新甘苦味，淨飲抹茶已經相當滿意。加上一大個雲尼拿雪糕，奶味香濃。雪糕慢慢融化，奶香越變強烈，變成一杯甜美又順滑嘅嘅抹茶拿鐵。
海鮮炸物盛合 $45﹕有兩大隻蝦加上兩大雙廣島蠔，海鮮食材包上酥脆麵衣，炸到金黃酥脆卻毫不油膩。廣島蠔一向以肥美多汁聞名，變成炸物後，完全達到外酥內軟嘅狀態，仍保留左蠔嘅鮮嫩，而且超級濃郁香甜，仲一咬爆汁。另一款大蝦都相當新鮮，但風頭明顯被廣島蠔蓋過。炸物必要搭配少許檸檬汁同塔塔醬，酸甜清爽。
追加三文魚刺身 $28有三大片。
紅葉三重奏 $98﹕又係被宣傳照吸引而來，三重奏一次過滿足晒三個願望。抹茶雲石芝士蛋糕係今行目標，雲石紋路展示高級感，一層濃郁咸香嘅忌廉芝士，配一層微苦嘅抹茶忌廉，完全做到應有角色，濃郁細膩，口感輕盈，抹茶嘅微苦與芝士甜味完美平衡，真係回味無窮。黑蜜抹茶蕨餅係傳統日式甜品，口感柔軟滑嫩，帶有微微嘅彈性，晶瑩剔透，完完整整被抹茶粉包裹，味道微苦甘甜，最後淋上甜甜嘅黑蜜，加強甜度，高質! 明明話係迷你抹茶朱古力芭菲，但份量一啲都唔迷你。芭菲最吸引之訖莫過於從透明高身杯所見到豐富嘅層次感。先來幼滑無比，抹茶奶味平衡嘅軟雪糕。旁邊收埋左兩粒抹茶軟心朱古力，完全濃得極致的表現。下層係酥脆嘅云米片，為甜品增添酥脆口感。白色係輕盈鮮忌廉，而最底層係抹茶寒天Q彈味濃。一杯芭菲試到唔同材料，整體配合平衡，抹茶控超喜歡!
埋單$600有找，靚、好味、高質!
金酒屋@荔枝角21/9/2024 12:30
今日同舊同事聚舊，黎到荔枝角食日式料理。餐廳就喺荔枝角地鐵站不遠處，裝修相當有日本居酒屋風味。
金丼 月見海膽三文魚籽拖羅蓉配稻庭烏冬 $198
金飯碗送上，三文魚籽真係太澎湃，完完整整蓋過白飯。上邊仲有一層拖羅蓉同海膽。拖羅同海膽都非常鮮甜，完全冇腥味。醬油漬三文魚籽金光閃閃，一咬即爆汁，非常鮮味，拌勻蛋黃味道再提升，拌入山葵加少少刺激感，所有嘅材料配搭得宜，相當好味。稻庭烏冬正正常常，丼飯實在太正，烏冬給比下去了。
戀丼 月見特厚燒牛舌三文魚籽 $238
呢款主角係厚燒牛舌，非常驚喜牛舌真係厚度十足，喺香港實屬少見。牛舌嘅熟成度剛剛好，口感煙韌爽口，簡單加上調味，食得出牛舌嘅原汁原味。
午市套餐質素都相當高，用料非常新鮮。套餐仲包括麵豉湯、沙律等。擺盤賣相非常豪華，絕對值得打卡。
荔園流金歲月＠荔枝角
16/6/2019 12:00
炸醬麵 $38
好耐無食炸醬麵，豬肉係片片肉片，甜辣酸炸醬非常好味，麵底本身也不錯。
牛坑腩麵 $38
牛腩份量都幾多，非常腍，非常入味。
淨魚蛋 $45
較實，唔夠彈牙。
福建炒飯 $88
一般酒樓質素，餸料夠多，味道正常。
野菌紅燒豆腐 $78
份量都算多，大大碟，材料豐富。
路邊混醬腸 $22
賣相就一流，非常有風味，但呢度嘅腸粉認真麻麻地，一口粉，太腍身。
乾炒牛河 $78
鍋仔上，本身都好夠鑊氣，牛肉又夠多，調味適中，非常不錯。
餐廳以港式點心粉麵為主，賣相係吸引嘅。造型上都有心思，味道就有好有唔好，價錢又唔算貴，反正都係相機食先，影相係不錯的。